🏠 <     Alfabeto le literasa „k”     Alfabeto rromano o internacionalo
O salmo 34
O Del phiravel grijatar
(Ăc ghili le Davidoschi, cana cherdilos că si dilo angla o Abimelec, savo gonisardea les, hai ov ghelos.a)
1 Va binecuvintiva le Raies andă saoro timpo,
leschi lauda si te avel întotdeauna andă muro mui.
2 Muro ilo si te fălil pes le Raiesa!
Te așunen ăl smerime hai te bucurin pes!
3 Phenen manța că o Rai si baro!
Te lăudis cu sea lesco anav!
 
4 Rodem le Raies,
hai dinea man anglal
hai hastradea man anda saoră grij mîră.
5 Cola cai dichen leste luminil pes lengo mui,
hai lengo mui ni loleol lagiavestar.
6 Cadav manuș smerime dinea mui,
hai o Rai așundeas
hai hastradea les anda saoră nasulimata lesche.
7 O Îngero le Raiesko păzil len andă saoră riga colen cai daran lestar,
hai hastravel len.
8 Han hai dichen cabor dă lacio si o Rai!
Bahtalo si o manuș savo rodel azăvada leste!
9 Daran catar o Rai,
lesche sfinți,
că cola cai daran lestar ni înghearen lipsa chanceschi!
10 Ăl puia le leeosche înghearen lipsa hai si lenghe boch,
dar cola cai roden le Raies ni înghearen lipsa nici ăc miștimaschi.
 
11 Aven mîră ciave,
hai așunen man,
si te sicavav tumen so si e dar le Raieske!
12 Savo si o manuș cai camel e viața
hai camel ăc viața lungo te dichel o lacimos?
13 Atunci ferisar chi cib catar o nasul,
hai che ușt ta na phenen hohaiimata!
14 Dureo catar o nasul hai cher o miștimos;
rode e pacea hai naș pala la!
15 Ăl iacha le Raieske dichen le ciacen
hai lesche can așunen cana den mui te hastravel len.
16 O mui le Raiesko si contra colenghi cai cheren nasul
caște chosel e amintirea lenghi pa-i phuv.
17 Den mui ăl ciace,
hai o Rai așunel
hai hastravel len anda saoră necazuri lenghe.
18 O Rai si pașă cola le ilesa pharo,
hai hastravel colen le duhosa încheardo.
19 But si ăl necazuri le ciacesche,
dar o Rai hastravel les anda sea,
20 păzil saoră cocalea lesche,
nici iech anda lende nai încheardo.
21 O nasulimos mudarel coles cai cherel nasul,
hai cola cai uron le ciaces va avena pedepsime.
22 O Rai pochinel o sufleto pe robengo,
hai nici iech anda cola cai roden azăvada leste nai te aven pedepsime.