36
O Becaleel, o Oholiab haj saorä manuś kaj xakǎrdǒn, saven o Raj kerdǎ len gogǎça haj xakǎrimaça te ʒanen sar te keren o than o sfïnto, träbul te keren sǎ pala sar porunćisardǎsas o Raj.
O poporo anel darurh anθa o korto
O Mojsǎ dinǎs muj le Becaleelos, le Oholiabos haj saorä manuś kaj xakǎrdǒn, saven o Raj kerdǎ len gogǎça, sǎ kola kaj cïrde len o ilo, te aven haj te keren e buki. Liles kaθar o Mojsǎ saorä darurh save andinesas len äl israelicja te keren o than o sfïnto. Haj o poporo sa maj anenas lenqe darurh, anθä fiosavi detexerin. Atunć saorä manuś kaj xakǎrdǒnas, save kerenas saorä bukja k-o than o sfïnto, fiosavo kaθar pi buki, aviles haj phendes le Mojsǎsqe:
— O poporo sa maj anel but maj but dä kabor träbul te keras äl bukja kaj porunćisardǎs o Raj.
O Mojsǎ ćhutǎs te den muj anθ-e tabära:
— Koniva, kä si murś, kä si ʒuvli, ta na maj keren darurh anθa o than o sfïnto!
Kadǎ oprisardǎs le poporos te maj anen darurh. Areslos o materialo anθa saorä bukja, haj i maj aćhilos.