1 Ăl israelițea pale kerde so si nasul angla o Rai, hai kodolaske o Rai dineas len timpo saranda bărșăngo ando vast le filisteaengo. 2 Sas ăk manuș andai Țora, anda o neamo le Danosko, hai lesko anav sas Manoah. Leski romni sas sterpo hai ni kerdeas ciave. 3 Sikadilo lake o îngero le Raiesko hai phendeas:

— Ita kă san sterpo, ni kerdean ciave, dar va aciosa khamni, hai va keresa ăk ciavo. 4 Akanak le seama, kaște na pes nici mol, nici aver pimos hai ta na has khanci bi-ujo. 5 Dikh, va aciosa khamni hai va keresa ăk ciavo. O bricio ta na nakhel pa lesko șăro, anda kodoia kă o ciavo va avela naziro, ciutino rigate anda o Del dă kana kerdeola* O naziro ni trăbulas te hal khanci bi-ujo, ni trăbulas te pel pimos, ni trăbulas te ciul o vast păk mulo hai mukleas ăl bal te bareon, te sikadeol kă haleas ăk sovel le Devleske.a Numerea 6:1-8. Ov va începola te hastravel le Israelos anda o vast le filisteaengo.

6 E giuvli ghelis hai phendeas pe romeske:

— Avilos mande ăk manuș le Devlesko. Dikheolas sar o îngero le Devlesko, darasas te dikhes pă leste. Ni pușlem les katar avel, hai ni phendeas manghe sar buciol. 7 Ov phendeas manghe: «Va aciosa khamni hai va keresa ăk ciavo. Anda kodoia ta na pes nici mol, nici aver pimos, hai ta na has khanci bi-ujo, kă o ciavo va avela ciutino rigate anda o Del dă kana kerdeol, gi kana merel.»

8 Atunci o Manoah rughisailos le Raieske:

— Raia, rughiv tut, ker te avel pale amende o manuș le Devlesko, saves dinean les drom, te sikavel amen so te keras le ciavesa kai va kerdeola.

9 O Del așundeas le Manoahos, hai o îngero le Devlesko pale avilos ke giuvli kana oi sas po kîmpo. O Manoah, lako rom, nas lasa. 10 E giuvli sigo nașlis kaște phenel pe romeske, hai phendeas leske:

— Ita, o manuș kai mai sas mande ando ghes kodova, pale sikadilos manghe.

11 O Manoah sigo ghelos pala pi romni. Kana areslos ko manuș kodova, phendeas leske:

— Tu san o manuș kai dinean duma mîră romneasa?

Ov dineas anglal:

— Me sem.

12 O Manoah phendeas:

— Kana va kerdeola so tu phenes, sar trăbul te barearas le ciaves hai so trăbul te kerel ov?

13 O îngero le Raiesko phendeas le Manoahoske:

— Ki giuvli te feril pes katar sea so phendem lake. 14 Ta na hal khanci so kerdeol andai drakh, ta na pel mol nici aver pimos hai ta na hal khanci bi ujo. Te kerel sea so poruncisardem lake.

15 O Manoah phendeas le îngeroske le Raiesko:

— Rughis tut, mai beș ăk țîra, kaște keras tuke ăk iedo te has!

16 O îngero le Raiesko phendeas le Manoahoske:

— Kear te beșav, ni hava anda keo hamos, dar kana anes ăk phabarimos dă sea, atunci te anes les le Raieske!

Kăci o Manoah ni gianelas kă si o îngero le Raiesko. 17 Atunci o Manoah pușleas le îngeros le Raiesko:

— Savo si keo anav? Kaște das tut ki onoarea kana kerdeola so phendean.

18 O îngero le Raiesko phendeas leske:

— Soste manghes muro anav? ⸤Ov si but minunime hai⸥ ni daștis te hakeares les!

19 O Manoah lileas o iedo hai o daro le hamasko hai phabardeas len le Raieske pe stînka. Ando timpo so o Manoah hai leski romni vardinas, kerdilis ăk minunea: 20 ando timpo so e flakăra uștelas poa altari karing o ceri, o îngero le Raiesko uștilos ande flakăra poa altari. Dikhindos e buki kadaia, o Manoah hai leski romni ciude pes le mosa ke phuv.

21 O îngero le Raiesko ni mai sikadilos le Manoahoske hai leske romneake. Atunci o Manoah hakeardeas kă sas o îngero le Raiesko 22 hai phendeas pe romneake:

— Ciaces si te meras, kă dikhleam le Devles!

23 Dar leski romni phendeas leske:

— Te afi kamnosas o Rai te mudarel amen, ni afi primisardeasas anda amare vast o phabarimos dă sea hai o daro le hamasko, ni afi sikadeasas amenghe saoră bukea kadala hai ni afi phendeasas amenghe bukea sar kadala!

24 E romni kerdeas ăk ciavo hai ciuteas lesko anav Samson. O ciavo barilo hai o Rai binekuvintisardeas les. 25 O Duho le Devlesko începosailos te mișkil les kana sas ke Tabăra le Danoski, mașkar o Țora hai o Eștaol.