Galateni 2

O Pavelo si dichlo mișto catar colaver apostolea

1 Pala deșuștar bărș

pale ghelem ando Ierusalimo le Barnabasa,

hai lilem manța i le Titos.

2 Ghelem othe păce sicadilos manghe o Del.

Maladilem rigate colența

cai si mai bare ande changheri,

lenghe sicadem e evanghelia

cai phenav lan avre neamurenghe.

Camavas ca sea so cherdem

hai mai cherava,

ta na avel chanceschi.

3 Nici o Tit cai sas manța hai si greco

nas ciutino te cinel pes tele.

4 Dar mai sas niște phral hohamne

cai intrisailes cioreal mașcar amende,

hai camnes te rimon amari libertatea

cai si amen ando Cristos Isus,

hai te phanden amen.

5 Amen ni mucleam amen lenghe

nici ăc țîra,

ca o ciacimos le evangheliaco te aciol tumende.

6 Cabor anda cola cai dicheon

că si daicii

– so si on,

anda mande si sa iech,

o Del ni dichel co mui le manușăsco

– sar mai phendem,

cola cai dicheon că si daicii

ni andes chanci anda soste me phendem.

7 Dar on aresles te dichen

că manghe sas dini e evanghelia

anda cola cai nai cinde tele,

hai le Petrosche anda cola cai si cinde tele.

8 Pentrucă o Del cai cherdeas buchi ando Petre,

hai cherdeas les apostolo anda cola cai si cinde tele,

sa cadea cherdeas buchi i andă mande,

hai dineas man drom

colende cai si anda aver neamuri.

9 Cana o Iacov,

o Chifa hai o Ioan,

cai si pringiande

că închearen e buchi le Devleschi,

pringiandes o miștimos cai sas manghe dino,

dines vast manța hai le Barnabasa,

cadea sicades amenghe

că on si amența ande buchi:

ame te gias

colende cai si anda aver neamuri,

hai on colende cai si cinde tele.

10 Mangles numa ăc buchi:

te anas amenghe goghi căl cioră,

buchi cai camnem lan but te cherav.

O Pavel holeaol po Petre

11 Dar cana avilos o Chifa ande Antiohia,

angla leste semas leschi contra,

că sas doșalo.

12 Gi cana te avel niște manuș

dine drom catar o Iacov,

ov halas andăc than colența

cai sas anda aver neamuri.

Dar cana on aviles,

ov dineas pes rigate

hai ni mai haleas lența,

că darailos catar ăl manuș cadala,

cai sas cinde tele.

13 Lesa andăc than

i colaver evreea cherdes sar leste,

cadea că i o Barnaba sas astardo

andă lengo traio hohamno.

14 Cana dichlem că ni traiin

sar trăbul pala o ciacimos le evangheliaco,

phendem le Chifasche angla sea:

„Cana tu cai san evreeo,

traiis sar iech anda aver neamuri,

hai na sar ăc evreeo,

sar daștis te cius avre manușăn

cai si anda aver neamuri

te traiin sar evreea?

15 Ame cai seam evreea anda amari deia,

hai ni seam sar aver neamuri,

cai ni gianen e Cris le evreenghi,

16 gianas că o Del ni phenel andal manuș că si ciace

cana cheren so phenel e Cris,

dar numa că o Isus Cristos si pacheamasco.

Hai i ame pacheaiam ando Isus Cristos,

ca o Del te phenel că seam ciace,

pentrucă o Cristos si pacheamasco,

hai na pentrucă cheras so phenel e Cris.

Că o Del ni phenel anda coniva că si ciacio

cana cherel so phenel e Cris.

17 Cana camas ca o Del te phenel

că ame seam ciace ando Cristos,

hai aver daconiva phenen că seam bezehale,

că ni mai cheras so phenel e Cris,

atunci o Cristos cherel amen bezehale?

Nai ciaces.

18 Rimosardem o pacheamos andăl buchea le Crisache.

Cana laciarava les,

sicavav man că sem bezehalo.

19 Că e Cris mudardeas man.

Man nai man chanci lasa,

te avav giuvindo anda o Del.

20 Semas răstignime andăc than le Cristososa,

hai me ni mai sem giuvindo,

dar o Cristos si giuvindo andă mande

hai mîrî viața cai me traiv lan ando trupo,

traiv lan ando pacheamos

ando Ciavo le Devlesco,

savo iubisardeas man

hai dineas pes anda mande.

21 Me ni durearav o miștimos le Devlesco:

cana e Cris cherel amen ciace,

atunci degeaba mulos o Cristos.”