7
E phuv tasadi
O Raj phendǎs le Nojasqe:
— Ïntrisar anθ-e korabia, tu haj saoro kher kiro, käć numa tut dikhlem tut äk manuś ćaćo angla manθe maśkar kola anθa ki vremǎ. Le tuça p-o jefta ʒute anθa saorä animalǎ uźe, äk ʒuto anθa äl animalǎ kaj naj uźe, murś haj ʒuvli, haj sa p-o jefta ʒute anθa saorä ćiriklǎ le ćerosqe, murś haj ʒuvli, kaśte aćhon ʒuvinde fiosavo sojo pä saorï phuv! Kä pala jefta ges si te kerav te del brïśïnd p-e phuv saranda ges haj saranda reakǎ. Kadǎ va khosava pa-i phuv sǎ so kerdem kaj trail.
O Noja kerdǎs sǎ so porunćisardǎ lesqe o Raj. Le Nojas sas les śov śäla bärś kana sas tasadi e phuv.
O Noja ïntrisajlos anθ-e korabia pe ćhavença, pe rromnǎça haj le rromnǎnça lesqe ćhavenqe ta na tasǒn. Anθa-l animalǎ uźe haj anθa-l animale kaj naj uźe, anθa-l ćiriklǎ haj anθa sǎ kaj tïrïl pes p-e phuv, ïntrisajles anθ-e korabia k-o Noja p-o duj, murś haj ʒuvli, kadǎ sar porunćisardǎsas o Del le Nojasqe. 10 Pala jefta ges aviles äl paja te tasaen e phuv. 11 Anθ-o bärś le śove śälenqo anθa-i viaca le Nojasqi, anθ-e le dujenqo ćhon, anθ-o ges le deśieftanqo le ćhonesqo, anθ-o ges kodova ćhindinǎles äl izvorǎ le bare adïnkosqe haj putardes äl stävilarǎ le ćerosqe. 12 Dinǎs brïśïnd p-e phuv saranda ges haj saranda reakǎ.
13 Anθ-o ges kodova ïntrisajles anθ-e korabia: o Noja, o Sem, o Ham haj o Jafet, äl ćhave le Nojasqe, e rromni le Nojasqi haj lença i äl trin rromnǎ lesqe ćhavenqe, 14 on haj saorä ʒuvindimata sälbatićǎ pala lenqo sojo, saorä animalǎ paśa o kher pala lenqo sojo, saorä animalǎ cïjne kaj miśkin p-e phuv pala lenqo sojo, sǎ so xurǎn pala lenqo sojo, saorä ćiriklǎ, sǎ so si len phakǎ. 15 Ïntrisajles k-o Noja anθ-e korabia ʒute anθa sǎ so si ʒuvinde, sǎ so phurden. 16 Murś haj ʒuvli ïntrisajles anθa sǎ so si ʒuvinde, pala sar porunćisardǎsas o Del le Nojasqe. Pala kodoja o Raj phandadǎs o udar pala lesθe.
17 E phuv sas tasadi saranda ges, o paj barǒlas haj vazdǎs e korabia haj oj uśtilis opre pa-i phuv. 18 O paj kerdolas baro haj barilos but p-e phuv, haj e korabia plutjajas p-o paj. 19 O paj barilos sa maj but, haj saorä plaja äl bare kaj si tala saoro ćeri, sas ućharde. 20 Deśupanʒe kujança areslos o paj pa lenθe, ućhardǎs äl plaja. 21 Haj mules sǎ so sas ʒuvindo kaj miśkǎlas p-e phuv, kadikita äl ćiriklǎ, kabor i äl animalǎ paśa o kher haj animalǎ sälbatićǎ, sǎ so tïrïlas pes p-e phuv haj saorä manuś. 22 Sǎ so phurdenas, sǎ so sas p-e phuv śuki, mulos. 23 Sǎ so sas ʒuvinde p-e phuv sas khosle, manuś, animalǎ, animalǎ cïjne haj äl ćiriklǎ le ćerosqe. Sas khosle pa-i phuv. Ni aćhilos dekït o Noja haj kola kaj sas leça anθ-e korabia. 24 O paj sas baro p-e phuv äk śäl haj peinda ges.