1 Pala äk timpo, pe vremǎ kana sećerilas pes o giv, o Samson gelos te dikhel pe rromnǎ haj lilǎs peça äk jedo. Ov phendǎs:

— Kamav te ʒav kä mïrä rromni anθä laqi hodaja.

Dar laqo dad ni muklǎs les te ïntril 2 haj phendǎs:

— Ćaćes gïndisajlem kä nasul uros lan, kadǎ kä dinem lan kä jekh anθa kola kaj sas tuça. Naj kadǎ kä laqi phej e maj tärni si maj śukar laθar? Rugiv tut, le lan anθä laqo than!

3 Dar o Samson phendǎs lenqe:

— De data kadaja si te avav bi dośaqo kana kerav nasul le filistjaenge!

4 Pala kodoja o Samson gelos haj astardǎs trin śäla vulpi, lilǎs niśte torce haj phanglǎs le vulpǎn pori porjaθar po-k torcaça k-o maśkar. 5 Astardǎs äl torce haj dinǎs o drom le vulpjanqo anθ-äl giva le filistjaenge. Anθ-o felo kodova phabile äl snopi, o giv kaj maj aćhilos bikidino haj äl reza haj äl mäsline. 6 Atunć äl filisteǎ puśle:

— Kon kerdǎs e buki kadaja?

Dinǎs pes lenqe anglal:

— O Samson, o ʒamutro le manuśäsqo anθa-i Timna, anθa kodoja kä dinǎs lesqe rromnǎ kä aver.

Haj äl filisteǎ gele kontra lenqi haj dine len jag, lan haj laqe dades. 7 O Samson phendǎs lenqe:

— Kodolasqe kä kerden e buki kadaja, naj te mukav man ʒi kana ni va räzbuniva man pä tumenθe.

8 Haj mardǎs len bi milaqo,* Anθ-o oriʒinal si: „mardǎs o purno opral paj coapça”. sas äk baro mudarimos. Pala kodoja gelos haj beślos anθ-o pharaimos le stïnkaqo Etam.

9 Pala kodoja äl filisteǎ avile kontra le Samsonosqi haj ćhute pi tabära anθ-e Juda haj pharadile ʒi k-o than kaj bućhol Falka. 10 Äl murś anθa-i Juda phende:

— Sosθe avilen kontra amari?

On dine anglal:

— Avilǎm te phandas le Samsonos haj te keras lesqe sar ov kerdǎs amenqe.

11 Atunć trin mi manuś anθa-i Juda gele k-o pharaimos le stïnkaqo Etam haj puśle le Samsonos:

— Ni ʒanglǎn kä äl filisteǎ stäpïnin amen? So kerdǎn amenqe?

Ov phendǎs lenqe:

— Pala sar on kerde manqe, kadǎ kerdem lenqe i me.

12 On phende lesqe:

— Avilǎm te phandas tut te das tut anθ-o vast le filistjajenqo.

O Samson phendǎs lenqe:

— Xan manqe sovel kä naj te mudaren man tume!

13 On phende lesqe:

— Na. Numa phandas tut haj das tut anθä lenqo vast. Dar dä mudarimos naj te mudaras tut.

Haj phangle les duje śälença neve haj ïnkalade les anθa-i stïnka.

14 Kana areslos k-o than Falka, äl filisteǎ avile karing lesθe zbärïndos. Atunć o Duxo le Rajesqo avilos pä lesθe zuralimaça haj äl śäle kaj sas les k-äl vast kerdinǎjle sar pïnza phabardi anθ-e jag haj äl phanglimata pele kaθar lesqe vast. 15 Arakhlǎs äk falka xäresqi, kaj ïnkä nas śuki, lilǎs lan anθ-o vast haj laça mudardǎs äk mia murś. 16 Haj o Samson phendǎs:

17 Päće dinǎs duma, ćhudǎs e falka anθa o vast. Anθa kodoja phendǎs kodol thanesqe o Plaj le Falkaqo.

18 Pala kodoja sas lesqe bari truś haj dinǎs muj k-o Raj:

— Tu prin muro vast, kǒ robo, dinǎn kav baro xastramos, haj akanak te merav truśaθar haj te perav anθ-o vast le filistjajenqo, kaj naj ćhinde tele?

19 Haj o Del dinǎs anθä duj e groapa kaj sas anθ-o than e Falka haj ïnklistos paj anθa laθe. Päće pilǎs, o ilo le Samsonosqo revenisardǎs haj zurajlos. Kodolasqe phendǎs kodol thanesqe o Izvoro le Dimasqo Muj kaj si i ages anθ-o than Falka.

20 O Samson sas krisitori anθ-o Israelo biś bärś, kana stäpïninas äl filisteǎ.