🏠 <     Alfabeto le literasa „c”     Alfabeto le literasa „k”
Äl palune vorbe le Jakovosqe pe ćhavença
49
1 O Jakov dinǎ muj pe ćhaven haj phendǎs:
— Kiden tumen haj si te phenav tumenqe
so si te kerdǒl tumenqe anθ-äl gesa
kaj si te aven!
2 Kiden tumen haj aśunen,
äl ćhave le Jakovosqe!
Aśunen tumare dades,
le Israelos!
3 Tu Ruben,
muro ćhavo kerdo angluno,
mïrï vlaga
haj e roada e angluni
mïrä zuralimasqi,
o angluno ande mïndria
haj o angluno anθ-o zuralimos,
4 Ćordos sar äl paja
— tu naj te maj aves o angluno!
Käć uśtilǎn anθ-o pato ke dadesqo
haj maxrisardǎn les.
Uśtilos anθä muro pato!
5 O Simeon haj o Levi si phral.
Lenqe ćhurǎ keren nasul.
6 Muro sufleto,
na kide tut kä lenqo sfato!
Muro ilo,
na kide tut lença!
Kä anθä lenqo xolǎrimos mudardes manuś,
haj kä plaćuja len
ćhindes äl vine le guruvenqe.
7 Dino armaja te avel lenqo xolǎrimos,
kä si zuralo,
haj lenqi xoli,
kä si bi paqi.
Si te xulavav len anθ-o Jakov
haj si te durǎrav len jekh avresθar
anθ-o Israel.
8 Juda,
si te aves läudime kaθar ke phral,
kä si te mares ke duśmaen.
Äl ćhave ke dadesqe si te bangǒn angla tuθe.
9 O Juda si jekh pujo leosqo.
Boldinǎjlǎn kaθar o mudarimos,
muro ćhavo!
Bangǎrel pe koća,
sovel sar äk leo.
Kon si te vazdel äk leo kaj sovel?
10 E rovli le zuralimasqi
naj te durǒl anθa o Juda,
nić e rovli le thagaresqi
maśkar lesqe pïrne,
ʒi kana si te avel kodova
kasqi si e rovli,
haj lesθar si te aśunen äl poporǎ.
11 O Juda phandel pe xäres ke vica,
haj kaθar e maj laćhi vica
le pujos pe xärnǎqo.
Thovel pi hajna ande mol
haj pi mantaua anθ-o rat le drakhaqo.
12 Lesqe jakha si lole kaθar e mol
haj lesqe dand parne kaθar o thud.
13 O Zabulon va beśela paśa o baro paj.
Äl koräbi va cïrdena pes othe,
haj lesqo than si te ïntinzol pes karing o Sidon.
14 O Isahar si äk xär zuralo
kaj sovel p-o islazo.a
15 Dikhlǎs kä si äk than laćho odihnimasqo
haj kä e phuv si laćhi,
kadǎ kä bangǎrel pǒ dumo tala o pharimos
haj va kerela buki sar äk robo.
16 O Dan va krisila pe poporos
sar jekh anθa-l njamuri le Israelosqe.
17 O Dan si te avel äk sap p-o drom,
äk vipera pe poteka,
dandarel o pïrno le grastesqo
haj kerel te perel pä zejanθe
o manuś poa grast.
18 Aźukǎrav te xastras man,
Raja!
19 P-o Gado si te aven but manuś ćhurǎnça,
dar ov si te lel pes pala lenθe.
20 O xamos le Aśerosqo si te avel laćho:
haj ov si te del xamata gugle le thagaren.
21 O Neftali si äk ćerboajka slobodo.
Ov phenel vorbe śukar.
22 O Josif si äk xär sälbatiko,
äk xär sälbatiko paśa äk izvoro pajeça,
äk kuro sälbatiko p-o plaj.b
23 Äl duśmaja kerkǎrde les,
ćhudes säʒeci urasa.
24 Dar lesqo arko aćhilo zuralo,
haj ov sas kerdo te xakǎrel le vastença
kaθar äl vast le Zuralesqe le Jakovosqo.
Kadǎ kerdilos ov o pästori
haj o bar le Israelosqoc
25 kaθar o Del ke dadesqo
savo va aźutila tut,
kaθar kova o Maj Zuralo
savo si te binekuvintil tut
khameça haj brïśïndeça opral
haj pajeça anθa-l izvorǎ telal,
haj i le binekuvintimaça le ćućanqo
haj i le pïntekosqo.
26 Äl binekuvintimata ke dadesqe
si maj bare dä sar äl binekuvintimata
le plajenqe veśnikod
haj i o laćhimos le plajenqo
kaj si dä kana si e lumǎ:
on te aven p-o śäro le Josifosqo,
opre p-o śäro le rajesqo pe phralenqo.
27 O Benjamin si äk ruv kaj mudarel
haj kerel kotora.
De texara xal so astardǎs,
haj e rǎt xulavel so lilǎs kaθar äl duśmaja.
28 Kadala si sǎ äl deśuduj njamuri le Israelosqe,
haj kadǎ dinǎ lenqe duma lenqo dad
kana binekuvintisardǎ len.
Binekuvintisardǎs fiosaves pe binekuvïntarǎça.
O merimos le Jakovosqo
29 Pala kodoja dinǎ len e porunka kadaja:
— Me si te avav ćhutino anθ-o rïndo mïrä phurenqo.
Te praxon man anθ-äk than mïrä phurença,
ande peśtera kaj si anθ-o islazo le Efronosqo o hetito,
30 ande peśtera kaj si anθ-o islazo Makpela
kaj si jekh angla avresθe le Mamreça,
anθ-o Them Kanaan,
savi kindǎ lan o Avraam le islazoça
kaθar o hetito Efron
ka than anθa o praxomasθe.
31 Othe praxosardes le Avraamos haj le Sara,
lesqi rromni,
othe praxosardes le Isakos haj le Rebeka,
lesqi rromni,
haj othe praxosardem i me le Lea.
32 O islazo haj e peśtera kaj si othe
sas kinde kaθar äl ćhave le Hetosqe.
33 Kana termenisardǎs o Jakov te del porunć pe ćhaven,
cïrdǎs pe pïrne anθ-o pato,
dinǎ pǒ duxo
haj nakhlos anθ-o rïndo pe phurenqo.