O bezeh le Sodomaco hai le Gomoraco
19
1 Ăl dui îngerea aresles che Sodoma reacheasa,
hai o Lot beșelas tele che poarta le Sodomaco.
Cana o Lot dichlea len,
uștilos angla lende hai banghilos le mosa che phuv.
2 Hai pala codoia phendeas:
— Mîră rai,
întrin ando cher tumare robosco!
Hai beșen cate cai reat.
Thoven tumare pîrne!
Tehara ușten andai reat
hai telearen pă tumaro drom!
— Ni,
ame beșas cate avri ando drom cai reat.
3 O Lot ni mucleas pes lendar
gi cana ciutea len andră andă peo cher,
cherdea lenghe hamos,
peclea lenghe marno hai hales.
4 On ni sutesas
cana ăl manuș le Sodomache,
phure hai i tărne,
înconjurisardes lesco cher,
saoră gene cabor sas gi coleste palal.
5 Dine mui le Lotos hai phende lesche:
— Cai si ăl manuș cai avile tute pe reat?
Încal len amenghe avri te sovas lența!
— Phralale,
rughiv man tumende,
na cheren cadav nasulimos!
8 Si man dui ceia barea
cai ni gianen murșăstar.
Si te anav len tumenghe avri,
cheren lența so camen!
Ta na cheren chanci cadal manușănghe
cai avile andă muro cher!
— Cadav manuș avilo te beșel cate sar străino
hai camel te avel amaro crisari?
Acanac si te cheras tuche mai nasul sar lenghe!
Dine brînci le Lotos hai pașile te pharaen o udar.
10 Ăl dui manuș tinzosardes o vast
hai țîrde le Lotos peste andră ando cher,
hai phandades o udar.
11 Le manușăn cai sas avri co udar le cheresco
corardea len catar o mai țîino gi co phuro,
hai on mardeonas te arachen o udar.
12 Ăl manuș andral pușle le Lotos:
— Con mai si tute cate?
Giamutre,
ciave,
ceia hai sea so si tut ando foro,
încal len anda cadava than,
13 că si te hasaras cadava than.
Că areslos lengo nasulimos
ăc baro rovimos angla o Rai,
codolasche dinea amen drom o Rai,
te mudaras len.
14 O Lot înclistos hai dineas duma pe giamutrența
cai lilesas lesche ceian:
— Ușten,
înclen anda cadav than,
că o Rai si te mudarel cadav foro!
Dar lesche giamutre pacheanas că ov cherel pereasa.
15 Cana cherdineailos ghes
ăl îngerea zorisardes le Lotos phenindos:
— Uști,
le che romnea
hai i che duie ceian cai si cate,
ta na meres i tu ando nasulimos le forosco!
16 Cana ăl dui manuș dichles că o Lot mai beșelas,
liles vastendar les,
lesche romnea hai lesche ceian,
că o Rai camelas te hastravel len.
Încalade len avri,
hai mucles len avri anda o foro.
17 Pala soste încaladea len avri,
iech anda lende phendeas:
— Hastra cheo giuvindimos!
Ta na diches palal,
hai ta na beșes
andă nici ăc than anda cadai Har!
Te areses co plai ta na meres!
18 O Lot phendea lenghe:
— O na,
Raia!
19 Ita că arachlem miștimos angla tute
hai sicadean ăc bari mila anda mande,
închearindos man te traiv.
Me ni daștiv te aresav co plai,
că aresel man o nasulimos hai merav.
20 Dich cadav foro
si cadea dă pașă te giav andă leste,
hai si i țîino ov!
Te daștivas te nașav othe!
Si cadea dă țîino!
Hai traiv!
—
21 Dich,
cherav sar tu manghes,
nai te mudarav cadava foro cai tu phenes.
22 Naș sigo andă leste,
că ni daștiv te cherav chanci
gi cana aresesa othe!
Anda codoia
ciuteas o anav codole forosche Țoar.
23 Înclelas o cham pe phuv
cana o Lot areslos co Țoar.
24 Hai o Rai cherdeas
te del brîșînd ande Gomora hai Sodoma pucioasasa hai iagasa
catar o Rai anda o ceri.
25 Hai phabardeas codol foruri,
saoră Har,
saoră manușăn andăl foruri
hai sea so bareoleas pe phuv.
26 E romni le Lotoschi dichleas pala peste
hai cherdilis bar lonesco.
27 O Avraam uștilo de tehara andai reat,
hai ghelos co than cai beșleas angla o Rai
28 hai dichleas caring e Sodoma hai e Gomora
hai caring saoră Har.
Hai ov dichelas sar vazdelas pes pa-i phuv ăc thuv,
sar ăc thuv andac bov.
29 Cana o Del mudardeas ăl foruri le Hareache,
deas pesche goghi co Avraam,
hai hastradea le Lotos anda o mașcar le iagaco,
că pereadeas andal temeli ăl foruri
cai o Lot cherdeasas pi șatra.
O bezeh cai cherde les ăl ceia le Lotosche
30 O Lot înclisto anda o Țoar
hai acilos po plai pe duie ceianța,
că darailos te beșel ando Țoar.
Beșles andăc peștera pire ceianța.
31 E mai bari phendea le mai tărneache:
— Amaro dad si phuro
hai catar mai nai nici ăc murș
te avel amende pala o obicei andă saoră thema.
32 Hai te das amare dades te pel mol,
hai te sovas lesa
caște daștil te avel amen ciave catar amaro dad!
33 Ande reat codoia dineas pe dades te pel mol,
hai e mai bari ghelis hai sutis pe dadesa.
Ov ni giangleas nici cana sutis oi
hai nici cana uștilis.
34 Coaver ghes e mai bari phendea le mai tărneache:
— Dich,
e reat cai nachlis me sutem mîră dadesa.
Hai te das le mol te pel i andă cadai reat,
hai gia i tu te soves lesa,
te avel amen ciave catar amaro dad!
35 Cherde les i e reat codoia te pel mol,
pala codoia e mai tărni ghelis
hai sutis lesa.
Ov ni giangleas nici cana sutis
hai nici cana uștilis.
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)