2
O avimos le Duhosco Sfînto
Cana avilos o ghes le Peiindango,* O ghes le Peiindango sas o ghes cana ăl evreea sărbătorinas o chidimos le ghivesco, dich o Levitico 23:15-16 hai o Deuteronomo 16:9-11. Sas peiinda ghesa mai pala o ghes o baro le Nachimasco hai sas iech andal bare ghesa andă save ăl evreea gianas co Ierusalimo. ăl ucenicea sas chidine sea andăc than. Andac data, avilos anda o ceri ăc vuieto sar ăc vîjimos bravaleaco zurali hai pherdeas saoro cher cai beșenas on. Atunci dichles daiicii sar niște ciba iagache save pharadiles hai ciute pes po iech pă fiosavo anda lende. Hai sea pherdiles Duho Sfînto hai începosailes te den duma andă aver ciba, pala sar delas len o Duho zuralimos te den duma.
Atunci arachadonas ando Ierusalimo evreea, murș save iubisardes le Devles, anda saoră poporea cai si p-e phuv. Cana așundineailos o mui le ucenicengo, saoră manuș chidineailes hai aciles încremenime, că fiosavo așunelas că denas duma andă leschi cib. Hai sea mirinas pes, minuninas pes hai phenenas iech avresche:
— Dich, sea cadala cai den duma, nai andai Galileea? Atunci sar așunas că den duma fiosavesche andă amari cib, andă savi cherdineaileam? Mașcar amende si parți, mezi hai elamiți hai manuș andai Mesopotamia, Iudeea hai Capadociia, anda o Pont hai Asia, 10 andai Frigiia hai Pamfilia, anda o Egipto hai andal riga le Libiache pașai Cirena, si cathe oaspeți andai Roma, 11 evreea hai aver cai nachles ch-e religiia le evreenghi, hai manuș andai Creta hai Arabia. Hai așunas sar den duma andă amare ciba andal buchea minunime le Devlesche!
12 Sea mirinas pes, ni gianenas so te pachean hai phenenas iech avresche:
— So daștil te hacheardeol cadaia?
13 Dar aver marenas pesche joco hai phenenas:
— Si mate!
O Petre del duma le manușănghe cai si chidine
14 Atunci o Petre uștilos andă pîrnende, colența ăl deșuiech, hai mosa zuralo phendea lenghe:
— Phralale evreea, hai tume sea cai beșen ando Ierusalimo, te gianen cadai buchi hai așunen mîră vorbe! 15 Ăl manuș cadala nai mate, sar pachean tume, că si numa înea detehara! 16 Ni, sea so dichen acanac si ăl buchea anda save ramosardeas o prooroco Ioel:
17 «O Del phenel: Andăl ghesa ăl palune
va ciorava anda muro Duho pă orso manuș:
tumare ciave hai tumare ceia va proorocina,
tumare tărnen va avela len dichimata,
hai tumare phuren va avela len sune!
18 Da, chear pă mîră robi hai pă mîră roabe
va ciorava anda muro Duho andăl ghesa codola,
hai va proorocina.
19 Va cherava minuni opre ando ceri
hai semnea tele p-e phuv,
rat, iag hai noro thuvesco.
20 O cham va avela parubdo ando întunearico,
hai o cionot va cherdeola sar o rat.
Pala codoia va avela o ghes le Raiesco, baro hai pherdo slava.
21 Atunci orcon va dela mui
o anav le Raiesco te ajutil les,
va avela hastrame.»a Ioel 2:28-32
22 Phralale israelițea, așunen ăl vorbe cadala! O Isus anda o Nazaret sas ăc manuș sicado catar o Del tumenghe că avilos lestar, prin ăl fapte zurale, ăl minuni hai ăl semnea save cherdea len o Del prin leste andă tumaro mașcar, pala sar mișto gianen. 23 Le manușăs cadales, savo sas bichindo, sar sas o plano le Devlesco hai sar giangleas mai anglal că va cherdeola pes, tume răstignisarden les hai mudarden les prin o vast colengo cai ni gianen e Cris le Devleschi. 24 Dar o Del înviosardea les nimicindos ăl ducha le mulimasche, că ni daștilas pes te avel încheardo catar o mulimos. 25 Că o David phenel anda leste:
