🏠 <     Alfabeto le literasa „k”     Alfabeto le literasa „c”
O salmo 2
O thagar, o ćhavo le Devlesqo
1 Sosθe den duma ćorjal äl njamuri,
äl poporǎ sosθe keren planuri kaj ni daśtin te keren len?
2 Äl thagara le phuǎqe uśten,
äl stäpïja den pes duma
kontra le Rajesqi
haj kontra kolesqi saves makhlǎ les te avel thagar:
3 „Te ćhinas lenqe lancuri,
te xastras amen kaθar lenqe śäle!”
4 Kova kaj beśel anθ-o ćeri p-o skauno le thagarimasqo asal,
o Raj marel pesqe źoko lenθar.
5 Pala kodoja,
anθä lesqo xolǎrimos,
del lenqe duma,
nasul darael len pe bare xolǎça haj phenel:
6 „Me korkoro ćhutem
mïrä thagares p-o Siono,
muro plaj o sfïnto.”
7 O thagar phenel:
„Si te phenav o krisimos le Rajesqo.
Phendǎ manqe:
«Tu san muro ćhavo!
Ages kerdem tut.
8 Mang manqe te kerav ki rig le njamuren,
äl riga le phuǎqe te aven kire.
9 Va ïnkhǎresa len äk rovlǎça sastresqi,
va pharaesa len sar äk piri phuǎqi.» ”
10 Haj akanak,
thagaraǃle,
aven gogǎça!
Avel tumen griźa,
krisitorǎ le phuǎqe!
11 Sluźin daraça le Rajesqe
haj den muj izdrandos!
12 Den ćinstja le ćhaves!
a
Aver felo va xolǎola,
haj si te xasaon p-o drom.
Kä lesqi xoli sigo lel jag!
Ferićime si sǎ save roden azävada lesθe!