🏠 <     Alfabeto le literasa „k”     Alfabeto le literasa „c”
O salmo 103
Muro ilo te binekuvintil le Rajes
Äk gili le Davidosqi
1 Binekuvintisar,
muro ilo,
le Rajes,
haj sǎ so si anθä manθe te binekuvintil lesqo anav o sfïnto!
2 Binekuvintisar,
muro ilo,
le Rajes,
haj na bistar saorä bukǎ laćhe save kerdǎ len tuça!
3 Ov jertil saorä bezexa kire,
sastǎrel saorä nasfalimata kire.
4 Xastravel ki viaca anθa o mulimos,
ćhul pi mila kaj aćhol haj pi ïndurarǎ
sar koroana pä kǒ śäro
5 haj ćajlǎrel tut laćhimaça kabor trais
ka te kerdǒs tärno pale sar vulturo.
 
6 O Raj kerel o ćaćimos,
kerel kris anθa kola kaj si uśtǎde anθ-äl pïrne.
7 Sikadǎs pe droma le Mojsǎsqe
haj pe bukǎ le israelicenqe.
8 O Raj si pherdo dragostja haj laćhimos,
ni xolǎol sigo haj lesqi but mila aćhol.a
9 Ni va xala pes ïntotdjauna
haj ni va ïnkǎrela xoli pä već.
10 Ni kerel amenqe pala amare bezexa,
ni pokinel amen pala amari doś.
11 Kabor si o ćeri dä opre kaθar e phuv,
kadiki dä zurali si lesqi mila kaj aćhol karing kola kaj daran lesθar.
12 Kabor dä dur si kaj ïnklel o kham kaθar kaj perel,
kadiki dä but durǎrel ov amenθar amari doś.
13 Haj sar si äk dades mila kaθar pe ćhave,
kadǎ si mila le Rajes kaθar kola kaj daran lesθar.
14 Kä ʒanel anθa sosθe sǎm kerde,
anel pesqe gogi kä sǎm phuv.
 
15 E viaca le manuśänqi si sar e ćar.
Ïnfloril sar e lulugi poa kïmpo,
16 haj kana śukǎrel lan äk braval,
ma naj,
ni maj dikhǒl.
17 Dar e mila le Rajesqi kaj ni termenil pes si danglal
haj si pentru ïntotdjauna anθa kola kaj daran lesθar,
haj lesqo ćaćimos aćhol anθa äl ćhave lenqe ćhavenqe,
18 anθa kola kaj päzin lesqo phanglimos
haj anen pesqe gogi kaθar lesqe porunć,
kaśte keren len.
19 O Raj laćhardǎs pǒ skauno le thagarimasqo anθ-o ćeri
haj ov stäpïnil pä sǎ.
20 Binekuvintin le Rajes,
lesqe ïnʒerǎ,
tume äl zurale kaj keren lesqi vorba
haj kaj aśunen kaθar o glaso lesqe vorbaqo!
21 Binekuvintin le Rajes,
saorï armata lesqi,
lesqe sluźitorǎ,
save keren lesqi voja!
22 Binekuvintin le Rajes,
saorä bukǎ lesqe,
orkaj si thagar!
Binekuvintisar,
muro ilo,
le Rajes!