🏠 <     Alfabeto le literasa „c”     Alfabeto le literasa „k”
  <     Ʒeneza     18     >  
Trin manuś aviles k-o Avraam
18
1 O Raj sikadilos le Avraamosqe
k-äl bare steźarǎ le Mamresqe,
kana ov beśelas anθ-o muj le kortosqo
p-o baro tatimos le gesesqo.
2 Ov vazdǎs pe jakha opre
haj dikhlǎs trin manuś
kaj beśenas anθä pïrnenθe,
paśa lesθe.
Kana ov dikhlǎ len kaθar o muj le kortosqo,
naślos angla lenθe,
bangilos ʒi ke phuv
3 haj phendǎs:
— Muro Raj,
akanak kana sem laćho angla tuθe,
rugiv tut ta na nakhes paśa kǒ robo!
4 Muk,
rugiv tut,
te anav äk cïra paj
te thoven tumare pïrne,
haj beśen tela kav steźari!
5 Te anav äk kotor marno te zuralen tumare ile!
Pala kodoja dikhen kaθar tumaro drom,
päće dikhena tumare robos!
— Ker sar phendǎn!
6 O Avraam gelos sigo anθ-o korto ke Sara
haj phendǎs:
— Le sigo trin gärnici aräsqe,
aro parno,
främïntisar len haj ker bokolǎ!
7 Haj o Avraam naślos k-äl animalǎ
haj lilǎs äk guruv tärno haj laćho,
kaj dinǎ les kä äk sluga
te kerel les sigo xamos.
8 Pala kodoja lilǎs thud haj kiral
anθ-äk than le guruveça le tärneça
kaj sas kerdo xamos
haj ćhutǎ len angla lenθe.
Ov beślos paśa lenθe tala o steźari
ʒi kana on xales.
9 Pala kodoja on phende lesqe:
— Kaj si kiri rromni e Sara?
— Okote anθ-o korto.
—
10 Ʒi bärśä ke vremǎ kadaja
si te avav palpale tuθe
haj dikh,
e Sara,
kiri rromni si te avel lan äk ćhavo.
E Sara aśundǎs pala o muj le kortosqo.
11 O Avraam haj e Sara sas phure,
but bärśenqe.
Le Saraqe ni maj avelas laqe sar le ʒuvlǎnqe.
12 E Sara asajas anθä pesθe haj phendǎs:
— Akanak k-äl phurimata
te maj avel man e bukuria le ćhavenqi?
Muro rrom o raj,
i ov si phuro!
13 Haj o Raj phendǎ le Avraamosqe:
— Sosθe phendǎs e Sara asandos:
«Si ćaćes te maj bianav?
Me sem phuri!»
14 Si dak buki phari angla o Raj?
Ke vremǎ kaj phendem,
me avav palpale tuθe
haj le Sara si te avel lan äk ćhavo.
15 Haj e Sara ni prinʒandǎs haj phendǎs:
— Ni asajem!
— kä sas laqe dar.
Haj ov phendǎs:
— Ni,
kä asajan.
O Avraam rugil le Devles
16 Äl manuś uśtile opre othar te telǎren,
haj dikhles tele karing e Sodoma,
haj o Avraam gelos te nakhavel len.
17 Haj o Raj phendǎs:
— Te garavav me kaθar o Avraam
so si te kerav?
18 O Avraam si te aresel äk njamo baro haj zuralo
haj si te avel binekuvintime anθä lesθe
saorä manuś pa-i phuv.
19 Aleʒisardem le Avraamos
kä si te sikavel pe ćhaven haj i lenqe ćhaven
te aśunen manθar.
Kana on keren so si ćaćimos haj miśtimos,
o Raj si te kerel sǎ so ov phendǎs le Avraamosqe.
20 Haj o Raj phendǎs:
— O zbärïmos karing e Sodoma haj e Gomora barilos,
haj lenqo bezex si ćaćes kadǎ dä pharo,
21 kodolasqe si te dav man tele
haj te ʒav te dikhav kana ćaćes kerdes buki
pala o zbärïmos kaj avilos ʒi manθe.
Kana ni avela kadǎ,
si te ʒanav.
22 Äl manuś kodola duriles
haj telǎrdes karing e Sodoma.
O Avraam sa maj beślas angla o Raj.
23 O Avraam paśilos haj phendǎs:
— Ćaćes si te mudares
i le laćhes haj i le nasules anθ-äk than?
24 Kana avela anθ-o foro peinda ʒene laćhe?
Mudares len i len,
haj ni va jertisa o than kodova
anθa kola peinda ʒene laćhe
kaj si anθ-o foro?
25 Te mudares le laćhes anθ-äk than le nasuleça?
Kadǎ si te keres le laćheça sar le nasuleça?
Dur tuθar kodoj buki,
dur tuθar!
Kova kaj krisil saorï phuv
ni va kerela ov ćaćimos?
—
26 Kana arakhava peinda ʒene laćhe ande Sodoma,
si te jertiv saoro than kodova anθa lenθe.
—
27 Ïndräznisardem te dav duma le Rajeça,
kaj ni sem maj but sar äk prafo.
28 Kana maśkar kola peinda ʒene laćhe
ni avena panʒ,
mudaresa tu anθä panʒ saoro foro?
— Naj te mudarav,
kana arakhava anθ-o foro saranda haj panʒ laćhe.
—
29 Kana arakhesa numa saranda ʒene laćhe?
— Naj te mudarav anθa kodola saranda ʒene.
—
30 Te na xolǎos,
rugiv tut Raiǃa,
kana maj dava duma!
Kana arakhadona numa trǎnda ʒene laćhe?
— Naj te mudarav,
kana arakhava trǎnda ʒene laćhe.
—
31 Ita astardem te dav duma le Rajesqe.
Kana arakhadona biś ʒene laćhe?
— Naj te mudarav len anθa kodola biś.
—
32 Te na xolǎos,
rugiv tut Raiǃa,
kana me dava duma maj jekh data.
Kana arakhadona deś ʒene laćhe?
— Naj te mudarav len anθa kodola deś ʒene laćhe.
33 Pala sosθe dinǎ duma le Avraamoça,
o Raj telǎrdǎs,
haj o Avraam boldinǎjlo palpale kä pǒ kher.