Ʒeneza 17

O phanglimos maśkar o Del haj o Avraam

1 Kana le Avramos sas ïnǎdeśa haj ïnǎ bärś,

o Raj sikadilo le Avramosqe haj phendǎs:

— Me sem o Del o Maj Zuralo,

phir angla manθe bi dośaqo!

2 Haj si te kerav äk phanglimos

maśkar manθe haj maśkar tuθe,

haj si te barǎrav tut but maj but.

3 O Avram ćhudǎ pes le moça ke phuv.

Haj o Del dǎ lesqe duma kadǎ:

—

4 Dikh muro phanglimos kaj kerav les tuça:

Si te aves o dad bute njamurenqo.

5 Naj te maj bućhos Avram,

haj si te bućhos Avraam,

kä kerdem tut te aves o dad bute njamurenqo.

6 Si te barǎrav tut but maj but,

si te kerav anθa tuθe but njamuri,

haj anθa tuθe va ïnklena thagara.

7 Si te ïnkǎrav muro phanglimos

maśkar manθe haj maśkar tuθe

haj ke ćhave kaj avena pala tuθe,

anθ-äk njamo anθä aver njamo.

Kadava si te avel muro phanglimos veśniko,

kaśte avav kiro Del

haj ke ćhavenqo kaj aven pala tuθe.

8 Tuqe haj ke ćhavenqe pala tuθe

si te dav o them kaj beśes akanak sar sträjno,

saorä Them Kanaan te avel tumaro veśniko,

haj me si te avav lenqo Del.

9 Haj o Del maj phendǎs le Avraamosqe:

— Te ïnkǎres muro phanglimos,

tu haj ke ćhave pala tuθe

anθ-äk njamo anθä aver njamo!

10 Kadava si muro phanglimos

kaj te ïnkǎres les maśkar manθe haj tumenθe

haj kire ćhave kaj avena pala tuθe:

sǎ so si rig murśani maśkar tumenθe

te aven ćhinde tele.^a

11 Te aven ćhinde anθ-o mas tele,

haj kadava te avel o semno phanglimasqo

maśkar manθe haj tumenθe!

12 K-o phurimos le oxto gesenqo,

o ćhavo de rig murśani anθa tumenθe

te avel ćhindo tele

anθ-äk njamo anθä aver njamo,

i kä si robo biando anθ-o kher,

i kä si kindo lovença kaθar äk sträjno

kaj naj anθa kiro njamo!

13 Si musaj te avel ćhinde tele kadikita

o robo biando anθa o kher,

kabor kova kindo pä lovenθe.

Haj kadǎ muro phanglimos

te avel zurǎrdo anθä tumaro mas,

sar äk phanglimos veśniko.

14 Äk murś kaj naj ćhindo anθ-o mas tele

te avel durǎrdo anθa o maśkar pe njamosqo!

Uśtǎdǎs muro phanglimos.

15 O Del phendǎ le Avraamosqe:

— Te na maj xakǎres ke rromnǎ Saraj,

laqo anav si te avel Sara!

16 Me si te binekuvintiv lan,

si te dav tut äk ćhavo anθa laθe,

haj si te binekuvintiv lan,

haj si te avel e dej bute njamurenqi.

I thagara njamurenqe si te ïnklen anθa laθe.

17 O Avraam ćhudǎ pes le moça ke phuv,

haj asaja anθä pǒ ilo haj phendǎs:

— Te maj biandol äk ćhavo manuśäsqe

äk śälaqo bärś?

Maj daśtil te bianel e Sara

k-äl ïnǎdeśa bärś?

18 Haj phendǎ le Devlesqe:

— Te ʒuvindil o Ismael angla tuθe!

19 O Del phendǎ lesqe:

— Ćaćimaça ki rromni e Sara

si te bianel tuqe äk ćhavo

haj si te ćhus lesqo anav Isak.

Me si te ïnkǎrav muro phanglimos leça

sar äk phanglimos veśniko,

anθä lesqe ćhave pala lesθe.

20 Haj anθa o Ismael aśundem tut,

binekuvintiv les,

si te kerav te barǒl

haj si te barǎrav les but maj but.

Si te avel o dad deśuduje thagarenqo.

Si te avel äk njamo baro.

21 Dar muro phanglimos si te ïnkǎrav les le Isakoça,

savo si te bianel les e Sara

ʒi bärśä ke vremǎ kadaja.

22 Pala so dinǎs duma leça o Del,

vazdinǎjlos kaθar o Avraam.

23 O Avraam lilǎs pe ćhaves le Ismaelos,

haj saorän kaj biandile anθä lesqo kher

haj saorä robi kaj sas kinde pä lovenθe,

sǎ so sas murś anθ-o kher le Avraamosqo,

haj anθä kodova ges ćircumsisardǎ len,

ćhindǎ len anθä lenqo mas tele,

kadǎ sar porunćisardǎ lesqe o Del.

24 Le Avraamos sas les ïnǎdeśa haj ïnǎ bärś

kana sas ćhindo anθä piro mas tele.

25 Haj lesqe ćhaves le Ismaelos

sas les deśutrin bärś

kana sas ćhindo anθä piro mas tele.

26 O Avraam haj pǒ ćhavo o Ismael

sas ćhinde tele kjar anθ-o ges kodova.

27 Haj saorä manuśa anθa lesqo kher,

robi biande anθä lesqo kher

sau kinde pä lovenθe kaθar äl sträjnǎ,

on sas ćhinde tele anθ-äk than leça.