1 O Isus phendǎs äk pilda le ućenićenqe, kaśte sikavel lenqe kä träbul te rugin pes merǒ haj ta na muken pes. 2 Phendǎs:

— Anθ-äk foro sas äk krisitori savo kaθar o Del ni daralas, haj kaθar äl manuś ni laʒalas. 3 Anθ-o foro kodova sas i äk phivli savi avelas merǒ lesθe haj phenelas lesqe: «Ker manqe ćaćimos kontra mïrä duśmanosqi!» 4 But timpo ni kamnos, dar pala kodoja gïndisajlos: «Kjar kana ni darav kaθar o Del haj kaθar äl manuś ni laʒav, 5 dar kä e phivli kadaja ni del man paćǎ, si te kerav laqe ćaćimos, kaśte na maj avel merǒ haj te marel man k-o śäro.»

6 Atunća o Raj phendǎs:

— Aśunen so phenel o krisitori kaj naj ćaćo! 7 Dar o Del ni va kerela ćaćimos le manuśänqe kaj alosardǎ len haj save den muj lesθe ku ges ku rǎt? Va mukela len te aźukǎren? 8 Phenav tumenqe, sigo va kerela lenqe ćaćimos. Dar kana va avela o Ćhavo le Manuśäsqo, va arakhela manuś kaj ćhun pǒ pakjamos anθ-o Del?

9 Othe sas manuś save dikhenas pes ćaće haj dikhenas opral kä sǎ kolaver. O Isus phendǎ lenqe e pilda kaja:

— 10 Duj manuś geles k-o Templo te rugin pes. Jekh sas fariseo, haj koaver vameśo. 11 O fariseo beśelas anθä pïrnenθe haj ïnćeposajlos te rugil pes anθa pesθe kadǎ: «Devl!a, naiv tuqe kä ni sem sar kolaver manuś, save ćoren, kaj si nasul, kaj soven avre rromnǎnça kaj naj lenqe sau kjar sar kadav vameśo. 12 Me postiv duvar p-o kurko haj dav le deśenqi rig anθa sǎ so kïśtigiv.» 13 O vameśo beśelas dur haj ni ïndräznilas te vazdel pe jakha karing o ćeri, dar mardǒlas anθ-o kolin haj phenelas: «Devl!a, av tut mila manθar, o bezexalo!»

14 Phenav tumenqe kä kana geles khere, o Del phendǎs anθa o manuś kadava kä si ćaćo, na anθa o fariseo. Käć orkon vazdel pes, va avela smerime, haj orkon va smerila pes va avela vazdino.

15 Andine lesqe i niśte cïjnorän ćućaqe, kaśte makel pes lenθar. Dar äl ućenićǎ, kana dikhles e buki kadaja, mustrosardes kolen kaj anenas len. 16 Dar o Isus dinǎ muj pesθe le cïjnorän haj phendǎs:

— Muken le cïjnorän te aven manθe haj na oprin len! Kä o thagarimos le Devlesqo si kolenqo save si sar lenθe. 17 Ćaćes, phenav tumenqe, kä orkon ni primil o thagarimos le Devlesqo sar äk cïjnoro, ni va ïntrila anθä lesθe.

18 Äk manuś anaveça puślǎs le Isusos:

— Laćeja sikaitorina, so träbul te kerav kaśte del pes manqe viaca veśniko?

19 O Isus phendǎ lesqe:

— Sosθe phenes manqe laćho? Konik naj laćho numa jekh: o Del. 20 Ʒanes äl porunć: «Ta na soves ʒuvlǎça kaj naj kiri, ta na mudares, ta na ćores, ta na aves äk martori oxamno, ćinstisar ke dades haj ke da!»

21 Ov phendǎs:

— Sǎ kadala kerdem len dä kana semas tärno!

22 Kana o Isus aśundǎs, phendǎ lesqe:

— Maj träbul te keres äk buki: bikin sǎ so si tut, äl love de len k-äl ćorä, haj va avela tut äk komoara anθ-äl ćeruri. Pala kodoja av pala manθe!

23 Kana aśundǎs ov kadala, nasul näkäźisajlos, kä sas but bravalo.

24 Kana o Isus dikhlǎs kä näkäźisajlos nasul, phendǎs:

— Kabor dä pharo si te ïntrin äl bravale anθ-o thagarimos le Devlesqo! 25 Kä si maj uśuro te nakhel äk kämila anθa-l kan le sujaqe dä sar te ïntril äk manuś bravalo anθ-o thagarimos le Devlesqo.

26 Kola save aśunenas les phendes:

— Atunć kon daśtil te avel xastrame?

27 Ov phendǎs:

— So ni daśtil pes k-äl manuś, daśtil pes k-o Del.

28 Atunć o Petre phendǎs:

— Dikh, ame muklǎm sǎ so sas amen haj avilǎm pala tuθe.

29 Haj o Isus phendǎ lenqe:

— Ćaćes, phenav tumenqe, kä naj konik savo, anθa o thagarimos le Devlesqo, muklǎs pǒ kher, sau rromni, sau phral, sau dej haj dad, sau ćhave, 30 haj ta na primil but maj but anθ-e vremǎ kadaja, haj anθ-e vremǎ kaj avel, e viaca veśniko.

31 O Isus lilǎs rigaθe le deśudujen haj phendǎ lenqe:

— Dikhen kä ʒas k-o Jerusalimo, haj sǎ so äl prooroćǎ ramosarde anθa o Ćhavo le Manuśäsqo va kerdǒla. 32 Käć va avela dino anθ-äl vast le neevreenqe haj va batźokorina les, va päkälina les haj va ćungarena les. 33 Haj päće va bićuina les, va mudarena les, dar anθä le trinenqo ges va ïnviola.

34 Äl deśuduj ni xakǎrdes khanć anθa-l bukǎ kadala, kadav dimos duma sas garado anθa lenθe haj ni ʒanenas so phenel lenqe.

35 Kana paśolas o Isus k-o Jerixon, äk koro beśelas paśa o drom haj mangelas. 36 Kana aśundǎs kä nakhen but manuś, puślǎs so si kothe. 37 Phende lesqe:

— Nakhel o Isus, o nazaritjano.

38 Atunć ov dinǎs muj:

— Isus!e, o Ćhavo le Davidosqo, av tut mila manθar!

39 Kola save ʒanas anglal xanas pes leça te aćhol, dar ov delas muj i maj zurales:

— O Ćhavo le Davidosqo, av tut mila manθar!

40 O Isus beślos p-o than haj porunćisardǎs te anen les lesθe. Kana areslos, o Isus puślǎ les:

— 41 So kames te kerav tuqe?

Haj ov phendǎs:

— Rai!a, te dikhav.

42 Haj o Isus phendǎs lesqe:

— Dikh! Kǒ pakjamos sastǎrdǎs tut.

43 P-o than, o koro dikhlǎs haj gelos pala o Isus, dindos muj kabor dä baro si o Del. Saoro poporo, kana dikhlǎs e buki kadaja, läudisardǎs le Devles.