O salmo 34
O Del phiravel griźaθar
(Äk gili le Davidosqi, kana kerdilos kä si dilo angla o Abimelek, savo gonisardǎ les, haj ov gelos.a)
1 Va binekuvintiva le Rajes anθä saoro timpo,
lesqi lauda si te avel ïntotdjauna anθä muro muj.
2 Muro ilo si te fälil pes le Rajeça!
Te aśunen äl smerime haj te bukurin pes!
3 Phenen mança kä o Raj si baro!
Te läudis ku sǎ lesqo anav!
4 Rodem le Rajes,
haj dinǎ man anglal
haj xastradǎ man anθa saorä griź mïrä.
5 Kola kaj dikhen lesθe luminil pes lenqo muj,
haj lenqo muj ni lolǒl laʒavesθar.
6 Kadav manuś smerime dinǎ muj,
haj o Raj aśundǎs
haj xastradǎ les anθa saorä nasulimata lesqe.
7 O Ïnʒero le Rajesqo päzil len anθä saorä riga kolen kaj daran lesθar,
haj xastravel len.
8 Xan haj dikhen kabor dä laćho si o Raj!
Baxtalo si o manuś savo rodel azävada lesθe!
9 Daran kaθar o Raj,
lesqe sfinci,
kä kola kaj daran lesθar ni ïngǎren lipsa khanćesqi!
10 Äl puǎ le leosqe ïngǎren lipsa haj si lenqe bokh,
dar kola kaj roden le Rajes ni ïngǎren lipsa nić äk miśtimasqi.
11 Aven mïrä ćhave,
haj aśunen man,
si te sikavav tumen so si e dar le Rajesqe!
12 Savo si o manuś kaj kamel e viaca
haj kamel äk viaca lungo te dikhel o laćhimos?
13 Atunć ferisar ki ćhib kaθar o nasul,
haj ke uśt ta na phenen xoxaimata!
14 Durǒ kaθar o nasul haj ker o miśtimos;
rode e paćǎ haj naś pala la!
15 Äl jakha le Rajesqe dikhen le ćaćen
haj lesqe kan aśunen kana den muj te xastravel len.
16 O muj le Rajesqo si kontra kolenqi kaj keren nasul
kaśte khosel e amintirja lenqi pa-i phuv.
17 Den muj äl ćaće,
haj o Raj aśunel
haj xastravel len anθa saorä nekazuri lenqe.
18 O Raj si paśä kola le ileça pharo,
haj xastravel kolen le duxoça ïnkhjardo.
19 But si äl nekazuri le ćaćesqe,
dar o Raj xastravel les anθa sǎ,
20 päzil saorä kokalǎ lesqe,
nić jekh anθa lenθe naj ïnkhjardo.
21 O nasulimos mudarel koles kaj kerel nasul,
haj kola kaj uron le ćaćes va avena pedepsime.
22 O Raj pokinel o sufleto pe robenqo,
haj nić jekh anθa kola kaj roden azävada lesθe naj te aven pedepsime.
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)