17
O Pavel haj o Sila anθ-o Tesalonik
Pala kodoja on nakhles anθa o Amfipoli haj anθa-i Apolonia haj aresles k-o Tesalonik, kaj sas äk sinagoga le evreenqi. Pala pǒ obićej, o Pavel ïntrisajlos anθ-e sinagoga. Timpo trine kurkenqo, anθä fiosavo ges Sabatosqo dinǎs duma anθa-i Skriptura le evreença phenindos haj sikaindos kä o Kristos träbulas te pätimil haj te ïnviol anθa-l mule. Haj kä „ov si o Kristos, o Isus, anθa savo phenav tumenqe”. Aver anθa lenθe pakǎjes haj nakhles anθ-e rig le Pavelosqi haj le Silasqi, anθ-äk than bute grećença save ïnkinonas pes le Devlesqe, haj na cïra ʒuvlǎ anaveça.
Dar äl evrea xolinaθar kides anθa-l pjace niśte manuś nasul, kerdes äk ćjata haj acïcosardes o foro. Nävälisardes p-o kher le Jasonosqo haj rodenas le Pavelos haj le Silas kaśte ïnkalen len avri k-äl manuś kaj sas kidine. Dar ni arakhle len othe, kadǎ kä tïrïsardes le Jasonos haj trine śtare phralen angla äl bare le forosqe haj denas muj:
— Äl manuś save tulburisardes e lumǎ aviles i kathe, haj o Jason primisardǎ len anθä pǒ kher. On sǎ keren bukǎ kontra le porunćenqi le Ćezarosqe haj phenen kä si aver thagar: o Isus.
Kana aśundes kadal bukǎ, äl manuś kidine haj äl bare le forosqe tulburisajles. Haj numa päće liles lenθar äk gaźo, dines drom le Jasonosqo haj kolavrenqo.
O Pavel haj o Sila anθ-e Berea
10 Kjar anθ-e rǎt kodoja äl phral dines drom le Pavelos haj le Silas ke Berea. Kana aresles othe, geles anθ-e sinagoga le evreenqi. 11 Kadalen sas len äk ilo maj laćho dä sar kolen anθa o Tesalonik. Sas ileça putardo te primin o kuvïnto haj anθä fiosavo ges rodenas anθ-äl Skripturi kaśte dikhen kana äl bukǎ si kadǎ. 12 Kadǎ kä pakǎjes but anθa lenθe, i but anθa-l ʒuvlǎ anaveça le grećenqe haj but murś.
13 Dar kana äl evrea anθa o Tesalonik aśundes kä o kuvïnto le Devlesqo si vestime kaθar o Pavel anθ-e Berea, geles i on othe kaśte acïcon le manuśän. 14 Atunć äl phral p-o than dine drom le Pavelos karing e marǎ, haj o Sila haj o Timotej aćhiles othe. 15 Äl manuś kaj geles le Paveloça ïngǎrde les ʒi anθ-e Atena. Pala kodoja risajles äk porunkaça karing o Sila haj karing o Timotej te aven kabor daśtin dä sigo lesθe.
O Pavel anθ-e Atena
16 Anθ-o timpo so o Pavel aźukǎrelas len anθ-e Atena, lesqo duxo pherdilos xoli dikhindos kä o foro kadava si pherdo idolǎ. 17 Kadǎ kä beśelas dä vorbä anθ-e sinagoga le evreença haj le manuśänça kaj daranas kaθar o Del, haj anθä fiosavo ges kolença kaj malavelas len anθ-e pjaca. 18 Trin śtar anθa-l filozofǎ epikurenǎ haj stoićǎ ćhute pes leça anθ-e vorba.* Äl epikurenǎ pakǎnas kä äl manuś träbul te train sar kamen. Äl stoićǎ phenenas kä träbul te akćeptis äl dukha haj äl nekazuri. Aver anθa lenθe phenenas:
— So kamel te phenel kadav manuś bi gogǎqo?
