16
O Timotej ʒal le Paveloça haj le Silaça
O Pavel gelos ke Derbe haj ke Listra. Haj ita kä othe sas äk ućeniko p-o anav Timotej, o ćhavo äk evreaqo savi pakǎlas, haj lesqo dad sas greko. Äl phral anθa-i Listra haj Ikonia denas les duma dä miśto. O Pavel kamnos ka ov te ʒal lença, haj lilǎ les haj ćhindǎ les tele anθa-i kauza le evreenqi save sas anθ-äl thana kodola. Käć sǎ ʒanenas kä lesqo dad sas greko. Kana nakhenas anθa-l foruri, sikavenas le phralen äl hotärïri lile kaθar äl apostolǎ haj äl prezbiterǎ anθa o Jerusalimo, kaśte keren len. Kadǎ kä äl khangerǎ zuraonas anθ-o pakjamos haj avenas maj but manuś anθä fiosavo ges.
O Pavel si dino muj te ʒal anθ-e Maćedonia
Nakhles anθa-i Friʒia haj o cinuto le Galaciaqo, käć sas oprime kaθar o Duxo Sfïnto te phenen o kuvïnto anθ-o cinuto le Asiaqo. Kana aresles paśa e Misia, kamnes te ʒan anθ-e Bitinia, dar o Duxo le Isusosqo ni muklǎ len. Atunć nakhles anθa-i Misia haj geles k-o Troas. Anθ-o timpo le reakjaqo, le Pavelos sas les äk dikhimos: äk manuś anθa-i Maćedonia beśelas angla lesθe haj rugilas les:
— Av anθ-e Maćedonia te aźutis amen!
10 Päće dikhlǎs kadav dikhimos, p-o than rodǎm te ʒas anθ-e Maćedonia, kä xakǎrdǎm kä o Del dinǎ amen muj te phenas lenqe e vestja e laćhi.
Anθ-o foro Filipi: e Lidia pakǎl anθ-o Isus
11 Päće telǎrdǎm anθa-i Troa, gelǎm le korabiaça orta ke Samotraćia, haj anθä o ges koaver gelǎm k-o Njapolis. 12 Othar telǎrdǎm anθ-o Filipi, savo si o maj baro foro anθa o cinuto le Maćedoniaqo, äk foro le romaenqo. Anθ-o foro kadava beślǎm trin śtar ges. 13 Anθ-o ges le Sabatosqo, ïnklistǎm avri ke poarta le forosqi, paśa äk rïuo, kaj pakǎsas kä si äk than rugäćunǎqo. Beślǎm tele haj dasas duma le ʒuvlǎnqe save sas kidine. 14 Sas äk ʒuvli p-o anav Lidia, savi bikinelas hajne purpuraqe, sas anθa o foro Tiatira, haj ïnkinolas pes le Devlesqe. Oj aśunelas haj o Raj putardǎs laqo ilo anθa sosθe phendǎs o Pavel. 15 Päće so sas boldi, oj haj laqo kher, rugisardǎ amen:
— Kana gïndin kä pakǎv anθ-o Raj, atunć aven haj beśen anθä muro kher!
Haj ni muklǎ pes amenθar ʒi kana ni phendǎm kä ʒas.
O temnićeri anθa o Filipi
16 Äk data kana ʒasas k-o than le rugimasqo, ïnklistis angla amenθe äk roaba, savǎ sas lan äk duxo drabarimasqo. Prin laqo drabarimos oj anelas but love pe stäpïnenqe. 17 E roaba kadaja lilǎ pes pala o Pavel haj pala amenθe haj delas muj:
— Äl manuś kadala si äl robi le Devlesqe le Maj Baresqe, haj on vestin tumenqe o drom le mïntuimasqo!
18 Kadǎ kerdǎs oj timpo maj bute gesenqo. O Pavel, xolǎme, boldinǎjlos haj phendǎs le duxosqe:
— Anθ-o anav le Isusosqo Kristos, porunćiv tuqe te ïnkles anθa laθe.
