🏠 <     Alfabeto le literasa „c”     Alfabeto rromano o internacionalo
O bezeh le Sodomako hai le Gomorako
19
1 Ăl dui îngerea aresles ke Sodoma reakeasa,
hai o Lot beșelas tele ke poarta le Sodomako.
Kana o Lot dikhlea len,
uștilos angla lende hai banghilos le mosa ke phuv.
2 Hai pala kodoia phendeas:
„Mîră rai,
întrin ando kher tumare robosko!
Hai beșen kate kai reat.
Thoven tumare pîrne!
Tehara ușten andai reat
hai telearen pă tumaro drom!”
„Ni,
ame beșas kate avri ando drom kai reat.”
3 O Lot ni mukleas pes lendar
gi kana ciutea len andră andă peo kher,
kerdea lenghe hamos,
peklea lenghe marno hai hales.
4 On ni sutesas
kana ăl manuș le Sodomake,
phure hai i tărne,
înkonjurisardes lesko kher,
saoră gene kabor sas gi koleste palal.
5 Dine mui le Lotos hai phende leske:
„Kai si ăl manuș kai avile tute pe reat?
Înkal len amenghe avri te sovas lența!”
6 O Lot înklistos lende avri,
hai phandadeas o udar pala peste
7 hai phendeas:
„Phralale,
rughiv man tumende,
na keren kadav nasulimos!
8 Si man dui ceia barea
kai ni gianen murșăstar.
Si te anav len tumenghe avri,
keren lența so kamen!
Ta na keren khanci kadal manușănghe
kai avile andă muro kher!”
9 „De tut rigate!
De tut rigate!”
„Kadav manuș avilo te beșel kate sar străino
hai kamel te avel amaro krisari?
Akanak si te keras tuke mai nasul sar lenghe!”
Dine brînci le Lotos hai pașile te pharaen o udar.
10 Ăl dui manuș tinzosardes o vast
hai țîrde le Lotos peste andră ando kher,
hai phandades o udar.
11 Le manușăn kai sas avri ko udar le kheresko
korardea len katar o mai țîino gi ko phuro,
hai on mardeonas te arakhen o udar.
12 Ăl manuș andral pușle le Lotos:
„Kon mai si tute kate?
Giamutre,
ciave,
ceia hai sea so si tut ando foro,
înkal len anda kadava than,
13 kă si te hasaras kadava than.
Kă areslos lengo nasulimos
ăk baro rovimos angla o Rai,
kodolaske dinea amen drom o Rai,
te mudaras len.”
14 O Lot înklistos hai dineas duma pe giamutrența
kai lilesas leske ceian:
„Ușten,
înklen anda kadav than,
kă o Rai si te mudarel kadav foro!”
Dar leske giamutre pakeanas kă ov kerel pereasa.
15 Kana kerdineailos ghes
ăl îngerea zorisardes le Lotos phenindos:
„Uști,
le ke romnea
hai i ke duie ceian kai si kate,
ta na meres i tu ando nasulimos le forosko!”
16 Kana ăl dui manuș dikhles kă o Lot mai beșelas,
liles vastendar les,
leske romnea hai leske ceian,
kă o Rai kamelas te hastravel len.
Înkalade len avri,
hai mukles len avri anda o foro.
17 Pala soste înkaladea len avri,
iekh anda lende phendeas:
„Hastra keo giuvindimos!
Ta na dikhes palal,
hai ta na beșes
andă nici ăk than anda kadai Har!
Te areses ko plai ta na meres!”
18 O Lot phendea lenghe:
„O na,
Raia!
19 Ita kă arakhlem miștimos angla tute
hai sikadean ăk bari mila anda mande,
înkearindos man te traiv.
Me ni daștiv te aresav ko plai,
kă aresel man o nasulimos hai merav.
20 Dikh kadav foro
si kadea dă pașă te giav andă leste,
hai si i țîino ov!
Te daștivas te nașav othe!
Si kadea dă țîino!
Hai traiv!”
21 „Dikh,
kerav sar tu manghes,
nai te mudarav kadava foro kai tu phenes.
22 Naș sigo andă leste,
kă ni daștiv te kerav khanci
gi kana aresesa othe!”
Anda kodoia
ciuteas o anav kodole foroske Țoar.
23 Înklelas o kham pe phuv
kana o Lot areslos ko Țoar.
24 Hai o Rai kerdeas
te del brîșînd ande Gomora hai Sodoma pucioasasa hai iagasa
katar o Rai anda o ceri.
25 Hai phabardeas kodol foruri,
saoră Har,
saoră manușăn andăl foruri
hai sea so bareoleas pe phuv.
26 E romni le Lotoski dikhleas pala peste
hai kerdilis bar lonesko.
27 O Avraam uștilo de tehara andai reat,
hai ghelos ko than kai beșleas angla o Rai
28 hai dikhleas karing e Sodoma hai e Gomora
hai karing saoră Har.
Hai ov dikhelas sar vazdelas pes pa-i phuv ăk thuv,
sar ăk thuv andak bov.
29 Kana o Del mudardeas ăl foruri le Hareake,
deas peske goghi ko Avraam,
hai hastradea le Lotos anda o mașkar le iagako,
kă pereadeas andal temeli ăl foruri
kai o Lot kerdeasas pi șatra.
O bezeh kai kerde les ăl ceia le Lotoske
30 O Lot înklisto anda o Țoar
hai acilos po plai pe duie ceianța,
kă darailos te beșel ando Țoar.
Beșles andăk peștera pire ceianța.
31 E mai bari phendea le mai tărneake:
„Amaro dad si phuro
hai katar mai nai nici ăk murș
te avel amende pala o obicei andă saoră thema.
32 Hai te das amare dades te pel mol,
hai te sovas lesa
kaște daștil te avel amen ciave katar amaro dad!”
33 Ande reat kodoia dineas pe dades te pel mol,
hai e mai bari ghelis hai sutis pe dadesa.
Ov ni giangleas nici kana sutis oi
hai nici kana uștilis.
34 Koaver ghes e mai bari phendea le mai tărneake:
„Dikh,
e reat kai nakhlis me sutem mîră dadesa.
Hai te das le mol te pel i andă kadai reat,
hai gia i tu te soves lesa,
te avel amen ciave katar amaro dad!”
35 Kerde les i e reat kodoia te pel mol,
pala kodoia e mai tărni ghelis
hai sutis lesa.
Ov ni giangleas nici kana sutis
hai nici kana uștilis.
36 Ăl dui ceia le Lotoske acile khamnea katar lengo dad.
37 E mai bari biandeas ăk ciavo
kai ciutea lesko anav Moab.
Ov si o dad saoră moabițiengo anda o ghes de aghes.
38 E mai tărni biandeas ăk ciavo,
kai ciutea lesko anav Ben-Ami.
Ov si o dad le amorițiengo anda o ghes de aghes.