17
Na keren avren te keren bezex!
O Isus phendǎs pe ućenićenqe:
— Ćaćes va avena bukǎ save va kerena le manuśän te keren bezexa, dar vaj kaθar o manuś prin savo aven! Afi sas maj miśto anθa lesθe te avel les äk bar asjavesqo phanglo ke kor haj te avel ćhudino anθ-o paj, dä sar te kerel jekhes anθa-l cïjnorä kadala te kerel bezex. Kadǎ kä len sǎma tumenθe!
Kana tumaro phral kerel bezex, mustrosar les! Haj kana fal les nasul, jertisar les! Haj kana kerel bezex kontra kiri jefta drom p-o ges, haj jefta drom boldel pes tuθe haj phenel: «Fal man nasul», träbul te jertis les.
De amen maj but pakjamos!
Äl apostolǎ phendes le Rajesqe:
— De amen maj but pakjamos!
Haj o Raj phendǎs:
— Te avelas tumen pakjamos kabor äk kukin muśtaresqi, phenenas kadal dudosqe: «Ïnkli anθa-i phuv haj plantosao anθ-e marja», haj aśunelas tumenθar.
So träbul te kerel äk robo
Te phenas kä jekh anθa tumenθe si les äk robo savo aril sau si le brakhǎnça. Kana ril pes kaθar o kïmpo, ni va phenena lesqe: «Av sigo haj beś ke sinia.» Maj sigo va phenena lesqe: «Ker manqe te xav, ćhu kǒ śorco haj servisar man ʒi kana xav haj pǎv! Pala kodoja daśtis te xas haj te pes i tu.» Oare träbul te nais ke robosqe kä kerdǎs so phendǎn lesqe? Ni träbul. 10 Sa kadǎ i tume, päće keren sǎ so porunćisajlos tumenqe, te phenen: «Sǎm robi bimeritosqo. Kerdǎm so träbulas te keras.»
O Isus sastǎrel deś manuś lepratar
11 Kana o Isus ʒalas karing o Jerusalimo, gelos paśa o xotaro kaj si maśkar e Samaria haj e Galilea. 12 Kana paśilos te ïntril anθ-äk gav, malade les deś manuś nasfale lepratar. On beśenas dur, 13 haj dines muj zurales:
— Isus!e, stäpïne, av tut mila amenθar!
14 Kana dikhlǎ len o Isus, phendǎ lenqe:
— Ʒan haj sikadǒn le raśajenqe!
Haj anθ-o timpo so ʒanas k-äl raśaja, uźosajles.
15 Jekh anθa lenθe, kana dikhlǎs kä si sastǎrdo, risajlos, haj moça baro läudilas le Devles. 16 Ćhudǎ pes le moça ke phuv k-äl pïrne le Isusosqe haj naisardǎ lesqe. Ov sas anθa-i Samaria. 17 O Isus phendǎs:
— Ni uźosajles sǎ äl deś? Kaj si kolaver ïnǎ? 18 Sosθe ni aviles te läudin le Devles haj numa kadav sträiino korkoro avilos?
19 Haj phendǎ lesqe:
— Uśti haj telar! Kǒ pakjamos sastǎrdǎ tut.
Kana va avela o thagarimos le Devlesqo?
20 Äl fariseǎ puśles le Isusos, kana va avela o thagarimos le Devlesqo. Ov phendǎs lenqe:
— O thagarimos le Devlesqo ni avel anθ-äk felo te avel dikhlo. 21 Ni va phendola: «Ita, si kathe!» sau «Si okote!» Dar aśunen, o thagarimos le Devlesqo si maśkar tumenθe.
22 Haj phendǎs le ućenićenqe:
— Va avena gesa kana va kamena te dikhen jekh anθa-l gesa le Ćhavesqe le Manuśäsqo, haj ni va dikhena les. 23 Va phendǒla tumenqe: «Ita, si kathe!» sau «Ita, okote si!» Beśen kaj sen haj na ʒan pala lenθe! 24 Anθa kodoja kä kana o Ćhavo le Manuśäsqo va rila pes, anθ-o ges kodova, va avela sar o fulʒero kaj strälućil haj luminil kaθar äk rig kä aver le ćerosqi. 25 Dar maj anglal träbul te suferil but haj te avel dino rigaθe kaθar äl manuś save train akana.
26 Haj sar sas anθ-äl gesa le Nojasqe, kadǎ va avela i anθ-äl gesa le Ćhavesqe le Manuśäsqo: 27 xanas, penas, ïnsurinas pes haj märätinas pes ʒi anθ-o ges kana ïntrisajlos o Noja anθ-e korabia. O paj tasadǎs e phuv haj distruʒisardǎs saorän.
28 Sa kadǎ si te avel sar sas anθ-äl gesa le Lotosqe: xanas, penas, kinenas, bikinenas, plantonas, zidonas. 29 Dar anθ-o ges kana ïnklistos o Lot anθa-i Sodoma, dinǎs brïśïnd jagaça haj pućoasaça anθa o ćeri haj distruʒisardǎ len saorän.
30 Sa kadǎ va avela i anθ-o ges kana va sikadǒla o Ćhavo le Manuśäsqo. 31 Anθ-o ges kodova, kova savo va avela p-o akoperiś le kheresqo haj va avela les lesqe laćhimata anθ-o kher, ta na del pes tele haj te ïntril te lel len! Haj kova savo va avela p-o kïmpo, sa kadǎ, ta na maj ril pes khere! 32 Na bistren le rromnǎ le Lotosqi! 33 Kon va ïnćerkola te xastravel pi viaca, va xasarela lan, haj kon va xasarela lan va pästrola lan. 34 Phenav tumenqe kä anθ-e rǎt kodoja anθa duj manuś save va avena anθ-äk pato, jekh va avela lilo, haj koaver va avela muklo. 35 Anθa duj ʒuvlǎ save mäćinina anθ-äk than, jekh va avela lili, haj kojaver va avela mukli.
37 Äl ućenićǎ puśle les:
— Kaj, Rai!a?
Haj ov phendǎ lenqe:
— Kaj si o trupo mulo, othe kiden pes äl vulturi.