4
Ăl proorocea ohamne
1 Mîră gugle, ande lumea si but proorocea ohamne, kadea kă na pakean orso duho ⸤savesa ăl manuș den duma⸥, hai dikhen kana ăl duhuri si katar o Del!a Deuteronomo 13:1-3 2 Le Duhos le Devlesko daștin te pringianen les kadea: saoră duhuri kai marturisin o Isus sar o Kristos, savo avilos ando trupo, si katar o Del. 3 Hai saoră duhuri kai ni marturisin kadaia anda o Isus nai katar o Del. Kadava si o duho le dușmanosko le Kristososko, anda savo așunden kă va avela hai akanak si deja ande lumea.
4 Tume, ciavorale, sen le Devleske, hai biruiisarden le dușmanos, kă kova kai si andă tumende si mai baro dă sar kova kai si ande lumea. 5 Ăl proorocea ăl ohamne si le lumeake, kodolaske den duma sar andai lumea, hai e lumea așunen lendar. 6 Dar ame seam le Devleske. Kon pringianel le Devles așunen amendar, kon nai le Devlesko ni așunen amendar. Prin kadaia pringianas o Duho le ciacimasko hai o duho le ohaiimasko.
So si e dragostea ciacii?
7 Mîră gugle, te iubis amen iekh pă aver, kă e dragostea si katar o Del. Sea kai iubin si ciave le Devleske hai pringianen le Devles. 8 Kon ni iubil ni pringianel le Devles, kă o Del si dragostea. 9 E dragostea le Devleski sikadilis mașkar amende kadea: o Del dinea drom ande lumea pe korkoro Ciaves, ka ame te trais prin leste. 10 Kadaia si e dragostea ⸤e ciacii⸥: na kă ame iubisardeam le Devles, hai kă ov iubisardea amen hai dinea drom pe Ciaves ka jertfa anda amare bezeha. 11 Mîră gugle, kana kadea iubisardea amen o Del, trăbul te iubis amen i ame iekh pă aver.
Kana o Del si andă amende, atunci iubis amen iekh pă aver!
12 Konik ni dikhleas dakdata le Devles. Dar kana iubis amen iekh pă aver, o Del aciol andă amende, hai leski dragostea pherel amen. 13 Hai kadea gianas kă acios andă leste hai kă ov aciol andă amende: kă dinea amen peo Duho. 14 Hai ame dikhleam hai phenas o ciacimos i avrenghe, kă o Dad dineas drom pe Ciaves kaște hastravel le lumea. 15 Kana dakoniva phenel o ciacimos, kă o Isus si o Ciavo le Devlesko, o Del aciol andă leste, hai ov ando Del. 16 Ame pringiandeam hai pakeaiam ande dragostea savi si le Devles anda amende.
O Del si dragostea, hai kova kai aciol ande dragostea, aciol ando Del, hai o Del aciol andă leste. 17 Kadea kă e dragostea pherel amen kaște avas bi darako ando ghes le krisako, anda kodoia kă sar si o Isus, kadea seam i ame ande lumea kadaia. 18 Ande dragostea nai dar, hai e dragostea pherdi gonil e dar. Kon daral katar e pedeapsa, e dragostea ni aresli kă peo skopo. 19 Ame iubis, anda kodoia kă ov iubisardea amen anglal. 20 Kana dakoniva phenel: „Me iubiv le Devles”, dar urol pe phrales, si ăk ohamno. Kă, savo ni iubil pe phrales, saves daștil te dikhel les, ni daștil te iubil le Devles, saves ni daștil te dikhel les. 21 Hai kadaia si e porunka savi si amen lestar: kon iubil le Devles te iubil i pe phrales!
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.