🏠 <     Alfabeto le literasa „c”     Alfabeto le literasa „k”
  <     Ʒeneza     20     >  
O Del ni muklǎs le Abimelekos te kerel bezex
20
1 O Avraam telǎrdǎs othar anθ-o Them le Sudosqo.
Aćhilos maśkar äl thana o Kadeś haj o Śur,
haj othe beślos sar sträjno anθ-o Gerar.
2 O Avraam phendǎs anθa-i Sara lesqi rromni:
— Si mïrï phej.
O Abimelek,
o thagar le Geraqo dinǎs drom
haj lilǎs le Sara.
3 Atunć o Del sikadilos e rǎt anθ-äk suno le Abimelekosqe,
haj phendǎ lesqe:
— Ita si te meres anθa-i kauza le ʒuvlǎqi
kaj lilǎn lan,
kä si e rromni äk rromesqi!
4 O Abimelek,
kaj ni paślosas laθe,
phendǎs:
— Devlǃa,
mudares tu ćaćes äk njamo kaj naj dośalo?
5 Ni phendǎ manqe ov kä si lesqi phej?
Haj ni phendǎs oj korkoro
kä ov si laqo phral?
Me kerdem buki ileça uźo haj le vastença bidośale.
—
6 I me ʒanav kä kerdǎn buki ileça uźo,
kodolasqe ferisardem tut
te na keres bezex kontra Mïrï.
Ita kodolasqe ni muklem tut te paśos laθe.
7 Akanak de le rromes lesqe rromnǎ palpale,
kä ov si prooroko.
Si te rugil pes anθa tuθe,
si te trais.
Dar kana ni desa lan palpale,
te ʒanes ćaćes kä si te meres,
tu haj sǎ so si kiro.
8 O Abimelek uśtilos de texara anθa-i rǎt,
haj dinǎ muj saorä manuśän pire.
Kana phendǎ lenqe sǎ so kerdinǎjlos,
äl manuś kodola darajles zurales.
9 O Abimelek dinǎs muj le Avraamos
haj phendǎ lesqe:
— So kerdǎn manqe?
So bezex kerdem me kontra kiri,
da kerdǎn te avel pesθe manθe haj muro thagarimos
äk bezex kadǎ dä baro?
Kerdǎn karing manθe buki kaj ni träbulas kerdi.
10 So dikhlǎn da kerdǎn kadaj buki?
11 O Avraam boldǎs palpale:
— Phenavas manqe,
anθä kav them naj dar kaθar o Del,
haj si te mudaren man
anθa-i kauza mïrä rromnǎqi.
12 Aver felo si ćaćes kä si mïrï phej,
e ćhej mïrä dadesqi.
Numa kä naj e ćhej mïrä daqi,
haj aresli te avel manqe rromni.
13 Haj kana o Del ïnkaldǎ man
anθa o kher mïrä dadesqo,
phendem le Saraqe:
«Te keres manqe kav miśtimos:
anθä saorä thana kaθar phirasa,
te phenes anθa manθe kä sem kǒ phral!»
14 O Abimelek lilǎs brakhǎ haj guruva,
robi haj roabe,
haj dinǎ len le Avraamosqe,
haj dinǎ les palpale i lesqe rromnǎ,
le Sara.
15 O Abimelek phendǎs:
— Ita,
muro them si angla tuθe,
beś kaj tu kames!
16 Haj le Saraqe phendǎs:
— Ita,
dav ke phrales äk mia rupǎ.
Kadala te avel äk dovada kä san uźi,
angla sǎ kaj si tuça,
kadǎ kä angla sǎ tu san bi dośaqo.
17 O Avraam rugisajlos le Devlesqe,
haj o Del sastǎrdǎs le Abimelekos,
lesqe rromnǎ haj i lesqe roaben,
kadǎ kä daśtinas te bianen.
18 Käć o Raj phanglǎsas saorä pïntećǎ ʒuvlǎnqe
anθa o kher le Abimelekosqo anθa-i kauza le Saraqi,
e rromni le Avraamosqi.