1 The o Ábrahám lijász pészké jékhá rromnyá, szávi kide bicsijász Keturá. 2 Voj kérgyász lészké lé Zimránosz, lé Joksánosz, lé Médánosz, lé Midiánosz, lé Isbákosz the lé Suáhhosz. 3 O Joksán kérgyász lé Sébász the lé Dédánosz. Kátho Dédán ávilé kálá népi: o asuri, o letusi the o leummi. 4 Lé Midiánoszkré csávé hász o Éfá, o Éfer, o Hhánok, o Abida the o Eldá. Kálá sze lá Keturákré csávé hászlé.

5 Szemindenosz szo hász lé Ábrahámosz, lé Izsákoszké dinyász lén. 6 Okolávrén csávén, szávé káthá ávér rromnyá kérgyilé, o Ábrahám dinyász lén ajándéki. The dzsi káj dzsidzsijász vo, trányász lén káthá pészkro csávo, kátho Izsák, ká kodo thán káthár opré ávél o khám, ko thém Kedem.

7 O Ábrahám but dzsidzsijász, jég săl the éftávárdés the páncs bors.

8 O Ábrahám ári dinyász pészkro vogyi the mujász pálá jég sukár phuribo, phuro án borsá the cselo viácátár. The othé riszjász máská pészkré mulé. 9 O Izsák the o Ismáel, lészkré csávé, párrundé lész án barlangosz Makpéla, szávo ánglo Mamre hino, pé lé Efronoszkri mál, szávo lé hhétitáné Cohhárészkro csávo hászlo. 10 Kede hinyi i mál szávi cingyász lá o Ábrahám kátho hhétitenye. Othé hász párrundé o Ábrahám the lészkri rromnyi i Sárá. 11 The pálá szoszté mujász o Ábrahám, o Dél áldingyász lészkré csász lé Izsákosz. Vo pásá i hhányik Láhháj-Roj bésjász.