1 O Jerub-Baxal,a Źudekätori 6:32 phendo i Gedeon, haj saoro poporo kaj sas leça uśtile de texara anθa-i rǎt, haj ćhute pi tabära paśa o Izvoro Xarod (o Izvoro le Daraqo). E tabära le madianicenqi sas k-o nordo lesθar, paśa o plaj More, anθ-e xar. 2 O Raj phendǎs le Gedeonosqe:

— Äl manuś kaj si tuça si prea but ka me te dav le madianicen anθä lenqo vast, kä daśtilas pes ka o Israel te del pes baro angla manθe haj te phenel: «Amaro vast xastradǎs amen!»b Deuteronomo 8:17; Isaja 10:13; 1 Korinteni 1:29; 2 Korinteni 4:7

3 Kodolasqe de duma te aśunen äl manuś: „Kon daral haj izdral, te boldel pes haj te telǎrel kaθar o plaj Galaad!” Haj biś taj duj mi manuś boldinǎjle haj maj aćhile deś mi. 4 O Raj maj phendǎs le Gedeonosqe:

— Sa si but manuś. Ïngǎr len tele p-o paj, haj me va alova len tuqe. Kodova anθa savo va phenava tuqe te ʒal tuça, va ʒala tuça, haj sǎ kodola anθa save va phenava tuqe ta na ʒan tuça, ni va ʒana tuça.

5 O Gedeon ïngǎrdǎs le manuśän k-o paj, haj o Raj phendǎs lesqe:

— Kolen kaj lipäin o paj le ćibaça, kadǎ sar lipäil o ʒukel, te des len rigaθe kaθar sǎ kola kaj bangǒn anθä koćanθe te pen paj!

6 O numäro kolenqo kaj ïngǎrde o vast k-o muj haj lipäiisarde o paj le ćibaça, sas trin śäla murś, haj sǎ o poporo koaver bangile pä koćanθe te pen. 7 O Raj phendǎs le Gedeonosqe:

— Kolença le trine śälença murś save lipäiisarde o paj va xastrava tumen haj va dava le madianicen anθä kǒ vast. Äl manuś kolaver sǎ te telǎren khere!c 1 Samuel 14:6

8 Kola trin śäla lile lenqo xamos haj äl śïnga anθ-äl vast, atunć o Gedeon dinǎs drom khere saorä murśän anθa o Israel, haj ïnkǎrdǎs numa le trine śälen. E tabära le madianicenqi sas tele anθ-e xar lesθar.

9 Anθ-e rǎt kodoja o Raj phendǎs le Gedeonosqe:

— Uśti haj le e tabära, kä dinem lan anθä kǒ vast! 10 Kana si tuqe dar te ʒas te les la, atunć ʒa ke tabära ke sluźitoreça, le Puraça! 11 Haj si te aśunes so den duma haj pala kodoja si te zuraos haj va daśtisa te les e tabära.

Atunć ov haj o Pura, lesqo sluźitori, gele angle ʒi ke rig le tabäraqi, kaj sas äl sträźerǎ.d 1 Samuel 14:9,10 12 Äl madianicǎ, äl amalećicǎ haj äl poporǎ anθa o räsärito sas anθä saorï xar ćordine, but sar äl läkustja. Haj lenqe kämile ni daśtisas te gines len, sas but sar o kiśaj pä rig le pajesqi baro.e Źudekätori 6:5,33

13 Kana areslos o Gedeon, dikh, othe sas äk manuś kaj phenelas pe amalesqe pǒ suno:

— Aśun, dikhlem äk suno. Kerdolas kä äk lipia orzosqi avelas anθ-e tabära le madianicenqi boldindos. Areslis ʒi k-o korto, dinǎs les dab haj kadava pelos p-äk rig le śäreça tele. Kadǎ kä o korto phagilos.

14 Lesqo amal dinǎs les anglal:

— Kadaja naj aver daići, numa e sabia le Gedeonosqi le Joaśosqo, o murś anθa o Israel. O Del dinǎs anθä lesqo vast le madianicen saorä tabäraça.

15 Kana o Gedeon aśundǎs e paramić le sunesqi haj lesqi tälmäćirja, ïnkinosajlos. Haj risajlos anθä tabära le Israelosqi haj phendǎs:

— Uśten, kä o Raj dinǎs anθä tumaro vast e tabära le madianicenqi!

16 Xuladǎs äl trin śäla manuś anθä trin ćhǎθe haj dinǎs fiosaves po-k śïng, haj po-k ulćori nango torcaça astardi anθä lesθe. 17 Haj phendǎs lenqe:

— Te dikhen manθe haj te keren sar manθe! Ita, kana aresava k-o śäro le tabäraqo, te keren so kerav me! 18 Kana me haj kola kaj si mança va phurdasa anθ-äl śïnga, atunć te phurden i tume anθ-äl śïnga ïnkonźurime saorï tabära haj te den muj: «Anθa o Raj haj anθa o Gedeon!»

19 O Gedeon haj e śäl le murśenqi kaj sas leça aresle k-o śäro le tabäraqo k-o ïnćeputo le straźaqo kaθar e paś le reakjaqi, kjar kana parubdonas äl streźerǎ, haj ïnćeposajle te phurden anθ-äl śïnga haj te pharaven äl ulćorǎ kaj sas len anθ-äl vast. 20 Haj äl trin ćhǎθe phurde anθ-äl śïnga haj pharade äl ulćorǎ. Astarde le vasteça o stïngo e torcǎ haj le vasteça le ćaćeça ïnkǎrenas äl śïnga kaśte phurden. Haj dine muj:

— E sabia le Rajesqi haj le Gedeonosqi!

21 Fiosavo aćhilos anθä pǒ than anθ-o źuro le tabäraqo haj sǎ kola anθa-i tabära ïnćeposajle te phiren, te zbärïn haj te naśän. 22 Kana kola äl trin śäla murś phurde anθ-äl śinga, o Raj kerdǎs anθä saorï tabära te ćhindon pes jekh avreça. E armata naślis ʒi ke Bet-Śita, karing e Cerera, ʒi k-o hotari kaθar o Abel-Mehola paśa o Tabat. 23 Äl murś le Israelosqe anθa o Neftali, anθa o Aśer haj anθa saoro Manase sas dine muj, haj on gele pala äl madianicǎ.

24 O Gedeon dinǎ drom manuś k-äl plaja le Efraimosqe te phenen:

— Aven kontra le madianicenqe haj päzin äl paja ʒi k-o foro Bet-Bara haj o Jordano, kaśte na nakhen!

Saorä efrajmicǎ sas dine muj haj päzisardes äl paja ʒi ke Bet-Bara haj k-o Jordano. 25 Astarde le duje baren le madianicenqe, le Orebos haj le Zebos. Le Orebos mudarde les kä äk stïnka kaj akana bućhol e Stïnka le Orebosqi, haj le Zebos kä äk tjasqo kaj akanak bućhol o Tjasqo le Zebosqo. Haj gele palal madianicǎ haj andine äl śäre le Orebosqo haj le Zebosqo k-o Gedeon ïnkǎltar o Jordano.