5
Ăl ciave le Devleske biruin prin o pakeamos
1 Sea kai pakean kă o Isus si o Kristos si ciave le Devleske. Sea kai iubin ăk dades, iubin i leske ciaves. 2 Kadea gianas kă iubis le ciaven le Devleske: kă iubis le Devles hai keras leske porunci. 3 Kă te iubin le Devles si te keras so phenel ov. Hai leske porunci nai phare, 4 kă sea kai si ăl ciave le Devleske biruin e lumea. Hai kadea biruis e lumea: prin amaro pakeamos. 5 Kon biruil e lumea, kana na kova kai pakeal kă o Isus si o Ciavo le Devlesko?
6 Ov, o Isus Kristos, si kova kai avilos paiesa hai ratesa. Na numa paiesa, dar paiesa hai ratesa. O Duho si kova kai phenel o ciacimos andai buki kadaia, kodolaske kă o Duho si o ciacimos. 7 Trin si kai phenen o ciacimos: 8 o Duho, o pai hai o rat, hai kadal trin phenen sa kadav ciacimos. 9 Ame deja las e mărturia le manușănghi, atunci trăbul te pringianas kă e mărturia le Devleski si mai bari. Hai kadaia si e mărturia le Devleski, savi phendea lan ov anda peo Ciavo. 10 Kova kai pakeal ando Ciavo le Devlesko si les e mărturia kadaia andă lesko ilo. Kova kai ni pakeal so phendeas o Del, kerel les ohamno, anda kodoia kă ni pakeal e mărturia savi phendea lan o Del anda peo Ciavo. 11 Hai e mărturia si kadaia: o Del dinea amen e viața veșniko, hai kadai viața si andă lesko Ciavo. 12 Koles kai si les le Ciaves si les e viața, koles saves nai les le Ciaves le Devlesko nai les e viața.
Gianas kă si amen viața akanak hai totdeauna
13 Ramosardem tumenghe kadal bukea kaște gianen kă si tumen e viața veșniko, tume kai pakean ando anav le Ciavesko le Devlesko 14 Hai si amen o pakeamos kă kana rughis amen, hai kana mangasa daicii pala leski voia, ov așunel amen. 15 Hai, kana gianas kă așunel amen orso mangasas, gianas kă si amen deja ăl bukea save mangleam len lestar.
16 Kana dakoniva dikhel pe phrales kerindos ăk bezeh kai ni înghearel ko mulimos, te rughil pes, hai o Del va dela les viața. Kadaia si anda kola save ni kerdes ăk bezeh kai înghearel ko mulimos. Si i bezeh kai înghearel ko mulimos. Ni phenav te rughil pes anda o bezeh kadava. 17 Saoră biciacimata si bezeh, dar si bezeh kai ni înghearel ko mulimos.
18 Gianas kă orsavo kai si ciavo le Devlesko ni trail ando bezeh, hai o Ciavo le Devlesko păzil les, hai o nasul ni makhel pes lestar. 19 Gianas kă seam le Devleske, hai kă saorî lumea pașlol ando nasulimos. 20 Gianas kă o Ciavo le Devlesko avilos hai kerdeas te daștis te pringianas le Devles e ciaces. Hai ame seam andă kova kai si ciacio, prin lesko Ciavo, o Isus Kristos. Ov si o Del o ciacio hai e viața veșniko. 21 Ciavorale, păzin tumen katar ăl idolea! Amin.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.