21
Ăl love le phivleache
O Isus vazdeas pe iacha hai dichleas le bravalen ciutindos pe daruri and-e visteria le Temploschi. Hai dichleas i ăc phivlea ciorî ciutindos othe dui pareți. Hai phendeas:
— Ciaces, phenav tumenghe: cadaia phivli ciorî ciuteas mai but dă sar sea colaver, că sea cadala ciutes anda so sas len opral. Dar oi ciuteas anda peo ciorîmos, sea so sas lan caște trail.
Ăl phare timpuri cai va avena
Ando timpo so niște manuș denas duma anda o Templo, că sas șucar hureado barănța cuci hai darurența dine anda o Del, o Isus phendeas:
So dichen acanac – si te avel o timpo cana ni va aciola bar pă barăste ta na avel pherado dușmaendar.
On pușle les:
— Sicaiitorina, cana va cherdeona pes sea cadal buchea? Hai savo va avela o semno cai va sicavela că si te cherdeon cadal buchea?
O Isus phendeas:
— Avel tumen grija ta na tharel tumen daconiva! Că but si te aven andă muro anav hai va phenena: «Me sem o Cristos» hai «O timpo si pașă!» Ta na len tumen pala lende! Cana va așunena anda războiende hai răscoalende, ta na daran, că mai anglal trăbul te cherdeon cadal buchea. Dar o sfîrșito nai imedime.
10 Pala codoia phendea lenghe:
— Poporea va uștena contra avre poporenghe, hai thagarimata contra avre thagarimatenghe. 11 Va avela bare izdraiimata phuiache, hai andac than andă aver than, boch hai nasfalimata. Va cherdeola buchea daraiimasche hai va avena bare semnea ando ceri.
12 Dar mai anglal dă sea cadala, andai cauza mîră anaveschi va ciuna o vast pă tumende hai va rodena te cheren tumenghe numa nasul. Va dena tumen andăl vast le sinagogheanghe, va ciudena tumen andăl temnițe, va înghearena tumen angla ăl thagara hai angla ăl guvernatorea. 13 Dar cadal buchea va cherdeona tumenghe caște aven martorea. 14 Cadea că hotărîn tume ta na gîndin tumen mai anglal so va phenena caște apărin tumen! 15 Că va dava tumen vorbe hai goghi savenghe tumare dușmaia ni va daștina te den anglal. 16 Va avena dine andă lenghe vast chear catar tumare dada, tumare phral, tumare neamuri hai tumare amal, hai aver anda tumende va mudarena. 17 Andai cauza mîră anaveschi sea va urona tumen. 18 Dar nici ăc bal anda tumaro șăro ni va hasaola tumenghe. 19 Prin tumari răbdarea va hastravena tumare sufletea.
20 Cana va dichena că o Ierusalimo si înconjurime armatendar, te gianen că pașol o timpo cana va avela distrugime. 21 Atunci, cola andai Iudeea te nașăn păl plaia, cola anda o Ierusalimo te înclen anda leste, hai cola cai si avri anda o foro ta na întrin andă leste, 22 că codola va avena ghesa andă save o Del va pedepsila caște cherdeol sea so si ramome! 23 Vai catar ăl giuvlea save va avena chamnea hai catar cola save den ciucii andăl ghesa codola! Că po them va avena timpuri phare hai va holeaola pes po poporo cadava. 24 Aver manuș va avena mudarde catar e sabia, aver va avena lile prizonerea hai înghearde andă saoră thema, hai o Ierusalimo va avela ușteado andăl pîrne catar aver poporea, gi cana va nachela e vremea le poporenghi.
25 Va avela semnea ando cham, ando cionot hai andăl stele. Hai pe phuv ăl poporea va avena andăl ducha. Ăl mări va tulburina pes hai va urleana, hai ăl manuș ni va gianena so te cheren. 26 Ăl manuș va merena daratar ajuchearindos so va cherdeola pe phuv, căci sea so si baro ando ceri va izdrala. 27 Atunci va dichena le Ciaves le Manușăsco avindos păc noro zuralimasa hai bare slavasa. 28 Cana va începona te cherdeon cadal buchea, orton tumen hai vazden tumare șăre, căci tumaro hastraiimos pașol!
29 Hai phendea lenghe ăc pilda:
— Dichen o smochino hai saoră dafia! 30 Cana dichen că den lenghe patrea, gianen că o milai si pașă. 31 Sa cadea, cana dichen că cherdeon ăl buchea cadala, te gianen că o thagarimos le Devlesco si pașă. 32 Ciaces, phenav tumenghe, că ni va merena saoră manuș save train acana, gi cana va cherdeona saoră buchea cadala. 33 O ceri hai e phuv va nachena, dar mîră vorbe ni va nachena nici ăc data.
34 Len tumari seama, hai na muchen tumare ile te phareon petrecerendar hai matimastar, hai le grijatar cadal viațachi hai cadea o ghes codova te avel pă tumende fără te ajuchearen, 35 sar ăc capcana. Căci o ghes codova va avela pă saoră save beșen pă saorî phuv. 36 Dar te len seama saoro timpo hai te rughin tumen, te daștin te hastran catar saoră buchea cadala save va avena, hai te daștin te beșen le șăresa opre angla o Ciavo le Manușăsco!
37 O ghes, o Isus sicavelas and-e bar le Templosco, hai e reat gialas hai nachavelas lan po plai savo buciol le Măslinengo. 38 Hai detehara andai reat saoro poporo avelas leste co Templo, caște așunen les.