17
O Isus rughil pes anda peste
Pala so phendeas kadal bukea, o Isus vazdeas pe iakha karing o ceri hai phendeas:
— Dade, avilo o ciaso! Sikav kabor dă baro si keo Ciavo, ka i keo Ciavo te sikavel kabor dă baro san tu, pala sar dinean les zuralimos pă saoră manuș, kaște del len viața veșniko saorăn kolen saven dinean len leske tu. Hai kadaia si e viața veșniko: te pringianen tut tut, o korkoro Del ciacio, hai ⸤man⸥, le Isusos Kristos. Me sikadem kabor dă baro san tu pe phuv, kă termenisardem e buki savi dinean lan manghe te kerav lan. Hai akanak, Dade, sikav kabor dă baro sem me angla tute, kabor dă baro semas tusa gi kai te avel kerdi e lumea.
O Isus rughil pes anda pe ucenicea
Kerdem pringiando keo anav le manușănghe save dinean len manghe andai lumea. Kire sas on, hai tu dinean len manghe hai on așundes katar ke vorbe. Akanak on gianen kă sea so dinean man, si tutar, anda kodoia kă dinem len ăl sikaiimata kai tu dinean len manghe, hai on lile len. Hai ciaces gianen kă me avilem tutar hai pakean kă tu dinean man drom. Anda lende rughiv man. Ni rughiv man andai lumea, hai anda kola saven dinean len manghe tu, kă si kire. 10 Sea so si muro si kiro hai so si kiro si muro. Hai on sikaven kabor dă baro sem me. 11 Me avav tute kadea kă ni mai sem ande lumea, dar on si ande lumea. Sfîntona Dade, păzisar len andă keo anav, savo tu dinean les manghe, ka on te aven iekh kadea sar seam ame. 12 Kabor timpo semas lența, păzisardem len me andă keo anav, savo tu dinean les manghe. Păzisardem len me hai ni hasailos nici iekh anda lende, numa kova kai trăbulas te hasaol, kaște kerdeol so phenel e Skriptura. 13 Dar akanak avav tute, hai phenav kadal bukea kabor mai sem ande lumea, ka len te avel len mîrî bukuria pherdi andă lengo ilo. 14 Dinem len keo kuvînto, hai e lumea urosardea len kă on nai le lumeake, kadea sar nici me ni sem le lumeako. 15 Ni rughiv tut te les len andai lumea, hai te păzis len katar o nasul. 16 On nai le lumeake, kadea sar nici me ni sem le lumeako. 17 Sfințosar len le ciacimasa! Keo kuvînto si o ciacimos. 18 Kadea sar tu dinean man drom man ande lumea, sa kadea dinem len i me drom len ande lumea. 19 Sfințov man anda lende, kodolaske ka i on te aven sfințome ciaces.
O Isus rughil pes anda saoră kola kai va pakeana andă leste
20 Me ni rughiv man numa anda lende, hai i anda kola kai va pakeana andă mande kana așunen lenghe vorbe, 21 ka sea te aven iekh, kadea sar tu, Dade, san andă mande, hai me sem andă tute. Rughiv man ka on te aven andă amende, ka e lumea te pakeal kă tu dinean man drom. 22 Dinem len e slava savi tu dinean lan manghe, ka on te aven iekh, sa kadea sar ame seam iekh. 23 Me andă lende, hai tu andă mande, ka on te kerdeon ciaces iekh, hai e lumea te gianel kă tu dinean man drom hai kă iubis len, sar iubis man i man. 24 Dade, kamav ka othe kai sem me te aven i kola saven dinean len manghe, ka on te dikhen mîrî slava, e slava savi dinean lan manghe tu, kă iubisardean man mai anglal gi kai te kerdeol e lumea. 25 Ciaceia Dade, e lumea ni pringianel tut, dar me pringianav tut, hai kadala gianen kă tu dinean man drom. 26 Kerdem lenghe pringiando keo anav,a Ioan 12:28 hai si te mai kerav les pringiando, ka e dragostea kai sikadean lan manghe tut, te avel andă lende hai me te avav andă lende.

a17:26 Ioan 12:28