16
O Kore haj lesqe manuś xolǎren le Rajes dar o Raj alol le manuśän kaj si ćaće
O Kore le Iceharosqo, o ćhavo le Kehatosqo anθa-l leviceśti, anθ-äk than niśte manuśänça anθa o nǎmo le Rubenosqo: o Datan haj o Abiram le Eliabosqe, haj o On le Peletosqo, uśtiles kontra le Mojsǎsqi anθ-äk than duje śälença haj peinda manuś anθa-l israelicja, anθa-l bare le poporosqe, anθa kola kaj sas alome kaθar o poporo, haj save sas manuś anaveça. On kidinǎles kontra le Mojsǎsqi haj le Aronosqi haj phende lenqe:
— Aresel tumen! Kä saoro poporo, sǎ si sfinci, haj o Raj si anθä lenqo maśkar. Sosθe vazden tume maj opre dä sar o poporo le Rajesqo?
Kana aśundǎs o Mojsǎ kadaj buki, ćhudǎ pes le moça ke phuv. Phendǎs le Koresqe haj lesqe manuśänqe:
— Texara o Raj si te sikavel kon si lesqo haj savo si sfïnto. Haj te anel les lesθe (si te anel les lesθe numa koles saves si te alol les), ita so te keren: o Korja haj saorä manuś lesqe, len pirja tämïimasqe! Texara ćhun jag anθä lenθe haj ćhun tämïja pä laθe angla o Raj! Koles saves va alola les o Raj, va avela o sfïnto. Aresel! Ćajlilem tumenθar, äl ćhave le Levesqe!
O Mojsǎ phendǎs i le Koresqe:
— Aśunen kate, äl ćhave le Levesqe! Ni aresel tumen kä o Del le Israelosqo alosardǎ tumen anθa o poporo le Israelosqo te anel tumen lesθe, te keren buki k-o than le beśimasqo le Rajesqo haj te beśen angla o poporo kaśte sluźin lesqe? 10 Ni aresel tumen kä andinǎ tut lesθe, tut haj saorä phralen kire, le ćhaven le Levesqe — akanak maj kamen te aven i raśaja! 11 Kodolasqe tu haj ke manuś sen kontra le Rajesqi! Na kontra le Aronosqi den duma, käć kon si ov?
12 O Mojsǎ dinǎs drom te den muj le Datanos haj le Abiramos le Eliabosqe. Dar on phendes:
— Ni ʒas. 13 Ni aresel kä ïnkaladǎn amen anθa-k them kaj thabdelas thud haj abgin, kaśte mudares amen anθ-e mulani? Akanak kames i te kerdǒs o maj baro pä amenθe? 14 Haj maj but, ni ïngǎrdǎn amen anθ-äk them kaj thabdel thud haj abgin, haj ni dinǎn te perel amen fiosaven phuja haj reza! Pakes kä daśtis te les äl jakha le manuśänqe? Ni ʒas!
15 O Mojsǎ xolǎjlo nasul haj phendǎs le Rajesqe:
— Na le lenqo daro! Ni lem nić äk xär anθa lenqo, haj ni kerdem nasul kanikasqe anθa lenqe!
16 O Mojsǎ phendǎs le Koresqe:
— Tu haj ke manuś texara te aven angla o Raj, tu haj on anθ-äk than le Aronoça! 17 Len tumenqe fiosavo piri tämïjasqi, ćhun tämïja anθä la, haj anen fiosavo angla o Raj tumari piri; duj śäla haj peinda pirja tämïimasqe! Tu haj o Aron te len fiosavo tumari piri tämïimasqi!
18 Kadǎ kä liles fiosavo pi piri tämïimasqi, ćhutes jag anθä la, ćhute tämïja pä la, haj beśles k-o udar le kortosqo le malaimasqo, anθ-äk than le Mojsǎça haj le Aronoça. 19 O Kore dinǎ muj saoro poporo kontra le Mojsǎsqi haj le Aronosqi k-o udar le kortosqo le malaimasqo. Haj e slava le Rajesqi sikadilis saorä poporosqe. 20 Haj o Raj phendǎs le Mojsǎsqe haj le Aronosqe:
21 Den tumen rigaθe anθa o maśkar kadal poporosqo, kaśte mudarav len anθ-äk data!
22 On ćhudes pes le moça ke phuv haj phendes:
— Devl!a, Devl!a, savo des phurdimos saorän so train! Kana si äk manuś kaj kerel bezex, ćaćes si te xolǎos kontra saorä poporosqi?
23 O Raj phendǎs le Mojsǎsqe:
24 Phen le poporosqe: «Telǎren kaθar o korto le Koresqo, le Datanosqo haj le Abiramosqo!»
25 O Mojsǎ gelos sigo k-o Datan haj k-o Abiram, haj äl phure le Israelosqe geles pala lesθe. 26 Phendǎs le poporosqe:
— Durǒn kaθar äl korturh kadal manuśänqe dośale haj na ćhun o vast pä khanćesθe so si lenqo, ta na aven śïlade anθa saorä bezexa lenqe!
