1 O Ierub-Bahal,a Judecători 6:32 phendo i Ghedeon, hai saoro poporo cai sas lesa uștile de tehara andai reat, hai ciute pi tabăra pașa o Izvoro Harod (o Izvoro le Daraco). E tabăra le madianițenghi sas co nordo lestar, pașa o plai More, ande har. 2 O Rai phendeas le Ghedeonosche:

— Ăl manuș cai si tusa si prea but ca me te dav le madianițen andă lengo vast, că daștilas pes ca o Israel te del pes baro angla mande hai te phenel: «Amaro vast hastradeas amen!»b Deuteronomo 8:17; Isaia 10:13; 1 Corinteni 1:29; 2 Corinteni 4:7

3 Codolasche de duma te așunen ăl manuș: „Con daral hai izdral, te boldel pes hai te telearel catar o plai Galaad!” Hai biș tai dui mi manuș boldineaile hai mai acile deș mi. 4 O Rai mai phendeas le Ghedeonosche:

— Sa si but manuș. Înghear len tele po pai, hai me va alova len tuche. Codova anda savo va phenava tuche te gial tusa, va giala tusa, hai sea codola anda save va phenava tuche ta na gian tusa, ni va giana tusa.

5 O Ghedeon îngheardeas le manușăn co pai, hai o Rai phendeas lesche:

— Colen cai lipăin o pai le cibasa, cadea sar lipăil o giuchel, te des len rigate catar sea cola cai bangheon andă cociande te pen pai!

6 O număro colengo cai înghearde o vast co mui hai lipăiisarde o pai le cibasa, sas trin șăla murș, hai sea o poporo coaver banghile pă cociande te pen. 7 O Rai phendeas le Ghedeonosche:

— Colența le trine șălența murș save lipăiisarde o pai va hastrava tumen hai va dava le madianițen andă cheo vast. Ăl manuș colaver sea te telearen chere!c 1 Samuel 14:6

8 Cola trin șăla lile lengo hamos hai ăl șînga andăl vast, atunci o Ghedeon dineas drom chere saoră murșăn anda o Israel, hai încheardeas numa le trine șălen. E tabăra le madianițenghi sas tele ande har lestar.

9 Ande reat codoia o Rai phendeas le Ghedeonosche:

— Uști hai le e tabăra, că dinem lan andă cheo vast! 10 Cana si tuche dar te gias te les la, atunci gia che tabăra che slujitoresa, le Purasa! 11 Hai si te așunes so den duma hai pala codoia si te zuraos hai va daștisa te les e tabăra.

Atunci ov hai o Pura, lesco slujitori, ghele angle gi che rig le tabărachi, cai sas ăl străjerea.d 1 Samuel 14:9,10 12 Ăl madianițea, ăl amalecițea hai ăl poporea anda o răsărito sas andă saorî har ciordine, but sar ăl lăcustea. Hai lenghe cămile ni daștisas te ghines len, sas but sar o chișai pă rig le paieschi baro.e Judecători 6:5,33

13 Cana areslos o Ghedeon, dich, othe sas ăc manuș cai phenelas pe amalesche peo suno:

— Așun, dichlem ăc suno. Cherdolas că ăc lipia orzoschi avelas ande tabăra le madianițenghi boldindos. Areslis gi co corto, dineas les dab hai cadava pelos păc rig le șăresa tele. Cadea că o corto phaghilos.

14 Lesco amal dineas les anglal:

— Cadaia nai aver daiicii, numa e sabia le Ghedeonoschi le Ioașosco, o murș anda o Israel. O Del dineas andă lesco vast le madianițen saoră tabărasa.

15 Cana o Ghedeon așundeas e paramici le suneschi hai leschi tălmăcirea, închinosailos. Hai risailos andă tabăra le Israeloschi hai phendeas:

— Ușten, că o Rai dineas andă tumaro vast e tabăra le madianițenghi!

16 Huladeas ăl trin șăla manuș andă trin ceate hai dineas fiosaves poc șîng, hai poc ulciori nango torțasa astardi andă leste. 17 Hai phendeas lenghe:

— Te dichen mande hai te cheren sar mande! Ita, cana aresava co șăro le tabăraco, te cheren so cherav me! 18 Cana me hai cola cai si manța va phurdasa andăl șînga, atunci te phurden i tume andăl șînga înconjurime saorî tabăra hai te den mui: «Anda o Rai hai anda o Ghedeon!»

19 O Ghedeon hai e șăl le murșenghi cai sas lesa aresle co șăro le tabăraco co începuto le strajaco catar e paș le reacheachi, chear cana parubdonas ăl strejerea, hai începosaile te phurden andăl șînga hai te pharaven ăl ulciorea cai sas len andăl vast. 20 Hai ăl trin ceate phurde andăl șînga hai pharade ăl ulciorea. Astarde le vastesa o stîngo e torțea hai le vastesa le ciacesa închearenas ăl șînga caște phurden. Hai dine mui:

— E sabia le Raieschi hai le Ghedeonoschi!

21 Fiosavo acilos andă peo than ando juro le tabăraco hai sea cola andai tabăra începosaile te phiren, te zbărîn hai te nașăn. 22 Cana cola ăl trin șăla murș phurde andăl șinga, o Rai cherdeas andă saorî tabăra te cindon pes iech avresa. E armata nașlis gi ch-e Bet-Șita, caring e Țerera, gi co hotari catar o Abel-Mehola pașa o Tabat. 23 Ăl murș le Israelosche anda o Neftali, anda o Așer hai anda saoro Manase sas dine mui, hai on ghele pala ăl madianițea.

24 O Ghedeon dinea drom manuș căl plaia le Efraiimosche te phenen:

— Aven contra le madianițenghe hai păzin ăl paia gi co foro Bet-Bara hai o Iordano, caște na nachen!

Saoră efraimițea sas dine mui hai păzisardes ăl paia gi che Bet-Bara hai co Iordano. 25 Astarde le duie baren le madianițenghe, le Orebos hai le Zebos. Le Orebos mudarde les că ăc stînca cai acana buciol e Stînca le Oreboschi, hai le Zebos că ăc teasco cai acanac buciol o Teasco le Zebosco. Hai ghele palal madianițea hai andine ăl șăre le Orebosco hai le Zebosco co Ghedeon închealtar o Iordano.