O phanglimos mașcar o Del hai o Avraam
17
1 Cana le Avramos sas îneadeșa hai înea bărș,
o Rai sicadilo le Avramosche hai phendeas:
— Me sem o Del o Mai Zuralo,
phir angla mande bi doșaco!
2 Hai si te cherav ăc phanglimos
mașcar mande hai mașcar tute,
hai si te barearav tut but mai but.
3 O Avram ciudea pes le mosa che phuv.
Hai o Del dea lesche duma cadea:
—
4 Dich muro phanglimos cai cherav les tusa:
Si te aves o dad bute neamurengo.
5 Nai te mai bucios Avram,
hai si te bucios Avraam,
că cherdem tut te aves o dad bute neamurengo.
6 Si te barearav tut but mai but,
si te cherav anda tute but neamuri,
hai anda tute va înclena thagara.
7 Si te închearav muro phanglimos
mașcar mande hai mașcar tute
hai che ciave cai avena pala tute,
andăc neamo andă aver neamo.
Cadava si te avel muro phanglimos veșnico,
caște avav chiro Del
hai che ciavengo cai aven pala tute.
8 Tuche hai che ciavenghe pala tute
si te dav o them cai beșes acanac sar străino,
saoră Them Canaan te avel tumaro veșnico,
hai me si te avav lengo Del.
9 Hai o Del mai phendeas le Avraamosche:
— Te încheares muro phanglimos,
tu hai che ciave pala tute
andăc neamo andă aver neamo!
10 Cadava si muro phanglimos
cai te încheares les mașcar mande hai tumende
hai chire ciave cai avena pala tute:
sea so si rig murșani mașcar tumende
te aven cinde tele.a
11 Te aven cinde ando mas tele,
hai cadava te avel o semno phanglimasco
mașcar mande hai tumende!
12 Co phurimos le ohto ghesengo,
o ciavo de rig murșani anda tumende
te avel cindo tele
andăc neamo andă aver neamo,
i că si robo biando ando cher,
i că si chindo lovența catar ăc străino
cai nai anda chiro neamo!
13 Si musai te avel cinde tele cadichita
o robo biando anda o cher,
cabor cova chindo pă lovende.
Hai cadea muro phanglimos
te avel zureardo andă tumaro mas,
sar ăc phanglimos veșnico.
14 Ăc murș cai nai cindo ando mas tele
te avel dureardo anda o mașcar pe neamosco!
Ușteadeas muro phanglimos.
15 O Del phendea le Avraamosche:
— Te na mai hacheares che romnea Sarai,
laco anav si te avel Sara!
16 Me si te binecuvintiv lan,
si te dav tut ăc ciavo anda late,
hai si te binecuvintiv lan,
hai si te avel e dei bute neamurenghi.
I thagara neamurenghe si te înclen anda late.
17 O Avraam ciudea pes le mosa che phuv,
hai asaia andă peo ilo hai phendeas:
— Te mai biandol ăc ciavo manușăsche
ăc șălaco bărș?
Mai daștil te bianel e Sara
căl îneadeșa bărș?
18 Hai phendea le Devlesche:
— Te giuvindil o Ismael angla tute!
19 O Del phendea lesche:
— Ciacimasa chi romni e Sara
si te bianel tuche ăc ciavo
hai si te cius lesco anav Isac.
Me si te închearav muro phanglimos lesa
sar ăc phanglimos veșnico,
andă lesche ciave pala leste.
20 Hai anda o Ismael așundem tut,
binecuvintiv les,
si te cherav te bareol
hai si te barearav les but mai but.
Si te avel o dad deșuduie thagarengo.
Si te avel ăc neamo baro.
21 Dar muro phanglimos si te închearav les le Isacosa,
savo si te bianel les e Sara
gi bărșă che vremea cadaia.
22 Pala so dineas duma lesa o Del,
vazdineailos catar o Avraam.
23 O Avraam lileas pe ciaves le Ismaelos,
hai saorăn cai biandile andă lesco cher
hai saoră robi cai sas chinde pă lovende,
sea so sas murș ando cher le Avraamosco,
hai andă codova ghes circumsisardea len,
cindea len andă lengo mas tele,
cadea sar poruncisardea lesche o Del.
24 Le Avraamos sas les îneadeșa hai înea bărș
cana sas cindo andă piro mas tele.
25 Hai lesche ciaves le Ismaelos
sas les deșutrin bărș
cana sas cindo andă piro mas tele.
26 O Avraam hai peo ciavo o Ismael
sas cinde tele chear ando ghes codova.
27 Hai saoră manușa anda lesco cher,
robi biande andă lesco cher
sau chinde pă lovende catar ăl străinea,
on sas cinde tele andăc than lesa.
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)