21
O sap le harcomaco
Teleardes catar o Plai o Hor po drom cai înghearel caring o Baro Pai le Trestiengo, caște nachen pașa o Them le Edomosco. O poporo hasardeas pi răbdarea po drom hai dines duma contra le Devleschi hai le Moiseaschi:
— Soste încaladen amen anda o Egipto caște meras and-e mulani? Că nai nici marno, nici pai, hai ciailileam catar cadav hamos chancivalo!
Atuncia o Rai dineas drom contra le poporoschi niște sapa velinime cai dandardes o poporo, cadea că mules but manuș anda o Israelo. O poporo avilos co Moisea hai phendeas:
— Cherdeam bezeh, că dineam duma contra le Raieski hai contra chiri. Rughisao le Raieske, caște durearel amendar cadal sapen!
O Moisea rughisailos anda o poporo. O Rai phendeas le Moiseasche:
— Cher ăc sap hai ciu les păc cașt! Cana daconiva si dandardo hai vardil caring leste, va traiila.
O Moisea cherdea ăc sap harcomaco hai ciutea les păc cașt. Cana daconiva sas halo catar ăc sap hai dichleas caring o sap le harcomaco, traiilas.