🏠 <     Alfabeto le literasa „c”     Alfabeto le literasa „k”
E proba e paluni
44
1 O Josif porunćisardǎs le manuśäsqe
kaj sas ćhutino baro pä lesqo kher:
— Pher xamaça äl gone le rromenqe,
kabor daśtin te ïngǎren,
haj ćhus fiosavesqe lesqo rupo
anθ-o muj lesqe gonesqo!
2 Te ćhus i muro paharo,
o paharo le ruposqo,
anθ-o muj le gonesqo le maj tärnesqo,
anθ-äk than le rupoça anθa lesqo giv!
O manuś kerdǎ sar phendǎ lesqe o Josif.
3 De texara anθa-i rǎt
dinǎs o drom le manusänqo pe xärença.
4 Dar ni duriles anθa o foro
kana o Josif phendǎ le manuśäsqe kaj sas pä lesqo kher:
— Ʒa pala äl manuś kadala,
haj kana aresesa len,
te phenes lenqe:
‘Sosθe pokinen o miśtimos le nasulimaça?
5 Ni ʒanen kä si o paharo
anθa savo pel muro raj?
Haj anθä savo drabarel?
So kerden,
kerden nasul!’
6 Ov areslo len
haj phendǎ lenqe äl vorbe kadala.
7 On dine les anglal:
— Raiǃa,
sosθe des duma kadaja?
Ni daśtin ke robi te keren kadǎ dajći!
8 Ʒanes kä andem tuqe
anθa o Them le Kanaanosqo
o rupo kaj arakhlǎm les anθ-o muj amare gonenqo.
Sar te ćoras rupo sau sumnakaj
anθa o kher ke rajesqo?
9 Te merel kodova anθa ke robi
kasθe arakhadola o paharo,
haj ame te avas robi amare rajesqe!
10 Ov phendǎs:
— Te avel sar phenden,
numa kä kolesθe kaj arakhadol o paharo
te avel muro robo,
haj tume sen ćaće!
11 Sigo fiosavo dinǎs tele pǒ gono pe phuv
haj fiosavo putardǎ les.
12 O manuś rodǎ len kaθar o maj baro
haj termenisardǎ le maj cigneça.
Haj o paharo sas arakhado anθ-o gono le Benjaminosqo.
13 On ćhindes pe coale,
ćhutes fiosavo pä pǒ xär
haj boldinǎjles anθ-o foro.
14 O Juda haj lesqe phral aresles k-o kher le Josifosqo,
haj ov ïnkä sas othe.
Haj ćhudinǎjles ke phuv angla lesθe.
15 O Josif phendǎ lenqe:
— So kerden?
Ni ʒanen kä äk manuś sar manθe
daśtil te drabarel?
16 O Juda dinǎs anglal:
— So te maj phenas amare rajesqe?
So te das anglal?
Sar daśtis te sikavas kä sǎm ćaće?
O Del sikadǎs e doś ke robenqe.
Sǎm robi amare rajesqe:
ame haj kodova kasθe arakhadilos o paharo.
17 Dar o Josif phendǎs:
— Ni daśtiv te kerav kadǎ dajći!
O manuś savesθe arakhadilos o paharo
si te avel muro robo,
dar tume daśtin te ʒan palpale paćǎça kä tumaro dad.
18 Atunća o Juda paśilo paśa o Josif
haj phendǎ lesqe:
— Rugiv tut,
muro raj,
muk ke robos te phenel äk vorba mïrä rajesqe,
haj ta na xolǎos pä kǒ robo,
kä tu san sar o faraono!
19 Muro raj puślǎs pe roben,
phenindos:
‘Si tumen äk dad sau phral?’
20 Ame dinǎm anglal amare rajes:
‘Si amen äk dad phuro
haj äk phral tärno,
kerdo kä lesqe phurimata.
Lesqo phral mulos
haj ov aćhilos korkoro kaθar lesqi dej,
haj lesqo dad jubil les.’
21 Tu phendǎn ke robenqe:
‘Anen les manθe te dikhav les mïrä jakhença!’
22 Ame dinǎm anglal amare rajes:
‘O ćhavo ni daśtil te mukel pe dades.
Kana mukela les,
lesqo dad si te merel.’
23 Tu phendǎn ke robenqe:
‘Kana ni va avela i tumaro phral anθ-äk than tumença,
ta na maj aven manθe!’
24 Kana gelǎm kä muro dad,
kǒ robo,
phendǎm lesqe so phendǎ muro raj.
25 Amaro dad phendǎs:
‘Ʒan pale te kinen amenqe äk cïra xamasqo.’
26 Ame dinǎm les anglal:
‘Ni daśtis te ʒas.
Numa kana amaro phral o tärno
si te avel amença,
si te ʒas,
kä ni daśtis te ʒas angla o manuś kodova,
numa kana amaro phral o tärno
si te avel amença.’
27 Kǒ robo,
amaro dad,
phendǎs amenqe:
‘Tume ʒanen
kä mïrï rromni kerdǎ manqe duj ćhave.
28 Jekh ïnklisto manθar haj sas kerdo kotora,
haj ni maj dikhlem les ʒi ages.
29 Kana maj lena manqe i kadales,
haj kerdǒla lesqe dak nasulimos,
kadǎ dä but si te xolǎren man
kä mïrä bal äl parne
si te ʒan anθ-o kher le mulenqo.’
30 Akanak te ʒav bi le ćhavesqo kä kǒ robo,
muro dad,
e viaca savesqi si phangli
kaθar e viaca le ćhavesqi,
31 ov si te merel
kana va dikhela kä o ćhavo naj amença.
Kadǎ dä but si te xolǎras ke robos,
amare dades,
kä lesqe bal äl parne
si te ʒan anθ-o kher le mulenqo.
32 Käć kǒ robo ćhutǎs pes gaźo anθa o ćhavo
haj phendǎs mïrä dadesqe:
‘Kana ni anava les palpale tuθe,
dośalo te avav so traiva.’
33 Rugiv tut,
muk ke robos te aćhol anθ-o than le ćhavesqo
ka robo mïrä rajesqe,
haj o ćhavo te ʒal palpale pe phralença!
34 Sar daśtiv te ʒav kä muro dad,
kana o ćhavo naj mança?
Ni kamav te dikhav o xolǎrimos mïrä dadesqo!