17
Na cheren avren te cheren bezeh!
1 O Isus phendeas pe ucenicenghe:
— Ciaces va avena buchea save va cherena le manușăn te cheren bezeha, dar vai catar o manuș prin savo aven! 2 Afi sas mai mișto anda leste te avel les ăc bar aseavesco phanglo che cor hai te avel ciudino ando pai, dă sar te cherel ieches andal țîinoră cadala te cherel bezeh. 3 Cadea că len seama tumende!
Cana tumaro phral cherel bezeh, mustrosar les! Hai cana fal les nasul, iertisar les! 4 Hai cana cherel bezeh contra chiri iefta drom po ghes, hai iefta drom boldel pes tute hai phenel: «Fal man nasul», trăbul te iertis les.
De amen mai but pacheamos!
5 Ăl apostolea phendes le Raiesche:
— De amen mai but pacheamos!
6 Hai o Rai phendeas:
— Te avelas tumen pacheamos cabor ăc cuchin muștareschi, phenenas cadal dudosche: «Încli andai phuv hai plantosao ande marea», hai așunelas tumendar.
So trăbul te cherel ăc robo
7 Te phenas că iech anda tumende si les ăc robo savo aril sau si le bracheanța. Cana ril pes catar o cîmpo, ni va phenena lesche: «Av sigo hai beș che sinia.» 8 Mai sigo va phenena lesche: «Cher manghe te hav, ciu cheo șorțo hai servisar man gi cana hav hai peav! Pala codoia daștis te has hai te pes i tu.» 9 Oare trăbul te nais che robosche că cherdeas so phendean lesche? Ni trăbul. 10 Sa cadea i tume, păce cheren sea so poruncisailos tumenghe, te phenen: «Seam robi bimeritosco. Cherdeam so trăbulas te cheras.»
O Isus sastearel deș manuș lepratar
11 Cana o Isus gialas caring o Ierusalimo, ghelos pașa o hotaro cai si mașcar e Samaria hai e Galileea. 12 Cana pașilos te întril andăc gav, malade les deș manuș nasfale lepratar. On beșenas dur, 13 hai dines mui zurales:
— Isuse, stăpîne, av tut mila amendar!
14 Cana dichlea len o Isus, phendea lenghe:
— Gian hai sicadeon le rașaienghe!
Hai ando timpo so gianas căl rașaia, ujosailes.
15 Iech anda lende, cana dichleas că si sasteardo, risailos, hai mosa baro lăudilas le Devles. 16 Ciudea pes le mosa che phuv căl pîrne le Isusosche hai naiisardea lesche. Ov sas andai Samaria. 17 O Isus phendeas:
— Ni ujosailes sea ăl deș? Cai si colaver înea? 18 Soste ni aviles te lăudin le Devles hai numa cadav străiino corcoro avilos?
19 Hai phendea lesche:
— Uști hai telar! Cheo pacheamos sasteardea tut.
Cana va avela o thagarimos le Devlesco?
20 Ăl fariseia pușles le Isusos, cana va avela o thagarimos le Devlesco. Ov phendeas lenghe:
— O thagarimos le Devlesco ni avel andăc felo te avel dichlo. 21 Ni va phendola: «Ita, si cathe!» sau «Si ocote!» Dar așunen, o thagarimos le Devlesco si mașcar tumende.
22 Hai phendeas le ucenicenghe:
— Va avena ghesa cana va camena te dichen iech andal ghesa le Ciavesche le Manușăsco, hai ni va dichena les. 23 Va phendeola tumenghe: «Ita, si cathe!» sau «Ita, ocote si!» Beșen cai sen hai na gian pala lende! 24 Anda codoia că cana o Ciavo le Manușăsco va rila pes, ando ghes codova, va avela sar o fulgero cai strălucil hai luminil catar ăc rig că aver le ceroschi. 25 Dar mai anglal trăbul te suferil but hai te avel dino rigate catar ăl manuș save train acana.
26 Hai sar sas andăl ghesa le Noiasche, cadea va avela i andăl ghesa le Ciavesche le Manușăsco: 27 hanas, penas, însurinas pes hai mărătinas pes gi ando ghes cana întrisailos o Noia ande corabiia. O pai tasadeas e phuv hai distrugisardeas saorăn.
28 Sa cadea si te avel sar sas andăl ghesa le Lotosche: hanas, penas, chinenas, bichinenas, plantonas, zidonas. 29 Dar ando ghes cana înclistos o Lot andai Sodoma, dineas brîșînd iagasa hai pucioasasa anda o ceri hai distrugisardea len saorăn.
30 Sa cadea va avela i ando ghes cana va sicadeola o Ciavo le Manușăsco. 31 Ando ghes codova, cova savo va avela po acoperiș le cheresco hai va avela les lesche lacimata ando cher, ta na del pes tele hai te întril te lel len! Hai cova savo va avela po cîmpo, sa cadea, ta na mai ril pes chere! 32 Na bistren le romnea le Lotoschi! 33 Con va încercola te hastravel pi viața, va hasarela lan, hai con va hasarela lan va păstrola lan. 34 Phenav tumenghe că ande reat codoia anda dui manuș save va avena andăc pato, iech va avela lilo, hai coaver va avela muclo. 35 Anda dui giuvlea save măcinina andăc than, iech va avela lili, hai coiaver va avela mucli.
37 Ăl ucenicea pușle les:
— Cai, Raia?
Hai ov phendea lenghe:
— Cai si o trupo mulo, othe chiden pes ăl vulturi.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.