Trin manușa aven ko Abraham the phenen ke i Șara bares avela
18
1 An iekhe dieseskro baro tatiibo,
kana o Abraham angla la șatrakro udar beșeas
ka le Mamreskre bare cerefavi,
o Dragon Del sikadeas pes leske.
2 The iekhar o Abraham opre dikheas
the dikheas trine manușen save angla leste acile.
Kana vo dikhea len katha la șatrakro udar,
nașeas angla lende,
tele bandieas gii ka phu
3 the ode phendeas:
— Raia,
av kiso lacio,
mangav tut șukar,
te na nakhes pașa tro sogalovos!
4 Mangav tut te mikes te anarav ebuka paniin
tumen te thoven tumare pungre,
the beșen telo cerefavos!
5 Anav ieg kotor mangro te avel tumen zor,
dake ebe kadarde phirdean karig tumaro sogalovos,
the pala kode șei gian pe tumaro drom!
The von ode phende:
— Mișto,
ker sar phendean!
6 O Abraham ghiea sigo an șatra ka Șara
the ode phendeas lake:
— Le sigo ieg vika arro,
parno,
dagastin les the ker miines!
7 The o Abraham nașeas ka ciurda
the lieas iekhe borneuvos,
terno the lacio,
the dinea les ka peskro sogalovos,
the vo kerdeas sigo o hhabo.
8 Pala kode lieas țiral the thud the o mas so kerdeas,
the ciudea len angla lende.
Vo acieas pașa lende telo cerefavos,
the von hhale.
9 Pala kode von ode phende leske:
— Kai hin tri rromni,
i Șara?
The vo ode phendeas:
— Dikh,
an șatra hinii.
10 The vo ode phendeas:
— Pala ieg borș pale avoho tute the dikh,
la Șara,
tra rromnea,
avela la ieg țino ciavo.
I Șara haiarelas pala la șatrakro udar
pala leskro dumo.
11 O Abraham the i Șara phure hasle,
zores phure hasle.
Pe Șara na mai avile o giuiikane butea.
12 I Șara asaneas an peste:
„Akana ko phuribe mai avela man örömosa?
The te morro rrom phuro hino.”
13 The o Dragon Del ode phendeas le Abrahamoske:
— Soske asaneas i Șara:
„Kide avela ke mai keroho iekhe ține cias?
Me phuri hom.”
14 Hin vareso,
so zores pharo hin le Dragone Deleske?
Sar phendeom tuke,
pala ieg borș pale avoho tute,
the la Șara avela la ieg țino ciavo.
15 The i Șara na pringiandeas andre:
— Na asaneom!
Ke has la dar.
The vo ode phendeas:
— Ba igen,
ke tu asanean.
O Abraham manghel pes ko Dragon Del vaș i Sodoma
16 O manușa opre uștiile othar
the dikhle tele karig i Sodoma.
The o Abraham ghieas lența the kișerindeas len.
17 O Dragon Del ode ghindindeas mai delmut:
„Te garuvav me katho Abraham so keroho?
18 Ciaces ke ieg baro neamos zoralo avela andra Abraham,
the aldimen avena pordal leste o saste neamii pe phu.
19 The vaș kode valostindeom le Abrahamos,
kai te sikavel peskre ciavenghe
the peskre neamoske save kerdeona pala leste,
kai te niikeren le Dragone Deleskro drom.
Kana von keren o ciacibo the o lacibo,
o Dragon Del kerela le Abrahamoske so phendeas leske.”
20 Kide ke o Dragon Del ode phendeas:
— O cingaribo vaș i Sodoma the i Gomora baro hino.
Lengro bűnos zores pharo hin.
21 Vaș ode gioho tele te dikhav
ke tear ke kise giungale hine
sar o cingaribo so haiardeom.
Dake na avela kide,
gianoho.
22 Kola manușa riseiile penghe kothar
the ghile penghe karig i Sodoma.
O Dragon Del inke kode acelas anglo Abraham.
23 O Abraham pașel ghieas the ode phendeas:
— Ciaces hin ke mudarehe
te le lacen the te le giungalen an iekhate?
24 Dake avela an foros pancivardeș lace manușa?
Mudarehe o foros,
the na bociatinehe kole thaneske
vaș kala pancivardeș manușa lace save hin an foros?
25 Tu na han kiso kai te keres kede butii,
te mudares le lacen le giungalența!
Kide te avel le lacența sar le giungalența?
Tu na han kiso!
Kodo kon itelinel i sastii phu,
na kerela vo o ciacibo?
26 The o Dragon Del ode phendeas:
— Dake arakhoho pancivardeșe lace manușen an foros Sodoma,
bociatinoho kole saste thaneske vaș lenghe.
27 The o Abraham ode phendeas:
— Dikh,
tromaneom te dumazinav morre Raiaha,
me savo numa uciar hom the phu.
28 Dake mașka kola pancivardeș lace manușa
avena pance manușența mai țarra,
mudarehe tu vaș o panci o sasto foros?
The o Dragon Del ode phendeas:
— Na mudaroho len
dake arakhoho an foros ștarvardeș the panci lace manușen.
29 O Abraham inke ode phendeas leske:
— Hamii dake arakhena kode numa ștarvardeș lace manușen?
The o Dragon Del ode phendeas:
— Na keroho la ince vaș kola ștarvardeș manușa.
30 O Abraham ode phendeas:
— Te na rușes,
mangav tut,
Raia,
kana mai dav duma!
The hamii dake arakhena numa tranda lace manușen kode?
The o Dragon Del ode phendeas:
— Na keroho la,
dake arakhoho tranda lace manușen.
31 O Abraham ode phendeas:
— Dikh,
tromaneom te dumazinav morre Raiaha.
Hamii dake arakhena bișe lace manușen?
The o Dragon Del ode phendeas:
— Na mudaroho len ince vaș kola biș.
32 O Abraham ode phendeas:
— Te na rușes,
mangav tut,
Raia,
kana mai dav duma inke iekhar.
Hamii dake arakhena deș lace manușen kode?
The o Dragon Del ode phendeas:
— Na mudaroho len vaș kola deș.
33 Pala soste dumazindeas le Abrahamoha,
o Dragon Del ghieas peske,
the o Abraham pale riseiieas ka peskro kher.
Ez a mű egy Creative Commons Nevezd meg! - Ne add el! - Ne változtasd! 3.0 licenc alatt van. Másolhatod és terjesztheted a művet bármilyen módon vagy formában. Nem használhatod a művet üzleti célokra.
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)