O phirimos le evreengo ande mulani
(O phirimos 12—14; 16—18; 20; 21:4-9; 22—24)
Ăl numerea
12
E Maria hai o Aron den duma contra le Moiseaschi
1 E Maria hai o Aron dine duma contra le Moiseaschi andai cauza le giuvleachi cușito savea lileasas ov dă romni; că lileasas ăc giuvli cușito. 2 Phendes:
— Ciaces numa prin o Moisea dinea duma o Rai? Ni dineas duma i prin amende?
Hai o Rai așundeas. 3 (Hai o Moisea sas ăc manuș but smerime, mai smerime dă sar orso manuș pa-i phuv.)
4 Andacdata o Rai phendeas le Moiseasche, le Aronosche hai le Mariache:
— Înclen sea ăl trin co corto le malaiimasco!
Hai on încliste. 5 O Rai dinea pes tele ando stîlpo le norosco hai beșlos co udar le cortosco. Dinea mui le Aronos hai le Maria, hai on pașiles. 6 Hai phendea lenghe:
— Așunen mișto so phenav tumenghe!
Cana si mașcar tumende ăc prooroco le Raiesco,
andăc dichimos cherdeov man pringiando lesche,
andăc suno dav lesche duma.
7 Na sa cadea si i mîră robosa le Moiseasa.
Daștiv te avel man pacheamos andă leste
andă saoro cher muro.
8 Dav duma lesa mui caring moste,
mișto, na vorbența phare hachearimasche,
hai chear dichel sar sicadeol o Rai.
Cadea, sar ni darailen
te den duma contra mîră robosche
le Moiseasche?
9 O Rai holeailos pă lende, hai teleardeas.
10 O noro durilos poa corto, hai ita că e Maria pherdilis parnimos lepraco sar o iv. O Aron boldinealos caring e Maria, hai dichleas că sas lan lepra. 11 Atuncia o Aron phendeas le Moiseasche:
— Ah, muro rai, rughiv tut, na cher amen te phiravas e doș le bezehăschi savo cherdeam les sar niște dile! 12 Rughiv tut ta na avel e Maria sar ăc ciavo cherdo mulo, savesco mas si pă epașate cherno cana înclel anda pi dei!
13 O Moisea dine mui co Rai:
— Devla, rughiv tut, sastear lan!
14 Hai o Rai phendeas le Moiseasche:
— Te ciungardeasas laco dad pă laco mui, na fi sas lagiaveschi timpo iefta ghes? Cadea că te avel dini avri iefta ghes andai tabăra, numa pala codoia te avel primime palpale.
15 E Maria sas dini avri iefta ghes andai tabăra, hai o poporo ni teleardea gi cana sas primime palpale. 16 Pala codoia o poporo teleardeas anda o Hațerot hai beșles ande Mulani Paran.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.