9
O Del binekuvintisardǎs le Nojas haj lesqe ćhaven:
— Keren ćhave, butǒn haj pheren e phuv! Bari dar tumenθar te avel pä saorä animalǎ sälbatićǎ, pä saorä ćiriklǎ le ćerosqe, pä sǎ so miśkil pe phuv haj pä saorä maćhe le bare pajesqe. Dinem len tumenqe anθä tumare vast. Sǎ so miśkil haj si len viaca te avel tumenqe xamasqe. Sar dinem tumen äl plante zeli, akanak dav tumen sǎ. Numa mas pe viacaça, lesqe rateça, ta na xan! Si te mangav palpale o rat tumare viacaqo; si te mangav les palpale kaθar orso animalo, haj kaθar orso manuś si te mangav palpale e viaca avre manuśäsqi. Kana dakoniva ćhorela o rat äk manuśäsqo, i lesqo rat te avel ćhordo manuśäsθar, kä o Del kerdǎs le manuśäs te avel sar lesθe. Haj tume, keren ćhave haj butǒn! Beśen pä saorä phuv, haj butǒn pä laθe!
O Del maj phendǎs le Nojasqe haj lesqe ćhavenqe kaj sas leça:
Dikh, me kerav äk phanglimos tumença haj tumare ćhavença pala tumenθe, 10 saorä ʒuvindimatença kaj sas tumença: äl ćiriklǎ, äl animalǎ paśa o kher haj äl animalǎ sälbatićǎ kaj sas tumença, saoränça kaj ïnkliste anθa-i korabia haj saorä animalença save va traila pe phuv. 11 Kerav äk phanglimos tumença kä sǎ so trail naj te maj avel tasade, e phuv naj te maj avel rimome pajesθar.
12 Haj o Del phendǎs:
— Dita o semno le phanglimasqo savo kerav les maśkar manθe haj tumenθe haj maśkar saorä ʒuvindimata kaj si tumença, anθ-äk nǎmo anθä aver nǎmo ïntotdjauna: 13 Muro kurkubeo saves laćhardem les anθ-o noro, ov si te avel o semno le phanglimasqo maśkar manθe haj e phuv. 14 Kana va kidava nori opral e phuv, haj o kurkubeo si te sikadǒl anθ-o noro, 15 si te anav manqe gogi kaθar o phanglimos maśkar manθe haj tumenθe haj maśkar sǎ ʒuvindimata kaj train, haj äl paja naj te maj kerdǒn bare kaśte tasaen sǎ so trail. 16 Kana o kurkubeo si te avel anθ-o noro, me si te dikhav lesθe haj si te anav manqe gogi k-o phanglimos o veśniko maśkar o Del haj sǎ ʒuvindimata kaj si pe phuv.
17 Kadǎ phendǎs o Del le Nojasqe:
— Kadava si o semno le phanglimasqo savo kerdem les maśkar manθe haj sǎ so trail pe phuv.
Äl ćhave le Nojasqe
18 Äl ćhave le Nojasqe sas o Sem, o Ham haj o Jafet, haj on ïnkliste anθa-i korabia. O Ham sas o dad le Kanaanosqo. 19 Kadala sas äl trin ćhave le Nojasqe, haj saorä manuś pa-i phuv ïnklistes anθa lenθe.
20 O Noja ïnćeposardǎs te kerel buki e phuv haj ćhutǎs anθ-e phuv äk rez. 21 Pilǎs mol, matilos haj nangilos anθ-o maśkar pe kortosqo. 22 O Ham, o dad le Kanaanosqo, dikhlǎs kä lesqo dad si nango, haj phendǎs avri pe duje phralenqe. 23 Atunća o Sem haj o Jafet liles e mantaua, ćhute lan p-äl dume, geles palpale zejança haj ućhardes o nangimos lenqe dadesqo. On sas palpale zejança, haj ni dikhles o nangimos lenqe dadesqo. 24 Kana o Noja trezosajlos anθa o matimos haj aśundǎs so kerdǎsas lesqe lesqo ćhavo o maj tärno, 25 phendǎs:
— Dino armaja te avel o Kanaan! Te avel o robo maj telal pe phralenqo!
26 Maj phendǎs:
— Binekuvintime te avel o Raj, o Del le Semosqo, haj le Semosqo robo te avel o Kanaan! 27 O Del te del but phuv le Jafetos, ov te beśel bukurǎça paśa o Sem, haj lenqo robo te avel o Kanaan!
28 O Noja traisajlos pala so sas tasadi e phuv trin śäla haj peinda bärś. 29 Saorä ges le Nojasqe sas ïnǎ śäla haj peinda bärś, pala kodoja mulos.