20
Ăl deș porunci
1 Atunci o Del phendeas saoră vorbe cadala:
— 2 Me, o Rai, sem cheo Del, savo încaladea tut anda o Them le Egiptosco, o them le robeaco.
3 Ta na avel tut aver devla afer dă ma!
4 Ta na cheres tuche idolea, nici daicii caște ameal bucheanța cai si opre ando ceri, nici tele p-e phuv, nici andăl paia mai tele dă sar e phuv! 5 Ta na închinos tut angla lende hai nici te muches tut tsîrdino caște slujis lenghe, că me, o Rai, cheo Del, sem ăc Del cai camav tut numa anda mande. Hai pedepsiv ăl bezeha le dadenghe andăl ciave, gi că le trinengo hai le ștarengo neamo colengo cai uron man, 6 hai sicavav mila cai aciol gi că le miaco neamo anda cola cai iubin man hai așunen mîră porunci.
7 Ta na phenes o anav le Raiesco, che Devlesco bi grijaco, că o Rai ni va arachela bi doșaco coles cai va lela lesco anav bi grijaco.
8 Închear o Ghes le Odihnaco hai sfințosar les! 9 Șov ghes si tu bucheache, caște cheres saorî buchi chire. 10 Dar o le ieftango ghes si o Ghes le Odihnaco ciutino rigate le Raiesche, che Devlesche. Ta na cheres buchi andă leste, nici tu, nici cheo ciavo, nici chi cei, nici cheo robo, nici chi roaba, nici cheo animalo, nici o străiino cai si andă che foruri! 11 Că andă șov ghes cherdeas o Rai o ceri hai e phuv, o baro pai hai sea so si andă lende, hai andă le ieftango ghes hodinisailos. Codolasche binecuvintisardeas o Rai o Ghes le Odihnimasco hai sfințosardea les.
12 Cinstisar che dades hai che da, caște trais but ando them savo del les tuche o Rai, cheo Del!
13 Ta na mudares!
14 Ta na soves avre giuvleasa sau murșăsa cai nai chire!
15 Ta na ciores!
16 Ta na aves ăc martori ohamno contra avrenghi!
17 Ta na cames o cher avresco, ta na cames le romnea avrescherea, nici lesche robos, nici lesche roaba, nici lesche guruves, nici lesche hăres, nici aver buchi cai si avreschi!
18 Saoro poporo dichelas ăl bubuiimata, ăl strafaiimata, o așunimos le trîmbițaco hai o plai thuvesa. Cana o poporo dichleas, izdraies, beșles dur 19 hai phendes le Moiseasche:
— De amenghe duma tu, si te așunas ciaces! Dar ta na del amenghe duma o Del, caște na meras!
20 O Moisea phendeas le poporosche:
— Na daran, că o Del avilos caște ciul tumen ch-e proba hai te avel tumen leschi dar, ta na cheren bezeh.
21 O poporo beșelas dur, dar o Moisea ghelos co noro calo andă savo sas o Del.
O Del phenel sar te cheren o altari
22 O Rai phendeas le Moiseasche:
— Cadea te des duma le israelițenghe: «Pentrucă dichlen că anda o ceri dinem tumenghe duma, 23 na cheren aver devla anda ruposte, na cheren devla sumnacasche anda tumende, 24 dar cher manghe ăc altari phuiaco! Pă leste an phabarimata dă sea hai jertfe paceache: brachea, buznea hai guruva! Orcai va anava tuche goghi muro anav, si te avav tute hai si te binecuvintiv tut. 25 Cana anda barănde si te vazdes manghe ăc altari, na vazde les anda barănde cioplime! Că, cana cheresa buchi daltasa leste, si te mahris les. 26 Na vazde muro altari scărența, caște na dicheol cheo nanghimos pă leste!»
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.