1 O Iosua hai saoră israelițea uștiles detehara andai reat, teleardes anda o Sitim hai aresles ko Iordano. Beșles othe, gi kai te nakhen. 2 Pala trin ghes, ăl bulibașa nakhles andai tabăra 3 hai poruncisardes le poporoske:

— Kana dikhen o kivoto le phanglimasko le Raiesko, tumare Devlesko, hai le rașaien, anda o neamo le levițiengo, phiraindos les, telearen anda o than kai sen hai gian pala leste! 4 Dar mașkar tumende hai ov te avel kam dui mii kuia!* 2000 kuia si kam ăk kilometro. Na pașon lestar! Kadea va gianena o drom pă savo te gian, kă ni mai nakhlen po drom kadava gi akanak.

5 O Iosua phendeas le poporoske:

— Sfințon tumen, kă tehara o Rai va kerela minuni andă tumaro mașkar!

6 Hai le rașaienghe o Iosua phendeas:

— Vazden o kivoto le phanglimasko, hai nakhen angla o poporo!

On vazdes o kivoto le phanglimasko hai gheles angla o poporo.

7 O Rai phendeas le Iosuaske:

— Aghes va începova te kerav tut baro angla saoro Israelo, kaște gianen kă sar semas le Moiseasa, si te avav i tusa. 8 Poruncisar le rașaienghe save înghearen o kivoto le phanglimasko: «Kana aresena ke rig le paieski le Iordanoski, oprin tumen ando Iordano!»

9 O Iosua phendeas le israelițenghe:

— Aven orde hai așunen ăl vorbe le Raieske, tumare Devleske!

10 Hai phendeas:

— Prin kadaia va pringianena kă o Del o giuvindo si andă tumaro mașkar hai kă ciaces angla tumende si te gonil le kanaanițen, le hetițen, le hevițen, le perezițen, le ghirgasițen, le emorițen hai le iebușițen anda lengo them. 11 Ita, o kivoto le phanglimasko le Raiesko saoră phuiako gial angla tumende ando Iordano. 12 Akanak, len deșudui murș andal neamuri le Israeloske, pok murș anda fiosavo neamo. 13 Hai kana ăl rașaia save înghearen o kivoto le Raiesko, o Rai saoră phuiako, va ciuna e talpa le pîrneski ando pai le Iordanosko, o pai le Iordanosko va avela oprime. O pai savo mukel pes opral va beșela grămada.

14 Kana o poporo înklistos anda pe korturi kaște nakhel o Iordano, ăl rașaia înghearenas o kivoto le phanglimasko angla o poporo. 15 Ando timpo le secerimasko† Ando Kanaan o timpo le secerimasko si e primăvara. o Iordano c⁠iordolas pă saoră riga. Dar kana kola save înghearenas o kivoto aresles ko Iordano hai kana ăl rașaia save înghearenas o kivoto ciutes ăl pîrne p-e rig le paieski, 16 o pai savo thabdelas opral oprisailos hai kidineailos lendar but dur, pașa o foro Adam, kai si pașa o Țartan. Hai o pai kai thabdelas karing o pai o baro le Mulaneako, o Pai o Baro o Londo, thabdeas dă sea. O poporo nakhlos o pai angla o Ierihono. 17 Ăl rașaia save înghearenas o kivoto le phanglimasko le Raiesko beșles othe po șukimos, ando mașkar le Iordanosko, hai saoro Israelo nakhelas po șukimos, gi kana saoro neamo nakhlos o Iordano.