17
O Isus rugil pes anθa pesθe
Pala so phendǎs kadal bukǎ, o Isus vazdǎs pe jakha karing o ćeri haj phendǎs:
— Dad!e, avilo o ćaso! Sikav kabor dä baro si kǒ Ćhavo, ka i kǒ Ćhavo te sikavel kabor dä baro san tu, pala sar dinǎn les zuralimos pä saorä manuś, kaśte del len viaca veśniko saorän kolen saven dinǎn len lesqe tu. Haj kadaja si e viaca veśniko: te prinʒanen tut tut, o korkoro Del ćaćo, haj ⸤man⸥, le Isusos Kristos. Me sikadem kabor dä baro san tu pe phuv, kä termenisardem e buki savi dinǎn lan manqe te kerav lan. Haj akanak, Dad!e, sikav kabor dä baro sem me angla tuθe, kabor dä baro semas tuça ʒi kaj te avel kerdi e lumǎ.
O Isus rugil pes anθa pe ućenićǎ
Kerdem prinʒando kǒ anav le manuśänqe save dinǎn len manqe anθa-i lumǎ. Kire sas on, haj tu dinǎn len manqe haj on aśundes kaθar ke vorbe. Akanak on ʒanen kä sǎ so dinǎn man, si tuθar, anθa kodoja kä dinem len äl sikaimata kaj tu dinǎn len manqe, haj on lile len. Haj ćaćes ʒanen kä me avilem tuθar haj pakǎn kä tu dinǎn man drom. Anθa lenθe rugiv man. Ni rugiv man anθa-i lumǎ, haj anθa kola saven dinǎn len manqe tu, kä si kire. 10 Sǎ so si muro si kiro haj so si kiro si muro. Haj on sikaven kabor dä baro sem me. 11 Me avav tuθe kadǎ kä ni maj sem anθ-e lumǎ, dar on si anθ-e lumǎ. Sfïntona Dad!e, päzisar len anθä kǒ anav, savo tu dinǎn les manqe, ka on te aven jekh kadǎ sar sǎm ame. 12 Kabor timpo semas lença, päzisardem len me anθä kǒ anav, savo tu dinǎn les manqe. Päzisardem len me haj ni xasajlos nić jekh anθa lenθe, numa kova kaj träbulas te xasaol, kaśte kerdǒl so phenel e Skriptura. 13 Dar akanak avav tuθe, haj phenav kadal bukǎ kabor maj sem anθ-e lumǎ, ka len te avel len mïrï bukuria pherdi anθä lenqo ilo. 14 Dinem len kǒ kuvïnto, haj e lumǎ urosardǎ len kä on naj le lumǎqe, kadǎ sar nić me ni sem le lumǎqo. 15 Ni rugiv tut te les len anθa-i lumǎ, haj te päzis len kaθar o nasul. 16 On naj le lumǎqe, kadǎ sar nić me ni sem le lumǎqo. 17 Sfincosar len prin o ćaćimos! Kǒ kuvïnto si o ćaćimos. 18 Kadǎ sar tu dinǎn man drom man anθ-e lumǎ, sa kadǎ dinem len i me drom len anθ-e lumǎ. 19 Sfincov man anθa lenθe, kodolasqe ka i on te aven sfincome ćaćes.
O Isus rugil pes anθa saorä kola kaj va pakǎna anθä lesθe
20 Me ni rugiv man numa anθa lenθe, haj i anθa kola kaj va pakǎna anθä manθe kana aśunen lenqe vorbe, 21 ka sǎ te aven jekh, kadǎ sar tu, Dad!e, san anθä manθe, haj me sem anθä tuθe. Rugiv man ka on te aven anθä amenθe, ka e lumǎ te pakǎl kä tu dinǎn man drom. 22 Dinem len e slava savi tu dinǎn lan manqe, ka on te aven jekh, sa kadǎ sar ame sǎm jekh. 23 Me anθä lenθe, haj tu anθä manθe, ka on te kerdǒn ćaćes jekh, haj e lumǎ te ʒanel kä tu dinǎn man drom haj kä jubis len, sar jubis man i man. 24 Dad!e, kamav ka othe kaj sem me te aven i kola saven dinǎn len manqe, ka on te dikhen mïrï slava, e slava savi dinǎn lan manqe tu, kä jubisardǎn man maj anglal ʒi kaj te kerdǒl e lumǎ. 25 Ćaćeja Dad!e, e lumǎ ni prinʒanel tut, dar me prinʒanav tut, haj kadala ʒanen kä tu dinǎn man drom. 26 Kerdem lenqe prinʒando kǒ anav,a Joan 12:28 haj si te maj kerav les prinʒando, ka e dragostja kaj sikadǎn lan manqe tut, te avel anθä lenθe haj me te avav anθä lenθe.

a17:26 Joan 12:28