16
E Agar hai o Ismael
1 E Sarai e romni le Avramoschi ni cherdeasas lesche nici ăc ciavo. Lan sas lan ăc roaba egipteanca po anav Agar. 2 Hai e Sarai phendeas le Avramosche:
— Dich, o Rai ni muclea man te cherav ciave. Rughiv tut te gias că mîrî roaba, cadea daștiva te avel man ciave latar!
O Avram așundeas so phendeas e Sarai. 3 E Sarai e romni le Avramoschi lileas le egipteanca Agar, pe roaba, hai dea lan dă romni pe romesche le Avramosche, pala so o Avram beșlos deș bărș ando Them Canaan.
4 Ov ghelos ch-e Agar hai oi acilis chamni. Cana oi dichlea pes chamni, dichleas opral pe stăpînca. 5 Hai e Sarai phendeas le Avramosche:
— Tu san doșalo soste cherdeol manghe! Me dinem mîrî roaba andă chiri angali, hai oi cana dichleas că acili chamni, dichlea man opral. O Rai te cherel cris mașcar amende!
6 O Avram phendeas palpale le Saraiache:
— Dich, chi roaba si andă cheo vast. Cher lache so tu cames!
Hai e Sarai phiradilis nasul lasa, hai e Agar nașlis latar. 7 Hai o Îngero le Raiesco arachlea lan pașai haing ande mulani, pașa o drom cai înghearel co Șur. 8 Ov phendeas:
— Agar, e roaba le Saraiachi, catar aves hai cai gias?
Hai oi phendeas:
— Nașav catar mîrî stăpînca, e Sarai.
9 O Îngero le Raiesco phendeas lache:
— Bolde tut că chiri stăpînca hai așun latar, beș telal laco vast!
10 O Îngero le Raiesco phendea:
— Si te butearav but che ciaven, si te aven cadea dă bare că ni daștin te aven ghinde.
11 O Îngero le Raiesco phendeas:
— Dich, acana san chamni. Si te biandes* Biandes ăc ciavo = cheres ăc ciavo ăc ciavo cai si te cius lesco anav Ismael,† O anav Ismael hacheardeol „o Del așunel”. că o Rai așundeas chi duch. 12 Ov si te avel sar ăc hăr sălbatico mașcar ăl manuș. Lesco vast si te avel vazdino caring sea ăl manușa hai o vast saoră manușăngo si te avel vazdino caring leste, hai si te avel corcoro bi phralengo.
13 Hai oi ciuteas o anav le Raiesco cai dea lache duma:
— Tu san o Del cai dichel man.
Că oi phendeas: „Ciaces? Cate me dichlem codoles cai dichlea man!” 14 Codolasche e haing codoia buciolas Lahai-Roii: „E haing Coleschi cai si giungado hai dichel”. Oi si mașcar o Cades hai o Bared.
15 E Agar biandeas le Avramosche ăc ciavo, hai o Avram ciuteas lesco anav Ismael. 16 Le Avramos sas les ohtodeșa hai șov bărșa cana e Agar biandeas lesche le Ismaelos.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.