Aver phenenas:
— Parkä del duma anθa aver zea, sträiino.
Kä phendǎs e vestja e laćhi anθa o Isus haj anθa-i ïnvierǎ. 19 Atunć lile les haj ïngǎrde les k-o Aeropago Aeropago Äk than anθ-e Atena kaj kidelas pes e lumǎ haj kaj denas duma. , p-o plaj, haj phendes:
— Daśtis te ʒanas savo si o sikaimos kadava nevo anθa savo des duma? 20 Käć anes amenqe bukǎ sträiino k-äl kan, kadǎ kä kamas te ʒanas so xakǎrdǒl kadal bukǎ.
21 (Saorä atenienǎ haj äl sträiinǎ save beśenas anθ-e Atena ni kerenas aver daići numa te phenen sau te aśunen daići nevo.)
22 Atunć o Pavel uśtilos anθä pïrnenθe anθ-o maśkar le Aeropagosqo haj phendǎs:
— Manuś anθa-i Atena! Anθä sǎ dikhav tumen kä sen but smerime. 23 Käć anθ-o timpo so phiravas anθ-o foro haj dikhavas paśal k-äl bukǎ kä save ïnkinon tumen, arakhlem i äk altari pä savo si ramome: «Äk Devlesqe bi prinʒando». Ej miśto, so tume ćinstin bi te prinʒanen, kodoja vestiv tumenqe me.
24 O Del savo kerdǎs e lumǎ haj sǎ so si anθä laθe si o Raj le ćeresqo haj le phuǎqo, kadǎ kä ni beśel anθ-äl templǎ kerde kaθar äl vast le manuśänqe. 25 Ov naj sluźime vastenθar manuśänqe, sar kana afi träbulas les daići, kä ov del saorän viaca, phurdimos haj saorä bukǎ. 26 Anθa äk manuś ov kerdǎs saorä poporǎ te beśen pä saorï phuv. Ov hotärïsardǎs äl timpuri anθä save va traina haj äl thana kaj va beśena, 27 ka on te roden le Devles, kaśte arakhen les i kä kjar bïźbïin pala lesθe. Makar kä naj dur kaθar fiosavo anθa amenθe. 28 «Käć anθä lesθe trais, miśkis haj sǎm», sar phendes duj trin anθa tumare poeci: «Anθa kodoja kä i sǎm lesqe ćhave.»
29 Deć anθa kodoja kä sǎm äl ćhave le Devlesqe, ni träbul te pakǎs kä o Del si sar o sumnakaj sau o rupo sau o bar kerdo gogǎça haj gïndoça manuśäsqo. 30 O Del ni ïnkǎrdǎ sǎma kaθar äl timpuri kana äl manuś ni prinʒande les, haj akanak porunćil saorä manuśänqe anθa saorä thana te muken pes kaθar lenqo nasulimos haj te bolden pes lesθe. 31 Kä si les äk ges anθä savo va krisola e lumǎ ćaćimaça prin äk manuś saves ćhutǎ les. Haj kä les ćhutǎ les, o Del sikadǎs saorä manuśänqe kana ïnviosardǎ les anθa-l mule.
32 Kana on aśundes anθa-i ïnvierǎ le mulenqi, trin śtar marenas pesqe źoko lesθar, haj aver phendes:
— Anθa-l bukǎ kadala kamas te aśunas tut i aver data.
33 Atunć o Pavel telǎrdǎs maśkar lenθe. 34 Dar niśte manuś nakhles anθä lesqi rig haj pakǎjes. Maśkar kadala sas o Dionisie, kaj sas anθa-i kris le Aeropagosqi, äk ʒuvli p-o anav Damaris haj aver anθ-äk than lença.

*17:18 Äl epikurenǎ pakǎnas kä äl manuś träbul te train sar kamen. Äl stoićǎ phenenas kä träbul te akćeptis äl dukha haj äl nekazuri.

17:19 Aeropago Äk than anθ-e Atena kaj kidelas pes e lumǎ haj kaj denas duma.