36
O nǎmo le Esaosqo
Kadala si äl bukǎ kaj kerdiles anθ-o nǎmo Esau, kaj si o Edom. O Esau lilǎ pesqe rromnǎ anθ-äl ćheja le kanaanicenqe: le Ada, e ćhej le hetitosqi Elon, le Oholibama, e ćhej le Anasqi, e nepoata le hevitosqi Cibeon, haj le Basmata, e ćhej le Ismaelosqi, e phej le Nebajotosqi. E Ada kerdǎ le Esaosqe le Elifazos, haj e Basmata kerdǎs le Reuelos. E Oholibama kerdǎs le Jeuśos, le Jaelamos haj le Kores. Kadala si äl ćhave le Esaosqe, kaj kerdinǎjles lesqe anθ-o Them Kanaan. O Esau lilǎs pe rromnǎn, pe ćhaven haj pe ćheǎn, saorä manuśän anθa pǒ kher, äl turme, saorä animalǎ haj sǎ lenqo bravalimos kaj kidǎ les anθ-o Them Kanaan, haj gelos anθä aver them, rigaθe kaθar pǒ phral o Jakov. Kä len sas len but bravalimos, haj kodolasqe ni daśtinas te beśen anθ-äk than: o them kaj on beśenas ni maj areselas len, kä sas len but animalǎ. O Esau laćhardilos p-äl Plaja le Seirosqe. O Esau, savo si o Edom.
Äl ćhave le Esaosqe anθ-o Seir
Kadala si äl bukǎ kaj kerdiles anθ-o nǎmo Esau, o dad le edomicenqo, p-äl Plaja le Seirosqe. 10 Äl anava le ćhavenqe le Esaosqe sas: Elifaz, o ćhavo le Adaqo, e rromni le Esaosqi; haj o Reuel, o ćhavo le Basmataqo, e rromni le Esaosqi. 11 Äl ćhave le Elifazosqe sas o Teman, o Omar, o Cefo, o Gaetam haj o Kenaz. 12 E Timna sas e roaba kaj sas e rromni le Elifazosqi, o ćhavo le Esaosqo. Oj kerdǎs le Elifazosqe le Amalekos. Kadala sas äl nepoci le Adaqe, e rromni le Esaosqi. 13 Äl ćhave le Reuelosqe sas: o Nahat, o Zerah, o Śama haj o Miza. Kadala sas äl nepoci le Basmataqe, e rromni le Esaosqi. 14 Äl ćhave le Oholibamaqe, e ćhej le Anasqi, e nepoata le Cibeonosqi, e rromni le Esaosqi sas o Jeuś, o Jaelam haj o Kore, save oj kerdǎs len le Esaosqe. 15 Kadala si äl fameli le ćhavenqe le Esaosqe: O Elifaz, o ćhavo o angluno le Esaosqo, sas o maj phuro le famelěnqo Teman, Omar, Cefo, Kenaz, 16 Kore, Gaetam haj Amalek. Kadala fameli anθ-o Them Edom si äl ćhave le Elifazosqe, o ćhavo le Adaqo. 17 Kadala si äl ćhave le Reuelosqe, o ćhavo le Esaosqo: äl fameli Nahat, Zerah, Śama haj Miza. Kadala fameli anθ-o Them Edom si äl ćhave le Reuelosqe, o ćhavo le Basmataqo, e rromni le Esaosqi. 18 Kadala si äl ćhave le Oholibamaqe, e rromni le Esaosqi: äl fameli Jeuś, Jaelam haj Kore. Kadala fameli si äl ćhave le Oholibamaqe, e ćhej le Anasqi, e rromni le Esaosqi. 19 Kadala sas äl ćhave le Esaosqe, savo si o Edom, haj kadala si lenqe fameli.
Äl xanamika le Esaosqe
20 Äl ćhave le Seirosqe o horito, kaj beśenas anθ-o them, sas o Lotan, o Śobal, o Cibeon, o Ana, 21 o Diśon, o Ecer haj o Diśan. Kadala si äl fameli le horicenqe, äl ćhave le Seirosqe anθ-o Them Edom. 22 Äl ćhave le Lotanosqe sas o Hori haj o Hemam. (E phej le Lotanosqi sas e Timna.) 23 Äl ćhave le Śobalosqe sas o Alvan, o Manahat, o Ebal, o Śefo haj o Onam. 24 Äl ćhave le Cibeonosqe sas o Aja haj o Ana. O Ana sas kova kaj arakhlǎs äl izvorǎ äl tate anθ-e mulani, kana sas le xärença pe dadesqe le Cibeonosqe. 25 Äl ćhave le Anasqe sas o Diśon haj e Oholibama, e ćhej le Anasqi. 26 Äl ćhave le Diśonosqe sas o Hemdan, o Eśban, o Itran haj o Keran. 27 Äl ćhave le Ecerosqe sas o Bilhan, o Zaavan haj o Akan. 28 Äl ćhave le Diśanosqe sas o Uc haj o Aran. 29 Äl fameli le horicenqe si äl fameli le Lotanosqe, le Śobalosqe, le Cibeonosqe, le Anasqe, 30 le Diśonosqe, le Ecerosqe haj le Diśanosqe. Kadala si äl fameli le horicenqe anθ-o Them Seir.
Äl thagara le Edomosqe
31 Kadala sas äl thagara anθ-o Them Edom ʒi kaj te avel äk thagar p-äl israelicǎ. 32 O Bela, o ćhavo le Beorosqo, sas thagar p-o Edom, haj o anav lesqe forosqo sas Dinhaba. 33 O Bela mulos, haj anθä lesqo than sas thagar o Jobab, o ćhavo le Zerahosqo anθa-i Bocra. 34 O Jobab mulos haj anθä lesqo than sas thagar o Huśam, anθa o them le temanicenqo. 35 O Huśam mulos, haj anθä lesqo than sas thagar o Hadad, o ćhavo le Bedadesqo. Ov sas kaj mardǎs le Madianos anθ-o Them Moab. O anav lesqe forosqo sas Avit. 36 O Hadad mulos, haj anθä lesqo than sas thagar o Samla anθa-i Masreka. 37 O Samla mulos, haj anθä lesqo than sas thagar o Śaul anθa o Rehobot p-o paj. 38 O Śaul mulos haj anθä lesqo than sas thagar o Baal-Hanan, o ćhavo le Akborosqo. 39 O Baal-Hanan, o ćhavo le Akborosqo mulos, haj anθä lesqo than sas thagar o Hadar. O anav lesqe forosqo sas Pau. O anav lesqe rromnǎqo sas Mehetabeel, e ćhej le Matredaki, e ćhej le Mezahabosqi. 40 Fiosavi famelia le Esaosqi sas kerdi anθa lenqe nǎmuri haj lenqe thana bućhonas pala lenqe fameli. Kadala si äl anava lenqe famelěnqe: äl fameli Timna, Alva, Jetet, 41 Oholibama, Ela, Pinon, 42 Kenaz, Teman, Mibcar, 43 Magdiel haj Iram. Kadala si äl fameli le Edomosqe — savo sas o Esau, o dad le edomicenqo — pala lenqe gava, anθä lenqo them.