«Dichavas mereeo le Raies angla mande.
Anda codoia că ov si că mîrî ciacii,
me ni va legăniva man.
26 Codolasche bucuril pes muro ilo hai mîrî cib ghilabel,
hai muro trupo va traiila ande nădejdea:
27 că ni va muchesa muro sufleto ando Cher le Mulimasco
hai ni va muchesa ca cheo sfînto te cherneol.
28 Sicadean manghe o drom caring e viața,
hai că san manța, va desa man bucuria.»b Salmi 16:8-11
29 Phralale, daștiv te phenav tumenghe ciacimasa că amaro phuro o David mulos hai sas prahome. Lesco than le prahomasco si andă amaro mașcar gi ando ghes dă aghes. 30 Anda codoia că o David sas prooroco hai gianelas că o Del phendeasas lesche soveleasa că va ciula ieches anda lesche ciave cai va avela pala leste pă lesco scauno 31 hai dichleas mai angle, codolasche dineas duma andai învierea le Cristososchi: nas muclo ando Cher le Mulengo, nici lesco trupo ni chernilos. 32 Cadal Isusos o Del înviosardea les, hai ame sea seam martorea cadal bucheaco. 33 Hai acanac că sas vazdino opre te beșel ch-e ciacii le Devleschi hai primisardeas catar o Dad o Duho Sfînto savo sas phendo că va dela pes, ciordea les pă amende: cadaia si so dichen hai așunen acanac. 34 Cu sea că o David ni uștilos ando ceri, ov phenel:
«O Rai phendeas mîră Raiesche:
Beș că mîrî ciacii,
35 gi cana va ciava che dușmaien
tala che pîrne!»c Salmi 110:1
36 Cadea că te gianel mișto saoro cher le Israelosco că cadal Isusos, saves tume răstignisarden les, o Del cherdea les Rai hai o Cristos!
37 Cana așundes cadala, on sas dine dab ando ilo hai phendes le Petresche hai colavrenghe apostolea:
— Phralale, so te cheras?
38 O Petre phendea lenghe:
— Bolden tumen co Del, hai fiosavo anda tumende te avel boldo ando anav le Isusosco Cristos, caște avel iertime tumare bezeha! Hai va primina o Duho Sfînto sar daro. 39 Căci e făgăduința cadaia si anda tumende, anda tumare ciave hai anda sea cai si dur, saorăn saven va dela mui o Rai, amaro Del.
40 Hai bute avre vorbența avertizilas len hai rughilas len:
— Hastran anda o mașcar cadal manușăngo rimome save train acanac!
41 Cadea că save primisardes lesche vorbe sas bolde, hai ando ghes codova ciute pes pașa lende cam trin mi manuș.
O phanglimos le phralengo
42 On camenas but te sicheon catar ăl apostolea, te aven len ăc phanglimos phralicano, te phaghen o marno hai te rughin pes. 43 Ăl apostolea cherenas but minuni hai semnea, hai saorî lumea sas pherdi dar. 44 Sea cai pacheanas sas andăc than, hai hulavenas mașcar peste sea so sas len. 45 Bichinenas pe phuia hai ăl buchea cai sas len, hai ăl love hulavenas len mașcar peste, pala sar trăbulas fiosaves. 46 Andă fiosavo ghes sea ăc gîndosa maladeonas co Templo, hai phaghenas o marno andă pe chera. Hai hanas andăc than bucuriasa hai ilesa ujo. 47 Lăudinas le Devles hai sas po placo saoră poporosco. Hai o Rai barearelas o grupo colența cai sas mîntuiime andă fiosavo ghes.

*2:1 O ghes le Peiindango sas o ghes cana ăl evreea sărbătorinas o chidimos le ghivesco, dich o Levitico 23:15-16 hai o Deuteronomo 16:9-11. Sas peiinda ghesa mai pala o ghes o baro le Nachimasco hai sas iech andal bare ghesa andă save ăl evreea gianas co Ierusalimo.

a2:21 Ioel 2:28-32

b2:28 Salmi 16:8-11

c2:35 Salmi 110:1