6
1 Phralale hai pheiale, cana ăc manuș va perela andăc greșala, tume cai sen mai zurale ando Duho te vazden les ăc duhosa blîndo! Hai dich tute ta na peres i tu! 2 Phiraven ăl pharimata iech avresche, hai cadea cheren e cris le Cristososchi! 3 Pentrucă cana daconiva pacheala că si daicii, macar că nai chanci, tharel pes corcoro. 4 Fiosavo te cercetil pi buchi, hai atunci va avela les sosa te lăudil pes, hai ta na ciul pi buchi pașa avreschi, 5 că fiosavo si te phiravel pi responsabilitatea corcoro.
So semănil o manuș, codoia va secerila
6 Con lel sicaiimata anda o Cuvînto ⸤le Devlesco⸥, te del anda pe buchea i coles cai sicavel les. 7 Na thardeon: O Del ni muchel pes te avel hohado. So semănil o manuș, codoia va secerila. 8 Con semănil te placiol pe firea bezehali, va secerila andai firea bezehali chernimos. Dar con semănil te placiol le Duhos, va secerila anda o Duho e viața veșnico. 9 Ta na chineos ando cherimos le miștimasco, că ch-e vremea potrivime si te seceris, cana ni perasa chinimastar. 10 Cadea deci te cheras mișto saorănghe cabor drom daștis, dar mai but le fameliache colenghe cai pachean!
O Pavel camel ca on ta na bistren
11 Dichen so literența bare ramosardem tumenghe, corcoro mîră vastesa! 12 Cola cai camen te aven dichle catar ăl manuș, roden te cheren tumen te cinen tumen tele, ca on ta na aven nașade andai cauza le trușuleschi le Cristososco. 13 Pentrucă nici on cai si cinde tele ni închearen e Cris, hai camen ca tume te aven cinde tele, ca on te daștin te lăudin pes tumare truposa. 14 Cabor anda mande, dur mandar o gîndo te lăudiv man avre daicesa, numa le trușulesa amare Raiesco le Isusosco Cristos. Hai othe e lumea sas răstignime anda mande, hai me semas răstignime andai lumea. 15 Că ando Cristos Isus nici o cinimos tele, hai nici o bicinimos tele nai chanci, hai numa te avel tut rig anda so cherdeas nevo o Del. 16 Cola cai gian pala cadai regula, le Israelosa le Devlesco, te avel e pacea hai e mila.
17 Dacanara angle, coniva ta na mai holearen man, că me phiravav pă muro trupo ăl semnea le Isusosche!
18 Phralale hai pheiale, o miștimos amare Raiesco le Isusosco Cristos te avel tumare duhosa! Amin.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.