Haj p-o than o duxo ïnklistos.
19 Kana äl stäpïja le roabaqe dikhles kä geliθar lenqi sperança le lovenqi, ćhutes o vast p-o Pavel haj p-o Sila haj tïrïsarde len anθ-e pjaca angla äl barimata. 20 Ïngǎrde len angla äl krisitorǎ haj phendes:
— Äl manuś kadala si evrea haj tulburin but amaro foro 21 haj den duma anθa obićeǎ kaj ame save sǎm romaja, ni träbul nić te primis len nić te keras len.
22 Äl manuś kidine uśtiles i on kontra lenqi haj äl krisitorǎ ćhindes äl coale pa lenθe haj porunćisardes te maren len rajança. 23 Pala but daba ćhude len anθ-o phandaimos haj dine len anθ-e griźa le temnićerosqi te päzil len miśto. 24 Kadava primindos äk porunka kadalaθar, ćhudǎ len anθ-e ćelula anθa o maśkar haj ćhutǎ lenqe pïrne anθ-äl butućǎ.
25 Kam k-o maśkar le reakjaqo o Pavel haj o Sila ruginas pes haj gilabenas gilǎ save läudinas le Devles, haj kolaver phandade aśunenas len. 26 Anθa-k data avilos äk baro izdramos, kadǎ kä miśkjajas äl temeli le temnicaqe. P-o than putardiles saorä udara haj putardiles äl phanglimata fiosavesqe. 27 O temnićeri uśtilos anθa-i lindri, haj kana dikhlǎs äl udara le temnicaqe putarde, ïnkaladǎs e sabia haj sas te mudardǒl, käć pakǎlas kä äl phandade naśles. 28 Dar o Pavel dinǎs muj zurales:
— Ta na keres tuqe nić äk nasul, kä sǎ sǎm kathe.
29 Atunć o temnićeri manglǎs äk lumina, naślos andrä, haj izdraindos daraθar pelos k-äl pïrne le Pavelosqe haj le Silasqe. 30 Ïnkaladǎ len avri haj phendǎ lenqe:
— Mïrä raj, so träbul te kerav kaśte avav mïntuime?
31 On phende lesqe:
— Pakǎ anθ-o Raj o Isus haj va avesa mïntuime, tu haj kǒ kher.
32 Haj phende lesqe o kuvïnto le Rajesqo, kabor lesqe haj saoränqe save sas anθä lesqo kher. 33 O temnićeri lilǎ len peça kjar atunć e rǎt, thodǎs lenqe räni haj p-o than sas boldo, ov haj sǎ lesqe. 34 Päće ïngǎrdǎ len anθ-o kher, ćhutǎ lenqe e sinia. Bukurisajles saorä khereça kä pakǎjes anθ-o Del.
35 Detexara äl krisitorǎ dines drom le oficeren kaśte phenen:
— De o drom le manuśänqo kodolenqo!
36 Haj o temnićeri phendǎs le Pavelosqe:
— Äl krisitorǎ mukles vorba te del pes tumaro drom, kadǎ kä akanak daśtin te telǎren. Ʒan paćǎça!
37 Dar o Pavel phendǎ lenqe:
— Marde amen anθ-e lumǎ bi te avas krisome, amen kaj sǎm romaja,* Le romaja sas len maj but drepturi de sar kolavren. ćhude amen anθ-e temnica haj akanak ïnkalaven amen avri ćorjal! Ni ʒal pes kadǎ! Te aven on te ïnkalaven amen avri!
38 Äl oficerǎ phendes kadal vorbe le krisitorenqe. Kadala darajles kana aśundes kä si romaja. 39 Äl krisitorǎ aviles te potolin len, ïnkalade len avri anθa o phandaimos haj rugisarde len te telǎren anθa o foro. 40 Kana ïnklistes anθa o phandaimos, geles ke Lidia khere. Haj päće dikhles le phralen haj bute vorbença zurǎrde len ta na daran, telǎrdes.

*16:37 Le romaja sas len maj but drepturi de sar kolavren.