O Del ni mucleas le Abimelecos te cherel bezeh
20
1 O Avraam teleardeas othar ando Them le Sudosco.
Acilos mașcar ăl thana o Cadeș hai o Șur,
hai othe beșlos sar străino ando Gherar.
2 O Avraam phendeas andai Sara leschi romni:
— Si mîrî phei.
O Abimelec,
o thagar le Gheraco dineas drom
hai lileas le Sara.
3 Atunci o Del sicadilos e reat andăc suno le Abimelecosche,
hai phendea lesche:
— Ita si te meres andai cauza le giuvleachi
cai lilean lan,
că si e romni ăc romeschi!
4 O Abimelec,
cai ni pașlosas late,
phendeas:
— Devla,
mudares tu ciaces ăc neamo cai nai doșalo?
5 Ni phendea manghe ov că si leschi phei?
Hai ni phendeas oi corcoro
că ov si laco phral?
Me cherdem buchi ilesa ujo hai le vastența bidoșale.
—
6 I me gianav că cherdean buchi ilesa ujo,
codolasche ferisardem tut
te na cheres bezeh contra Mîrî.
Ita codolasche ni muclem tut te pașos late.
7 Acanac de le romes lesche romnea palpale,
că ov si prooroco.
Si te rughil pes anda tute,
si te traiis.
Dar cana ni desa lan palpale,
te gianes ciaces că si te meres,
tu hai sea so si chiro.
8 O Abimelec uștilos de tehara andai reat,
hai dinea mui saoră manușăn pire.
Cana phendea lenghe sea so cherdineailos,
ăl manuș codola darailes zurales.
9 O Abimelec dineas mui le Avraamos
hai phendea lesche:
— So cherdean manghe?
So bezeh cherdem me contra chiri,
da cherdean te avel peste mande hai muro thagarimos
ăc bezeh cadea dă baro?
Cherdean caring mande buchi cai ni trăbulas cherdi.
10 So dichlean da cherdean cadai buchi?
11 O Avraam boldeas palpale:
— Phenavas manghe,
andă cav them nai dar catar o Del,
hai si te mudaren man
andai cauza mîră romneachi.
12 Aver felo si ciaces că si mîrî phei,
e cei mîră dadeschi.
Numa că nai e cei mîră dachi,
hai aresli te avel manghe romni.
13 Hai cana o Del încaldea man
anda o cher mîră dadesco,
phendem le Sarache:
«Te cheres manghe cav miștimos:
andă saoră thana catar phirasa,
te phenes anda mande că sem cheo phral!»
14 O Abimelec lileas brachea hai guruva,
robi hai roabe,
hai dinea len le Avraamosche,
hai dinea les palpale i lesche romnea,
le Sara.
15 O Abimelec phendeas:
— Ita,
muro them si angla tute,
beș cai tu cames!
16 Hai le Sarache phendeas:
— Ita,
dav che phrales ăc mia rupea.
Cadala te avel ăc dovada că san uji,
angla sea cai si tusa,
cadea că angla sea tu san bi doșaco.
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)