27 On telǎrdes kaθar beśenas o Kore, o Datan haj o Abiram. O Datan haj o Abiram ïnklistes avri haj beśenas k-o udar pe korturenqo, pe rromnǎnça, pe ćhavença haj pe cïjnoränça. 28 O Mojsǎ phendǎs:
— Kadǎ va prinʒanena kä o Raj dinǎ man drom te kerav saorä bukja kadala, haj ni kerav len anθa muro śäro: 29 Kana äl manuś kadala va merena sar meren saorä manuś, kana va avela len soarta sar saorä manuśän, ni dinǎ man drom o Raj. 30 Dar kana o Raj va kerela äk buki nevi, kana e phuv va putrela pǒ muj haj va ïngicila len ku sǎ so si len, haj kadǎ va ʒana dä ʒuvinde anθ-o kher le mulenqo – atunć si te ʒanen kä äl manuś kadala ni ïnkǎrdes konto kaθar o Raj.
31 Kana ni maj dinǎs duma, e phuv tala lenθe pharïlis. 32 E phuv putardǎs pǒ muj haj ïngicisardǎs len haj lenqe famelěn, anθ-äk than saorä manuśänça le Koresqe haj sǎ so sas len. 33 Mukle pes dä ʒuvinde anθ-o kher le mulenqo, on haj sǎ so sas len, e phuv ućhardǎ len haj xasajle anθa o maśkar le poporosqo. 34 Saoro Israelo kaj sas paśa lenθe naślos kaθar lenqo cipimos, dindos muj:
— Ta na ïngicil amen e phuv!
35 Kaθar o Raj ïnklistis jag haj phabardǎs le duje śälen haj peinda manuś save anenas tämïja.
36 O Raj phendǎs le Mojsǎsqe:
37 Phen le Eleazarosqe, o ćhavo le raśajesqo o Aron, te ïnkalavel äl pirja le tämïimasqe anθa-i jag haj te ćhudel dur e jag, kä si sfincome. 38 Anθa-l pirja le tämïimasqe kadal manuśänqe save mules kä kerdes bezex: te kerdǒn niśte pläć marde te ućharen o altari haj te avel äk semno anθa-l israelicja. Kä sas andine angla o Raj, kadǎ kä si sfincome.
39 O raśaj o Eleazar lilǎs äl pirja le xarkomaqe, save andinesas len kola kaj phabiles, haj kerdiles anθa lenθe niśte pläć anθa o ućharimos le altaresqo, 40 sar phendǎsas o Raj prin o Mojsǎ. Kerdiles te anen gogi le israelicenqe, kä koniva, savo naj anθa o nǎmo le Aronosqo, ta na paśol te anel tämïja angla o Raj haj ta na merel, sar o Kore haj lesqe manuś.
41 Anθä le donqo ges saorä manuś le israelicenqe dine duma kontra le Mojsǎsqi haj kontra le Aronosqi:
— Tume mudarden le poporos le Rajesqo!
42 Kana kidinǎjlos o poporo kontra le Mojsǎsqi haj le Aronosqi, vardinas karing o korto le malaimasqo haj dikhles kä ućhardǎ les o noro haj sikadilis e slava le Rajesqi. 43 Atunća o Mojsǎ haj o Aron geles angla o korto le malaimasqo, 44 haj o Raj phendǎs le Mojsǎsqe:
45 Den tumen rigaθe anθa o maśkar kadal poporosqo te mudarav len anθ-äk data!
On ćhude pes le moça ke phuv 46 haj o Mojsǎ phendǎs le Aronosqe:
— Le e piri le tämïimasqi, ćhu jag poa altari anθä laθe, ćhu tämïja anθä la, ʒa sigo k-o poporo haj ker paćja maśkar lenθe haj o Raj! Kä o Raj si xolǎme haj ïnćeposardǎs te del dab.
47 O Aron lilǎs e piri sar phendǎsas o Mojsǎ, haj naślos anθ-o maśkar le poporosqo, haj ita kä o Raj ïnćeposardǎs te del dab anθ-o poporo. Haj tämïisardǎs haj kerdǎ so träbul te kerel paćja maśkar lenθe haj o Raj. 48 Beślos maśkar äl mule haj maśkar äl ʒuvinde, haj oprisajlos o dimos dab. 49 Deśuśtar mi haj jefta śäla manuś mules, afer dä kola kaj mules anθa sosθe kerdǎs o Kore pe manuśänça. 50 O Aron risajlos k-o Mojsǎ k-o udar le kortosqo le malaimasqo, kä oprisajlos o dimos dab.