O Del ni mukleas le Abimelekos te kerel bezeh
20
1 O Avraam teleardeas othar ando Them le Sudosko.
Acilos mașkar ăl thana o Kadeș hai o Șur,
hai othe beșlos sar străino ando Gherar.
2 O Avraam phendeas andai Sara leski romni:
„Si mîrî phei.”
O Abimelek,
o thagar le Gherako dineas drom
hai lileas le Sara.
3 Atunci o Del sikadilos e reat andăk suno le Abimelekoske,
hai phendea leske:
„Ita si te meres andai kauza le giuvleaki
kai lilean lan,
kă si e romni ăk romeski!”
4 O Abimelek,
kai ni pașlosas late,
phendeas:
„Devla,
mudares tu ciaces ăk neamo kai nai doșalo?
5 Ni phendea manghe ov kă si leski phei?
Hai ni phendeas oi korkoro
kă ov si lako phral?
Me kerdem buki ilesa ujo hai le vastența bidoșale.”
6 „I me gianav kă kerdean buki ilesa ujo,
kodolaske ferisardem tut
te na keres bezeh kontra Mîrî.
Ita kodolaske ni muklem tut te pașos late.
7 Akanak de le romes leske romnea palpale,
kă ov si prooroko.
Si te rughil pes anda tute,
si te traiis.
Dar kana ni desa lan palpale,
te gianes ciaces kă si te meres,
tu hai sea so si kiro.”
8 O Abimelek uștilos de tehara andai reat,
hai dinea mui saoră manușăn pire.
Kana phendea lenghe sea so kerdineailos,
ăl manuș kodola darailes zurales.
9 O Abimelek dineas mui le Avraamos
hai phendea leske:
„So kerdean manghe?
So bezeh kerdem me kontra kiri,
da kerdean te avel peste mande hai muro thagarimos
ăk bezeh kadea dă baro?
Kerdean karing mande buki kai ni trăbulas kerdi.
10 So dikhlean da kerdean kadai buki?”
11 O Avraam boldeas palpale:
„Phenavas manghe,
andă kav them nai dar katar o Del,
hai si te mudaren man
andai kauza mîră romneaki.
12 Aver felo si ciaces kă si mîrî phei,
e cei mîră dadeski.
Numa kă nai e cei mîră daki,
hai aresli te avel manghe romni.
13 Hai kana o Del înkaldea man
anda o kher mîră dadesko,
phendem le Sarake:
‘Te keres manghe kav miștimos:
andă saoră thana katar phirasa,
te phenes anda mande kă sem keo phral!’ ”
14 O Abimelek lileas brakhea hai guruva,
robi hai roabe,
hai dinea len le Avraamoske,
hai dinea les palpale i leske romnea,
le Sara.
15 O Abimelek phendeas:
„Ita,
muro them si angla tute,
beș kai tu kames!”
16 Hai le Sarake phendeas:
„Ita,
dav ke phrales ăk mia rupea.
Kadala te avel ăk dovada kă san uji,
angla sea kai si tusa,
kadea kă angla sea tu san bi doșako.”
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)