30
Cana o Israel va ortola pes co Rai
Cana va cherdeola saoră buchea cadala, e binecuvîntarea hai e armai anda save dinem tuche duma, atunci si te anes tuche goghi lendar ando mașcar saoră neamurengo andă save gonisardea tut o Rai, cheo Del. Hai cana va risa tut co Rai, cheo Del, hai cana va așunesa lestar, anda saoro ilo chiro hai anda saoro sufleto chiro, tu hai che ciave, sa cadea sar porunciv tuche aghes, atunci o Rai, cheo Del si te boldel tut andai robia, va avela les mila tutar, hai pale va chidela tut anda o mașcar saoră poporengo andă savo pharadea tut o Rai, cheo Del. Chear cana avesa gonime gi ch-e rig le ceroschi, chear i othar va chidela tut o Rai, cheo Del, hai i othar va anela tut.
O Rai, cheo Del va anela tut ando them savo lenas les anda lende che dada, hai va lesa les anda tute. Si te cherel tuche mișto hai va butearela tut mai but dă sar che daden. O Rai, cheo Del va cinela împrejur cheo ilo hai o ilo che ciavengo, te iubis le Raies, che Devles, anda saoro ilo chiro hai anda saoro sufleto chiro, caște trais. O Rai, cheo Del va anela saoră armaia cadala pă che dușmaia, pă cola cai urîn tut hai phirde pala tute. Hai tu va risa tut co Rai, va așunesa lestar, hai va cheresa saoră porunci cadala save dav len tuche aghes. O Rai, cheo Del va dela tut but sporo andă saoră buchea che vastenghe, le rodos che pîntecosco, o rodo che animalengo hai o rodo che phuiaco. Că o Rai va bucurila pes pale te cherel tuche mișto, sar bucurilas pes che dadendar, 10 cana va așunesa catar o Rai, cheo Del, te păzis ăl porunci hai ăl crisimata lesche ramome ando lil cadava le sicaiimasco, cana va risa tut co Rai, cheo Del saoră ilesa chiro hai saoră sufletosa chiro.
11 E porunca cadaia, savi dav lan tuche aghes, nai prea phari anda tute, nici prea dur tutar. 12 Nai ando ceri, caște phenes: «Con va uștela anda amende ando ceri te anel lan amenghe, te cherel amen te așunas hai te cheras?» 13 Nai nici închealtar o pai baro, caște phenes: «Con va nachela anda amende închealtar o baro pai te anel lan amenghe, te cherel amen te așunas hai te cheras?» 14 Dich, si cadea dă pașă tutar, andă cheo mui hai andă cheo ilo, caște cheres lan!
15 Ita ciav aghes angla tute e viața hai o miștimos, o mulimos hai o nasulimos, 16 că aghes porunciv tuche te iubis le Raies, che Devles, te phires pă lesche droma hai te cheres lesche porunci, lesche crisimata hai leschi cris, caște trais hai te buteos hai ca o Rai, cheo Del, te binecuvintil tut ando them cai gias te les les anda tute. 17 Dar cana cheo ilo va parubdola, cana ni va așunesa hai muchesa tut thardo te bangheos angla aver devla hai te slujis lenghe, 18 atunci phenav tumenghe aghes că va merena ciaces, nai te train but ando them cai naches o Iordano te les les anda tute. 19 Aghes lav o ceri hai e phuv martori contra tumari: e viața hai o mulimos ciutem angla tute, e binecuvîntarea hai e armai. Alosar e viața, caște trais, tu hai che ciave! 20 Alosar e viața, iubindos le Raies, che Devles, așunindos lestar hai închearindos lestar! Că ov del tut viața hai but ghes, caște beșes p-e phuv anda savi haleas sovel o Rai che dadenghe, le Avraamosche, le Isacosche hai le Iacovosche că va dela lan lenghe.