🏠 <     Alfabeto le literasa „c”     Alfabeto rromano o internacionalo
5
1 O Kristos dineas amaro drom te avas slobozi,
kadea acion zurale,
hai na mai bangheon pale
tala o jugo le robeako.
O cinimos tele kerel tut robo le Krisako
2 Așunen,
me o Pavelo phenav tumenghe,
kana cinen tumen tele,
o Kristos nai te mai avel tumenghe lacio kathinende.
3 Me gianav so phenav,
hai mai phenav orso manușăske
kai mukel pes te avel cindo tele,
trăbul te kerel sea so phenel e Kris.
4 Sen dur katar o Kristos,
tume kai kamen te phenel o Del
kă sen ciace andai Kris,
hai pelen anda o miștimos le Devlesko.
5 Kă ame abea ajukearas,
kai i gianas katar o Duho,
kă o Del si te kerel amen ciace
pentrukă ame pakeas.
6 Kă ando Kristos Isus
nici o cinimos tele,
nici o bicinimos tele nai khanci,
hai numa o pakeamos
kai sikadeol ande dragostea.
7 Tume gianas mișto!
Kon thardeas tumen
te na pakean o ciacimos?
8 Kadav tharimos
nai katar kova kai del tumen mui.
9 Ăk țîra drojdia
kerel te bareol saoră aluato.
10 Pakeav ando Rai
kă ni gîndin andă aver felo
sar me sikadem tumen.
Hai kodova kai rimol tumen
si te lel pi pokin,
orsavo si ov.
11 Me,
phralale hai pheiale,
kana phenava
kă ăl neamuri te cinen pes tele,
soste mai sem nașado?
Atunci ni mai holearelas kanikas o trușul.
12 Anda kola kai rimol tumen,
me kamav pașa o cinimos tele
on te kerdeon i famenea!
Sar te traiis ando Duho hai na ande firea e bezehali
13 Dar tume,
phralale hai pheiale,
senas dine mui katar o Del
te traiin ande libertatea.
Dar ta na keren andai kadai libertatea
ăk motivo te traiin andai firea e bezehali!
Mai mișto slujin tumenghe iekh avreske
ande dragostea!
14 Kă saoră Kris
si astardi andă iekh porunka:
„Te iubis ke pașardes sar tu iubis tut”.a
15 Dar kana dandaren tumen
hai han tumen ku sea iekh pă aver,
avel tumen grija
ta na aven mudarde iekh avrestar!
16 Me phenav:
phiren ando Duho
ta na keren so kamel e firea bezehali!
17 Kă e firea bezehali
kamel kontra le Duhoski
hai o Duho kontra le fireaki bezehali.
Kadala si kontra iekh avreske,
kadea kă ni daștin te keren so kamen.
18 Kana sen phirade katar o Duho,
ni sen talai Kris.
19 Ăl bukea le fireake bezehali gianglon pes
hai si kadala:
soven avre giuvleanța sau murșănța
kai nai lenghe,
keren bukea mahrime,
ni daștin te oprin pe gînduri ăl nasul,
20 rughin pes kă aver devla,
keren vrăjitoria,
si lenghe holea,
mardeon,
si lenghe holi păl bukea kai nai lenghe,
țipin,
kamen numa anda peste,
dureon iekh avrestar,
han pes,
21 kamen so si avreske,
mudaren avren,
mateon,
han,
pen
hai kurvin mașkar peste,
hai keren aver bukea kai ameal kadalența.
Phenav tumenghe sar mai phendem,
kă kola kai keren ăl bukea kadala
nai te moștenin o Thagarimos le Devlesko.
22 Dar e roada le Duhoski si:
e dragostea,
e bukuria,
e pacea,
te îngheares ăl pharimata,
te keres o miștimos,
o lacimos,
te aves ciacio,
23 o gogheaerimos,
o oprimos le poftengo.
Nai kris kai phenel
ta na keres kadal bukea.
24 Kon si le Kristososko Isus
răstignisardeas e firea bezehali
andăk than sosa kamel hai iubil oi.
25 Kana ame traiis ando Duho
i te gias pala o Duho.
26 Ta na avas barikane,
ta na holearas iekh avres,
hai ta na kamas so si avreske.