Galateni 3

E Cris hai o pacheamos

O Del hastravel amen cana pacheas

1 O galateni bi gogheaco!

Con thardeas tumen

ta na așunen catar o ciacimos?

Chear angla tumare iacha sas sicado

sar sas răstignime o Isus Cristos.

2 Ăc buchi camav te gianav tumendar:

Lilen o Duho

că cherden so phenel e Cris,

sau că pacheaien so așunden?

3 Ciaces sen bi gogheaco?

Pala so începosarden ando Duho,

camen acanac te termenin corcoro?

4 Nachlen anda cadichita anda chanceste?

Camavas te na fi sas anda chanceste.

5 Deci cadea:

Ov dineas tumen o Duho

hai cherdeas minuni mașcar tumende,

pentrucă cherden so phenel e Cris,

sau pentrucă pacheaien so așunden?

6 Sa cadea o Avraam

„pacheaias ando Del hai sas socotime ciacio.”^a

7 Deci te gianen că ăl ciave le Avraamosche

si numa cola cai pachean.

8 Dar e Scriptura ramosardeas anda aver neamuri

că atunci cana pacheana,

o Del va phenela anda lende

că si ciace,

hai phendeas le Avraamosche e vestea lacii:

„Andă tute si te aven binecuvintime saoră neamuri.”^b

9 Cadea că cola cai si len pacheamos,

si binecuvintime andăc than le Avraamosa,

o manuș le pacheamasco.

10 Căci cola cai pachean că ajutil len

cana cheren so phenel e Cris,

si talai armai,

că si ramome:

„Dino armaia si orcon ni cherel saoră ilesa

saoră buchea cai si ramome ando lil le Crisaco.”^c

11 Dar si ciaces

că o Del ni phenel chanicasche

că si ciacio andai Cris,

numa „cova o ciacio

si te traiil anda o pacheamos”.^d

12 E Cris ni beșel po pacheamos,

dar „cova cai cherel ăl buchea so oi phenel,

va traiila anda lende”.^e

13 O Cristos chindeas amen andai armai le Crisachi,

ciuteas pes ando than amaro ande armai

(că si ramome:

„Dino armaia si cova cai atîrneal po cașt”),^f

14 ca e binecuvîntarea le Avraamoschi

te avel avre neamurenghe

anda o Cristos Isus,

hai anda o pacheamos

te las o Duho savo sas făgăduiime.

E Cris ni daștil te rimol e făgăduința

15 Phralale hai pheiale,

cana phenava tumenghe cadea,

hachearen?

Ăc phanglimos manușăsco,

ăc data zureardo,

conic ni daștil te mai putrel les,

nici te mai ciul daicii.

16 Dar e făgăduința sas cherdi

le Avraamosche hai lesche „ciavesche”.

Nai ramome^g „hai le ciavenghe”

sar anda butende

– hai ramol sar anda iech corcoro:

„hai che ciavesche”,

savo si o Cristos.

17 Cadaia phenav că e Cris,

cai avilis pala ștar șăla hai treanda bărș mai palal,

ni daștil te putrel o phanglimos,

cai sas zureardo catar o Del

mai anglal.

E Cris ni daștil te rimol e făgăduința.

18 Cana e moștenirea lelas pes

cherindos so manghel e Cris,

ni mai avel andai făgăduința,

dar o Del dineas lan

le Avraamosche ande făgăduința.

19 Atunci soste si e Cris?

Oi sas ciutini te împedechil o bezeh

gi cana va avela o Ciavo,

savesche sas cherdi e făgăduința.

E Cris sas dini păl îngerea

andăl vast le mijlocitoresche.

20 O mijlocitori si mașcar ăl dui riga,

dar o Del cherdeas corcoro e făgăduința.

21 Atunci si e Cris contra le făgăduințachi

cai cherdeas lan o Del?

Nai!

Te dineasas pes ăc cris

cai daștilas te del viața,

o Del socotilas tut că san ciacio,

cana cheresas so phenel cadai cris.

22 Dar e Scriptura phenel

că o bezeh phandadeas sea,

ca e făgăduința te avel dini

colenghe cai pachean,

că o Isus Cristos si pacheamasco.

23 Anglal,

gi cai te avel o pacheamos,

ame seamas închearde catar e Cris

hai phandade gi cai sicadilos o pacheamos

cai sas te avel.

24 Cadea că e Cris sas ciutini

te închearel amen harnes

gi cai te avel o Cristos

hai anda amende te phenel o Del

că seam ciace anda o pacheamos.

25 Pala so avilos o pacheamos,

ni mai seam închearde harnes.

Ando pacheamos seam ăl ciave le Devlesche hai seam slobozi

26 Sea sen ăl ciave le Devlesche

ando Cristos Isus anda o pacheamos,

27 pentrucă sea cai senas bolde ando Cristos

hureadilen le Cristososa.

28 Ma nai nici evreeo,

nici greco,

ma nai nici sclavo,

nici manuș slobodo,

nici murș,

nici giuvli,

că tume sea sen iech

ando Cristos Isus.

29 Hai cana sen le Cristososche,

atunci sen ăl ciave le Avraamosche

hai moștenitorea pala e făgăduința

cai dineas lan o Del.