115
Ćhu kǒ pakjamos anθ-o Raj!
1 Na amen, Raja, na amenqe,
haj ke anavesqe an slava,
anθa ki mila kaj aćhol, anθa kǒ pakjamos!
2 Sosθe phenen äl njamuri:
— Kaj si o Del le Israelosqo?
3 Amaro Del si anθ-o ćeri,
ov kerel sǎ so kamel.
4 Lenqe idolǎ si rupo haj sumnakaj,
kerde manuśänθar.
5 Si len muj dar ni den duma,
si len jakha dar ni dikhen,
6 si len kan dar ni aśunen,
si len nakh dar ni khanden,
7 si len vast dar ni pipäin,
si len pïrne dar ni phiren.
Anθa lenqi kor ni aśundǒl khanć.
8 Sar lenθe si te aven kola kaj keren len,
sǎ kaj ćhun pǒ pakjamos anθä lenθe.
9 Israel, ćhu kǒ pakjamos anθ-o Raj!
Ov si lenqo aźutori haj lenqo skuto!
10 O kher le Aronosqo, ćhu kǒ pakjamos anθ-o Raj!
Ov si lenqo aźutori haj lenqo skuto!
11 Tume kaj daran kaθar o Raj,
ćhun tumaro pakjamos anθ-o Raj!
Ov si lenqo aźutori haj lenqo skuto.
12 O Raj ni bistrel amen,
ov va binekuvintila, va binekuvintila o kher le Aronosqo.
13 Va binekuvintila kolen kaj daran kaθar o Raj,
kaθar äl cïjne haj ʒi k-äl bare.
14 O Raj te butǎrel tumen,
i tumen haj i tumare ćhaven!
15 Aven binekuvintime kaθar o Raj,
kaj kerdǎs o ćeri haj e phuv!
16 O ćeri si o ćeri le Rajesqo,
haj e phuv dinǎ lan le ćhavenqe le Adamosqe.
17 Na äl mule laudin le Rajes,
na kola kaj mukle pes anθ-o than kaj ni aśundǒl khanć,
18 haj ame, ame va binekuvintisa le Rajes,
dakanara haj totdjauna.
Läudin le Rajes!* Anθ-o oriʒinalo si: „Aleluja!”
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.