Galateni 4

1 Me phenav kă kabor timpo

ăk moștenitori si ciavoro,

ku sea kă si leske saoră bukea,

nai diferime katar ăk robo.

2 Si ande grija le manușănghi

kai dikhen lestar

hai i katar leske bukea,

gi k-e vremea kai phendeas lan lesko dad.

3 Sa kadea i ame

kana seamas ciavoră,

seamas robi

le sikaiimatenghe ăl phurane le lumeake.

4 Dar kana pherdilis e vremea,

o Del dineas drom pe Ciaves,

kerdo anda giuvleate

hai biando talai Kris,

5 te pokinel anda pire

kola kai beșen talai Kris,

kadea te kerel amen ciave le Devleske.

6 Hai kă sen ciave le Devleske,

o Del dineas drom o Duho pe Ciavesko

andă amare ile,

kai del mui:

„Abba!”

„Dade!”

7 Kadea kă ni mai san robo,

san ciavo le Devlesko,

hai kana san lesko ciavo,

san i lesko moștenitori.

Te înkearen tumari libertatea!

E dragostea le Paveloski karing ăl galateni

8 Kana ni pringianden le Devles,

senas robi kolenghe

kai on nai devla ciace.

9 Dar akanak păce pringianden le Devles,

sau mai mișto phendo,

pala soste senas pringiande katar o Del,

sar mai bolden tumen palpale

kăl sikaiimata ăl phurane,

kai si khancivale hai cioră?

Kamen pale te slujin lenghe sar robi?

10 Tume înkearen ghesa,

ciona,

ghesa bare,

hai bărșa.

11 Me darav anda tumende

kă kerdem tumenghe buki anda khanceste!

12 Kadea phralale hai pheiale,

rughiv tumen șukar te aven sar mande,

kă i me sem sar tumende.

Ni kerden manghe nici ăk nasulimos.

13 Tume gianen kă anglal

andai kauza mîră nasfalimaski

me phendem tumenghe e evanghelia.

14 Sas pharo te dikhen muro trupo,

dar ni dikhlen man nasul

hai ni ciungarden man,

hai dikhlen man sar ăk îngero le Devlesko,

sar le Kristosos Isus.

15 Deci,

kai si tumari bukuria?

Kă phenav tumenghe so dikhlem,

kă te daștisailenas,

înkaladenas i tumare iakha

te den len manghe.

16 Kerdineailem tumaro dușmano,

kă phendem tumenghe o ciacimos?

17 Na gîndosa lacio roden tumen on

kaște aven lența,

dar kamen te durearen tumen amendar,

ka tume len te roden len.

18 Si mișto te roden o miștimos întotdeauna,

na numa kana me sem tumența.

19 Mîră ciave,

anda save pale liles man

ăl dukha le kerimaske,

gi kana o Kristos dikheola andă tumende,

20 te daștivas akanak te avav tumența,

hai te paruav muro glaso!

Ni gianav so te mai pakeav anda tumende!

Dui giuvlea sikavel amenghe e Kris hai e făgăduința

21 Phenen manghe tume

kai kamen te aven talai Kris,

ni așunden so phenel e Kris?

22 Kă si ramome ande Kris

kă le Avraamos sas les dui ciave,

iekh andai roaba

hai iekh andai giuvli slobodo.

23 Kova kai kerdilos andai roaba

sas kerdo sar orso ciavo,

dar kova andai giuvli slobodo

sas kerdo andai făgăduința

kerdi katar o Del.

24 Kadal bukea daștin

te aven lile andă aver felo.

Kadala si dui phanglimata:

iekh pa o Plai Sinai,

kai kerel ciave te aven robi,

kadaia si e Agar.

25 E Agar si sar o Plai Sinai andai Arabia,

hai sar o Ierusalimo kai si akanak,

kă si ande robia andăk than pe ciavența.

26 Dar o Ierusalimo anda o ceri

si slobodo hai si amari dei.

27 Kă si ramome:

„Bukurisao tu stearpo,

ku sea kă ni daștis te avel tut ciave!

De mui hai zbărisar dă bukurie,

ku sea kă ni gianes ăl dukha le kerimaske!

Kă tut,

kai san mukli,

si te avel tut mai but ciave

dă sar kola kai si lan rom.”

28 Kadea phralale hai pheiale,

tume,

sar sas o Isak,

sen ăl ciave făgăduiime katar o Del.

29 Dar sar atunci,

kova kai sas kerdo sar orso ciavo,

kerelas nasul koleske kai kerdilos anda o Duho.

Sa kadea si i akanak.

30 Dar so phenel e Skriptura?

„Gonisar lan kadala roaba hai i lake ciaves,

kă o ciavo le roabako

nai te avel les rig ande moștenirea

le ciavesa le giuvleako slobodo.”^a

31 Kodolaske phralale hai pheiale,

ame ni seam ăl ciave le roabake,

hai seam ăl ciave le giuvleake kai si slobodo.