34
O mulimos le Moiseasco
O Moisea uștilos andai Mulani le Moaboschi po Plai o Nebo, po vîrfo le Plaiesco Pisga, iech angla aver le Ierihonosa. Hai o Rai sicadea lesche saoro them: o Galaad gi co Dan, saoro ținuto le Neftalesco, o them le Efraiimosco hai le Manasesco, saoro them le Iudasco gi co pai baro caring perel o cham, o Neghevo hai o than orta le Hareaco Ierihono, o foro le palmierengo, gi co Țoar. O Rai phendea lesche:
— Cadava si o them anda savo halem sovel le Avraamosche, le Isacosche hai le Iacovosche: «Si te dav les che ciavenghe.» Muclem tut te diches les, dar ni va giasa andă leste.
O Moisea, o robo le Raiesco, mulos othe ando Them le Moabosco, sar phendeas o Rai. Prahosardea les ande har, ando Them le Moabosco, iech angla avreste le Bet-Peeorosa. Coniva ni gianel lesco than le prahomasco gi ando ghes dă aghes. Le Moiseas sas les ăc șăl hai biș bărș cana mulo. Lesche iacha ni corailesas, hai lesco zuralimos ni hasailosas. Ăl israelițea ruies le Moiseas treanda ghes ande Mulani le Moaboschi, gi cana ăl ghesa le roiimasche hai le jălimasche anda o Moisea termenisailes.
O Iosua le Nunosco sas pherdo duho gogheaco, că o Moisea ciuteasas pe vast pă leste. Atunci ăl israelițea așundes lestar hai cherdes sar poruncisardeasas o Rai le Moiseasche. 10 Dă atuncia ando Israelo ni mai sas prooroco sar o Moisea, saves o Rai pringiandea les iech angla avreste. 11 Nas aver prooroco te cherel saoră semnea hai saoră minuni, savo sas dino drom catar o Rai te cherel len ando Them le Egiptosco contra le faraonoschi, lesche slugenghi hai saoră themoschi, 12  * hai cai sicadeas vast zuralo hai cai cherdeas buchea but daraiimasche angla saoro Israelo.

*34:12