O Iakov
3
Sar te avel amari cip?
Phralale, pheneale, te na kamen but gine mașka tumende te aven tonara an khanghiri, ke gianen ke mai pharo iteletos avela amen ⸤le tonaran⸥. Ke o saste vetkezinas an but feli. Dake na vetkezinel varekon an peskri duma, kodo hin ieg manuș tökeleteșon, gianel te hhudel pale te peskro sasto teștos.
Dake cias i zobola le grastenghe an lengro mui, kai te haiaren pala amende, kide gianas te tradas le grasten, save bare hine. Te o cionoki bare șei te aven, he hine trane katho zorale barvaia. Se numa hine vezetimen katha ieg ținii bota kai kamel o manuș. Se kide hin te i cip. Hin ieg țino kotor andra manuș, de lașarel pes bare buteanța.
Ghindinen tumen, ke ieg ținii iag șei labarel ieg baro veș. Te i cip iag hinii, hinii pherdii giungaiimaha. I cip hin kodo kotor andra amende, savo meiarel o sasto teștos, he labarel amari viața katha amaro terniibo gii ka amaro phuribo. Kede iag hinii labardii katha gehena, hinii inditimen katho benk.
Sekkonfeli aloti, o bare aloti, o cirikle, o ține aloti the le panieskre aloti șei te sikavel o manuș, he o manușa te sikade len. De i cip khagino na gianel te sikavel la. Hin ieg giungaiibo so naștiik aciaves la, pherdii hinii merimaskre mergoha.
La cibaha lașaras le Raias, amare Dades, de se kola cibaha atkozinas le manușen, save kerdiile te mezinen le Deleske. 10 Se andra kodo mui avel ari te kana lașaras le Deles, he te kana atkozinas le manușen. Phralale, pheneale, na kampelas te avel kide! 11 Andra ieg forașis, andra ieg hhu, naștiik te thadel te lacio paniin he te giungalo paniin. 12 Phralale, pheneale, șei te kerel i khiveina măslines, vodi i rez khie? Se kide ieg londo forașis naștiik te del lacio paniin.
O godeaveribo die opral, katho Del, anel bekeșegos
13 Kon hin mașka tumende mai godeaver, he kon gianel mai but? Kodo kide te sikavel ke godeaver hino, pe ode ke leskri viața lacii hinii he ke kerel lace butea kise olazotoha, savo andra godeaveribo avel. 14 De dake an tumaro vodii zores iridielinen he kamen te aven mai bare sar avera, okor na lașaren tumen ke godeaver han he na hhohhaven kolaha o ciacibo. 15 Kiso »godeaveribo« na avel die opral, katho Del, ke hino pa phu, kodothar avel so kamen o manușa he hino katho benk. 16 Ke dake o manușa iridielinen he dake kamen te aven mai bare sar aver, okor o manușa den pen he keren sekon felon giungaiibo. 17 Kana o Del del varekas godii die opral, kodo manuș hin legsighider jujo vodieskro, ceeol les o bekeșegos sekkonehe, avrența șukar phiravel pes, phutrido vodieskro hino, lace vodieskro hino he vazdel le manușen, se ieg hin leske o manușa he nanii ketsinüvon. 18 Kola save vazden averen te bekülinen ari, ültetinen an bekeșegos o mogos savo anel o lacibo.